Read Rongmei Naga 2 KINCHAKH 7 Bible Online

2 KINCHAKH 7 - Rongmei Naga bible

2 KINCHAKH 7

¹Guangh Solomon rui katuang ravsuai tei luai raph twpui lev tingkauh thangc rui mai keyna khaengloumei puat guay tei raw ngam kan the, kumna RINGHPOUC tuang karangmei riw tei rui Ravkai tei padik the.

²Ravkai tei mi tuang riw tei rui padik timei zaeng rui, amuh nunc tei mi lungc khou tei gut ngam mak khe.

³Tingkauh thangc rui mai keymei khatni Ravkai tei kariw rui padik bammei tei Isaraelmei guay rui how lana kaniw zaw kandih sow nkhumna Ravguangc ta kalum the khatni karamgai lev karamzian khang tei thuanc the.

⁴Kumna Solomon khatni meic nunc tei rui RINGHPOUC khang khaeng the.

⁵Kamei rui guaih 22,000 khatni lauziu 1,20,000 alamvpuatkat swna kat the. Heikumna kamei khatni meic nunc tei rui Ravkai tei katgutlou the.

⁶Amuh nunc tei kaniw khang tiiloumei bamv khou tei dingna Levimei nunc ta tei ding achowna guangh David rui tiiloumei ludow na guayna downa RINGHPOUC ta thuancna suan the. Kaniw ta David rui amuh suamlouna bam khou kaniw tei “Karamzian hei tingsaengzaeng e!” twmei lu suanna bam the. Meic nunc rui dingna bam khou amuh nunc rui bianggun amuan the.

⁷Ravkai kaimav khou naimei kaimav tuang nchungmei langv tei Solomon rui katgutlou the kumna kapumc rawna mi bamv khou tei khaeng the, kumlana nap-bi puatkat khatni alamvpuatkat tuang thav guay tei ni ntei the. Kamei rui mi khou tei khaengpuat rawmei thav kamei rui kasiamhloumei tanzinc ravchapaeng khou na tei raw chan makmei zaeng rui e.

⁸Kumna Solomon khatni Isaraelmei guay tei Chaengkai Ngai zaeng chanei ngay the. Dihpy thangc Hamat chaeng khou rui dihba thangc Izip ramvrei nganv khou rui meic kangdai guang kaduai the.

⁹Kaniw rui zaeng chanei ravchapaeng tei katgutmei thouh sw the, mi tangv tei zaeng chanei ngay the. Kumna nkhamhmei nungc luailoumei taanv taanclou the.

¹⁰Kumna nthuanh thauna chaneimei bw tuang zaeng 23mei nungc Solomon rui meic nunc ta tei kaniw kai thangc thouclou dat kan the. RINGHPOUC rui Isaraelmei khou, David khou, khatni Solomon khou tiiloumei suaihiam khang tei rui kaniw neihla the.

¹¹Guangh Solomon rui Ravkai khatni guanghkai tei kamei rui sw ni twna raengcloumei kumcna ramh guayna kasiamh luai pwkhou,

¹²zingbangc akhat RINGHPOUC kakhou lyanlou the. RINGHPOUC rui kakhou sa the, “Nang rui huayneymei tei ai chu the, kumna mi Ravkai hei akhang khaengmei bamv khang ai rui laalou the.

¹³Ai rui ting tiriu key mak pwkhou, hamh e thei phunling tu ngam khang nkav thouc guang pwkhou, hamh e thei amei nunc ruc khou ravpyan tiguang pwkhou,

¹⁴kaniw rui akhou huayneyna kaniw rui lunghlaicna kaniw tuang simei taanv khou tei rui hanc guang dat re thei, kaniw rui huayneymei tei ai rui tingkauh thangc rui chulou puni kumna kaniw tuang paap guay kuaklouna kaniw tuang kandic tei tigaylou dat puni.

¹⁵Ai rui mi Ravkai ti hei gaeklou puni, kumna mi khou rui huayneymei guay ai rui chulou puni,

¹⁶kalam thu mi bamv hei ata kalummei bamv khang ai rui kadahlouna laalou the. Ai rui mi Ravkai ti hei kaganv kathuicna khou zaucna gaeklou puni.

¹⁷Nang rui nang pu David kumcna lwm nuhmei swna asiamruai swna alat piuna alatdanv guay taancna lungc e thei,

¹⁸ai rui nang pu David khou kakikta rui Isaraelmei khou guangh sw tanh tanna lungc puni twna nrianhlou kanmei tei guang tangc puni.

¹⁹Tiki nang khatni nang mei nunc rui atuang latdanv guay tei liamna rav baihmei ta kalum e thei,

²⁰ai rui nangniw ta nangniw khang tiiloumei kandic khou hei rui laa pat puni kumna ata kalummei bamv khang ai rui laaloumei Ravkai ti hei ni mpatlou puni. Kabamv kathuicna khou bammei meic guay rui mi Ravkai ti hei sinnui puni khatni mala puni.

²¹“Ntaw thu mi Ravkai ti hei chakhwang swna bam e, tiki mi ganv khou kiu thu tatruanloumei guay rui ngak sakh sakna kumna sa puni, ‘Tabui swna RINGHPOUC rui mi kandic khatni mi Ravkai khou heikumna swlou bam tu cho?’

²²Khoutei meic nunc rui ‘Mi hei kaniw pupouc nunc ta Izip kandic khou rui phungc patloumei RINGHPOUC kaniw Racguangc ta kaniw rui mpatlou tina mi hei kum bam tuang e tw e. Kaniw rui rav baihmei khou tatna kalum tat kan tina e tw e,’ twna daw puni.”