Read Rongmei Naga 2 KINCHAKH 36 Bible Online

2 KINCHAKH 36 - Rongmei Naga bible

2 KINCHAKH 36

¹Judamei nunc rui Josia nac mpouh Joahaz ta guangh khang kadahna Jerusalem khou thauh teylou the.

²Joahaz tei katingkwm 23 khou guangh swna Jerusalem khou bw thumh guangh swlou khwan e.

³Izipmei guangc Neko rui kata nymna Judamei ta kakhang daandi kilogram 400 khatni kachaekc kilogram 34 dihkhav swna tii khang swlou khwan e.

⁴Neko rui Joahaz kainac Eliakim ta Judamei guangc tiswlouna kazanc Jehoiakim twna kalaiclou khwan e. Joahaz ta Neko rui Izip thangc phungc tat kan khwan e.

⁵Jehoiakim tei katingkwm 25 khou guangh swna kamei Jerusalem khou tingkwm 11 guangh swlou khwan e. Kamei RINGHPOUC kaRacguangc ruc khou paapc taanc khwan e.

⁶Kumna Babilonmei guangc Nebukadnezar rui Juda khou rihkeyna, Jehoiakim ta nymna kangriang ntana Babilon thangc zay tat kan khwan e.

⁷Nebukadnezar rui Ravkai tuang lanv asaekc laa tatna Babilon khou kaguangckai khou lou khwan e.

⁸Jehoiakim rui taancloumei guay, kamei rui chanymei tuang taanv taanc kanmei khatni simei taanv taanc kanmei, mi guay hei Isarael khatni Juda tuang guangh nunc tuang Chakh buk khou hylou the. Kanac mpouh Jehoiakin rui kaphaan guangh sw lyn dat the.

⁹Jehoiakin tei katingkwm 18 khou Judamei guangc swna kamei Jerusalem khou bw thumhna zaeng ruh guangh swlou khwan e. Kamei ni RINGHPOUC ruc khou paapc taanc khwan e.

¹⁰Lauphwnswan pat pwkhou, guangh Nebukadnezar rui Jehoiakin ta Babilon thangc kangmei swna zay tat kan the, mi khou tei Ravkai tuang lanv guay ni phungc tat kan the. Mi tangv tei Nebukadnezar rui Jehoiakin pulauc Zedekia ta Juda lev Jerusalem tuang guangc tiswlou the.

¹¹Zedekia tei katingkwm 21 khou Judamei guangc swna kamei Jerusalem khou tingkwm 11 guangh swlou khwan e.

¹²Kamei RINGHPOUC ruc khou paapc taancna RINGHPOUC lat samei muhzwng Jeremia lat tei kamei niamh keyna nking mak khwan e.

¹³Zedekia rui kamei latpiuna lungc ni twna namna Ravguangc zanc khou syangdyng tiswloumeipu guangh Nebukadnezar ruc khou rih thau khwan e. Kamei kalung tancna, lunghlaicna Isarael Racguangc RINGHPOUC khou guang dat mak khwan e.

¹⁴Mi na tei hamhna, Juda tuang kapy nunc, amuh nunc, khatni meic nunc tei kaniw daeng khou lungc bammei zaat nunc tuang paapc taanv tei layluaihna ravmaengc kalum the, kumna RINGHPOUC rui sw nthanloumei Isaraelmei tei kaniw rui swtanac the.

¹⁵RINGHPOUC kaniw pupouc Racguangc rui kamei nunc khou katuang muhzwng thouc guang dat datna sa bam khwan e, kalam thu kamei rui kaniw ta khatni Ravkai ta swmaan nii mak khwan e.

¹⁶Tiki kaniw rui Ravguangc latdiu tatmei nunc ta sinnuina, kalat tei laalou makna muhzwng nunc ta nuicna bam khwan e, kumna nkhamh khou Ravguangc lungpuam kamei nunc ruc khou heidikamv daicna duak datmei chaeng maek khwan e.

¹⁷Kumna RINGHPOUC rui Babilonmei guangc ta kaniw ta adow khang phungc guang the. Mi guangc tei rui Judamei chabwan nunc ta Ravkai khou nganvna swluai the. Kamei rui alauc ta ni, gaanvthaih ta ni, ntumei ta ni, nnaumei ta ni zauc nzianlou dat mak khe. Ravguangc rui kaniw guayna ta tei mipu baanc khou tei tiilou kan the.

¹⁸Babilonmei guangc rui Ravkai tuang, guangh khatni katuang meicdaihmei nunc tuang lanv guay laana Babilon thangc phungc tat kan the.

¹⁹Kamei rui Ravkai tei, kaidai tei, guanghkai khatni mi kai lanv guay tei mai ntei the. Kaidai raengc tei swra the.

²⁰Kamei rui theic nsaekcloumei guay ta Babilon thangc phungc tatna Persiamei guangcdic thau mak saanv mi khou tei kaniw bangh swna Babilonmei guangc nunc siamruai sw bam khwan e.

²¹RINGHPOUC rui muhzwng Jeremia khou rui “Kaniw rui ngaek makmei Sabbath zaengthaek sing tei mi kandic hei tingkwm 70 meic lungh makna ganclou puni the,” twna dinc kasuakcloumei tei guang tangc kan the.

²²Sairas rui Persiamei tuang guanghdaihmei swmei tuang reymei kwm, RINGHPOUC kamei rui muhzwng Jeremia khou dinc kasuakclou kanmei tiguang tangclou the. Kabangc khoumei latdanv hei hy pat lana kaguanghdic kabamv kathuicna khou nzanh patna kabamv kathuicna khou pac ranvna pac khang Ravguangc rui Sairas khou katiulou the:

²³“Mi hei Persiamei tuang guanghdaihmei Sairas tuang latdanv e. RINGHPOUC tingkauh Racguangc rui ata kandih kapwm tuang guangc tiswlouna Juda kandic khou naimei Jerusalem khou kakhang Ravkai akhat kasiamhlou khang athouc tiswlou the. Ntaw thu, Ravguangc tuang mei nangniw, mi thangc tei tat tho, kumna RINGHPOUC nangniw Racguangc rui nangniw ta nduanghlou pw diu.”