Read Rongmei Naga 2 KINCHAKH 8 Bible Online

2 KINCHAKH 8 - Rongmei Naga bible

2 KINCHAKH 8

¹Solomon rui Ravkai khatni guanghkai kasiamhmei tei tingkwm 20 gut khwan e.

²Guangh Hiram rui kakhang tiiloumei kaidai guay tei ni kamei rui kasiamh dat lana mi guay khou tei Isaraelmei ta tilungclou khwan e.

³Kamei rui Hamat khatni Zoba ramv tei laana

⁴sypungramv khou naimei Palmira kaidai tei raengh raengna kasiamhlou khwan e. Hamat khou naimei kaidai guay tei kamei rui kasiamh thau datna ramh ryloumei bamv sw khwan e.

⁵Solomon rui kabangc khoumei kaidai guay hei ni kasiamh thau dat khwan e: Karucmei Beth Horon khatni Kabangcmei Beth Horon (mi kaidai kanei hei raengh raengna raenghmun taanc nuhmei kaidai e).

⁶Baalat kaidai, kamei rui ramh ryloumei kaidai guay, khatni katuang takuanc khatni takuanh gari loumei kaidai guay Jerusalem khou, Lebanon khou khatni kamei rui sinmei kandic kapwm khou kamei rui kai kasiamh ni twna ningloumei guay tei kasiamh thau ngam khwan e.

⁷Hittimei, Amormei, Perizimei, Hivimei khatni Jebusimei

⁸mi mei nunc hei Isaraelmei nunc rui swmut nsaekcloumei, mi kandic khou tei lungc bammei nunc e kumna Solomon rui kaniw ta namna taanv titaanc khwan e. Kaniw hei aseic nganvna bangh swna bam e.

⁹Isaraelmei ta thu taanvtaanhmei khang nym mak ge, tiki kaniw thu rihmei, kandih sinmei, takuanh gari sinmei, khatni takuanh sinmei nunc sw the.

¹⁰Kai kasiamhmei taanv guay khou tei nymna taanv titaanhmei nunc ta sinmei khang meic gaanv 250 lou khwan e.

¹¹Solomon rui kanow Izipmei guangc nacpui ta tei David kaidai khou tibam makna kakhang kasiamhloumei kai thangc tilungc tat khwan e. “Kamei hei Isaraelmei guangc David kai khou lungc nuh mak ge, kalam thu Latdyng Khuk loumei bamv hei thu nthanmei bamv e,” twna Solomon rui sa the.

¹²Solomon tei kamei rui Ravkai kaimav khou kasiamhloumei ravchapaeng khou tei RINGHPOUC khang khaeng the.

¹³Mousi tuang latdanv khou hyloumei theilayna kabangc khou hyloumei tingmik guay khou hei rawna khaeng the: Sabbathneic, bw thanh Ngai, khatni tingkwm tuang ngai kathumh—twmei thu Khay Lou Makmei ntyan Ngai, Lautay Ngai, khatni Chaengkai Ngai.

¹⁴Kapu David rui kum nina e twna kasiamhloumei theilayna amuh nunc khatni amuh nunc ta kaniw taanv khou khatni lu suanmei khou nkhavlou bammei Levimei nunc ta kaniw tuang tingmik pum tuang thouc tei langlou the. Ravguangc tuang mei David tuang latdanv theilayna kamei rui chaengmun kathuic khou rigaanv nimei Ravkai rigaanv guay tuang tingmik pum tuang thouc tei ni langlou the.

¹⁵Amuh nunc khatni Levimei nunc rui ramhrykai guay khou taanc nimei thouc guay tei ni David rui dincloumei kumcna langlou the.

¹⁶Ntaw thu Solomon rui taanc ni twna raengcloumei raeng guay tei taanc luai the. RINGHPOUC tuang Ravkai tei taanc kahow raph nungc tei rui thauna luaimei nganvna taanc nimei guay tei nthuihna taanc the.

¹⁷Mi tangv tei Solomon tei Edom kandic khou Akaba duipui tin khou naimei Eziongeber lev Elat kaidai thangc tat the.

¹⁸Solomon khang guangh Hiram rui katuang meicdaihmei nunc lev rungh chau thaymei nunc ta ndiulouna rungh pang tii guang the. Kaniw tei Solomon tuang meicdaihmei nunc lev twna Ophir kandic thangc rungh guay tei phungcna tatna guangh Solomon khang kachaekc kilogram 15,000 suangc geicna phungc guang the.