Read Rongmei Naga 2 KINCHAKH 35 Bible Online

2 KINCHAKH 35 - Rongmei Naga bible

2 KINCHAKH 35

¹Guangh Josia rui RINGHPOUC ta chakhwang swna Kaanpatpui Ngai Jerusalem khou ngay the; reymei bw tuang zaeng 14mei nungc mi ngai khang tei khouringh swluai the.

²Kamei rui amuh nunc khou kaniw rui Ravkai khou taanc nimei thouc taanh khang tiilou the kumna hei tei taanc chuyna taanh khang katiulou the.

³Kamei rui Isaraelmei tuang dinhpouc nunc, RINGHPOUC khou katgutloumei Levimei nunc khou sa the: “David nac mpouh guangh Solomon rui kasiamhloumei Ravkai khou tei Latdyng Khuk tei lou o. Hei tei nangniw puanc kalaic kalw tat bam dat ni tuang hamh the; tiki nangniw hei RINGHPOUC nangniw Racguangc khatni Isaraelmei tuang siamruai swna bam nina e.

⁴Guangh David khatni kanac mpouh Solomon rui nangniw khou nzanhloumei thouc thei tei layna puinac puinac khou tiiloumei thouc tei Ravkai khou tei guangna taanc tho,

⁵kumna nangniw gaanvsaekc rui Isaraelmei kathuicna ta nkhavlou nuh khang ni chamdaanv o.

⁶Kaanpatpui Ngai tuang lauziunac khatni ziuh guay tei nangniw rui dowluai nina e. Ntaw thu nangniw pumc nthan tho kumna RINGHPOUC rui Mousi khou dincloumei thiak tei suicna Isaraelmei rui taanc kan diu khang khaeng nimei taanv tei nangniw rui chamdaanvlou tho.”

⁷Kaanpatpui Ngai khou tei meic nunc rui sinsw khang guangh Josia rui katuang lauziu, lauziunac khatni ziuhnac 30,000, khatni guaituamchic 3000 tii pat the.

⁸Katuang meicdaihmei guay rui ni meic nunc, amuh nunc, khatni Levimei nunc sinsw kan khang tii pat muay the. Kumna Ravkai khou tei kadai phunghmei—Tingkuh Hilkia, Zekaria, khatni Jehiel rui mi ngai khou tei khaeng khang amuh nunc khou lauziunac khatni ziuh 2,600 khatni guaituamchic 300 tiilou the.

⁹Levimei tuang kapy nunc, Konania, Shemaia khatni kachana Nethanel, Hashabia, Jeiel, khatni Jozabad rui Levimei nunc rui khaeng khang lauziunac khatni ziuhnac panguh khatni guaituamchic 500 tii pat muay the.

¹⁰Kaanpatpui Ngai khang tei ramh katana chamdaanv luailou pwkhou, amuh nunc khatni Levimei nunc tei guangh tuang latdanv theilayna kathouc kathouc bamv khou tei guang the.

¹¹Lauziu khatni ziuh guay tei dowluailou pwkhou, Levimei nunc rui kagic guay tei luap the khatni amuh nunc rui zei tei ravchapaeng khou kazinhlou the.

¹²Mi tangv tei kaikhunh kaikhunh khang Mousi tuang latdanv theilayna rawna khaeng khang rawna khaeng nimei khouringc tei nzanh pat the.

¹³Levimei nunc tei rui Kaanpatpui Ngai tuang khaengmei zanc tei kariak suicna rawna khatni nthanmei puatkat tei suangc lana katumcna meic nunc khang tei nzanhlou the.

¹⁴Mi guay tei luailouna Levimei nunc rui kaniw khang khatni Aron kiktamei amuh nunc khang zanh tei nzanh the, kalam thu khouringh khatni kathav nteina zinghmei nganvna taanv tynna khaeng the.

¹⁵Asap, Heman, khatni guangh tuang muhzwng Jeduthun kaniw ni Levimei ludowmei Asap puinacmei guangh David rui kaniw thouc tiiloumei thouc tei sin the. Ravkai kaimun rigaanvmei nunc tei kaniw bamv tei mpatlou mak khe, kalam thu Levimei guay rui kaniw khang ni Kaanpatpui Ngai tuang tei kasiamhlou the.

¹⁶Kumna Guangh Josia rui taanc o twna latdanv patmei guay Kaanpatpui Ngai ngaymei, khatni rawna ravchapaeng khou khaengmei taanv guay tei mi nungc tei nthuihna taanclou the.

¹⁷Kumna guang bammei guay zaeng chanei Kaanpatpui Ngai khatni Khay lou Makmei Ngai tei ngay the.

¹⁸Muhzwng Samuel ganv khou rui thauna mi nungc nganvmei khou tei Kaanpatpui Ngai mi hei kumcna ngay zat kan mak ge. Josia kumcna Tingkuh nunc lev Levimei nunc lev Juda khatni Isarael khou bammei guay lev ngay kanmei guangh khat sini maek ge.

¹⁹Josia rui guangh swmei tuang 18mei kwm Kaanpatpui Ngai hei ngay kan pui tuang e.

²⁰Guangh Josia rui mi guay hei Isaraelmei khang rui taancloumei tangv, Euphratis duithuak daeng khou Karkemis twmei bamv khou rih adow khang Izipmei guangc Neko rui katuang ricmei nduanghna ngangh the.

²¹Khoutei Neko rui Josia khou kumna chamv tii guang the: “Judamei guangcle, ai rui adow bammei ric hei nang ta kahi mak ge. Ai nang ta adow khang guang tuang hamh e, ata zauczihmei ta adow khang de. Katumcna adow khang Ravguangc rui akhou sa the. Ravguangc abiak liangc bam e, kumna nang ata akhangv la rio, kamei rui nang ta swmutlou tim e.”

²²Tiki Josia tei adow ni the twna ning the. Ravguangc rui guangh Neko khou rui kakhou samei lat tei kamei chulou mak khe, kumna kamei kalwn kalaicna, adow khang Megiddo nzaengc khou key the.

²³Rihbamv khou tei guangh Josia ta Izipmei tuang pailu rui tow the. Kamei rui kabangc nunc khou kumna latdanv pat the, “Ata puanc pat tho, ai hei zamh kasic sihna nzamh the.”

²⁴Kaniw rui kata katuang takuanc gari khou rui katuang kaneimei takuanh gari mi khou tei nai bammei khou puanc patlou the, kumna Jerusalem khou phungc guang the. Kamei mi khou tei theiclou the kumna guangh nunc tarou khou mbeihlou the. Judamei khatni Jerusalemmei guay rui kata huay the.

²⁵Muhzwng Jeremia rui guangh Josia ta latlumei lu phuaklou khwan e. Hei tei ntumei, nggaanvmei lu suanmei nunc rui kata latlumei ganv khou suanmei lu swna Isarael khou suan bam the. Mi lu hei latlumei tuang hyloumei buk khou tei nai the.

²⁶Josia rui taancloumei guay kamei rui Ravguangc ta nzianmei, kamei Riakdanv piumei,

²⁷khatni kamei guangh swthau khou rui luaimei nganv tuang rwanry guay hei Isaraelmei khatni Judamei guangc nunc tuang Chakh buk khou hylou the.