Read Rongmei Naga 2 KINCHAKH 9 Bible Online

2 KINCHAKH 9 - Rongmei Naga bible

2 KINCHAKH 9

¹Guangh Solomon tuang zanh tatmei tei Shebamei liammavpui rui chu lana kakhou lat tam khang Jerusalem khou guang the. Kamei kasiamruaimei meic mpeyna nduanghna maruai, kunghmei tauc khatni kachaekc mpeyna rui guaikuan pang puat sw lana guang the. Kamei Solomon lev ariwna kamei rui ning patmei lat guay tei tam the.

²Solomon rui mi guay tei daw ngam the, kakhang daw kunghmei tuang khat na sini maek khe.

³Shebamei liammavpui rui Solomon tuang ningting tei thay the khatni kamei rui kasiamhloumei guanghkai tei how the.

⁴Kakuakpaeng khou tu zangv khang kasiamhlou bammei, katuang meicdaihmei nunc tuang kai guay, guanghkai khou taanv swmei nunc taanvtaanc bammei thak khatni kaniw tuang nchamcna piumei pwan, napkih khou siamruai swmei nunc rui piu bammei pwan guay khatni Ravkai khou khaeng bammei guay tei kamei rui how the. Hei tei kamei charyn sihna howlou the.

⁵Kamei rui guangh khou tei sa the, “Ai rui nang lam khou khatni nang tuang ningting lam khou akandih thangc rui chumei tei nchumh dyng the!

⁶Ai guangna how tangh mak saanv thu ai lwm mak khwan e. Ai nang tuang ningting lam tei kapaekna sini chu tangh mak bu di he cho. Nang hei meic nunc rui sa bammei suangc sini ningting the.

⁷Nang siamruai sw bammei nunc, nang daeng khou bam tanh tanna nang lat tei nkingna bammei nunc tei adih sangaymei nunc cho?

⁸RINGHPOUC nang Racguangc ta thuanc e. Kazanc khou rui guangh sw khang nang ta guangh tiswloumei hei rui kamei rui nang ta adih pianlou cho twmei lyan the. Kamei rui katuang mei Isaraelmei ta nzian lamei zaeng rui nang rui nchumhna kandih sin khang kamei rui nang ta kaniw tuang guangc tiswlou tuang the.”

⁹Kumna kamei rui phungc guangmei kaipat kachaekc kilogram 4000 mbu khatni maruai lev kunghmei tauc mpeyna Solomon khang tiilou the. Shebamei liammavpui rui Solomon khang kaipat swna phungc guangmei maruai ramgai tei kumhmei baihmei nai kan mak ge.

¹⁰(Guangh Hiram tuang mei nunc lev guangh Solomon tuang mei nunc rui Ophir kandic thangc rui kachaekc phungc guangmei nunc tei rui junipar thing lev kunghmei tauc ni mpeyna phungc guang khwan e.

¹¹Solomon rui mi thing tei rui Ravkai khatni guanghkai tuang kailaak guay lev ludowmei nunc tuang nrah guay khang tei kasiamh the. Hei tei kumhmei tei Juda kandic khou how zat kan mak ge.)

¹²Guangh Solomon rui Shebamei liammavpui khang tei kamei rui neymei guay tii the. Kamei rui phungc guangmei khang suangc sini geicna tii the, hei tei katuang kaipat guay khang tii khangc datmei ta kazauh mak ge. Mi tangv tei kamei guay ta nduanghna Sheba kandic thangc tat dat kan the.

¹³Guangh Solomon khang tingkwm pum kachaekc kilogram 23,000 dou tii guang tanh tan khwan e.

¹⁴Mi hei lanvguanhmei nunc rui kaniw thaengv swna tii guangmei ta chak mak ge. Arabmei tuang guangc nunc khatni Isaraelmei ramvlangv tuang kaipouc nunc rui ni kakhang daandi lev kachaekc tii guang bam khwan e.

¹⁵Solomon rui nggih daihmei 200 kasiamh khwan e. Nggih akhat khat tei dymei kachaekc kilogram chanei chanei rui duam khwan e.

¹⁶Nggih nthyam maihmei 300 ni kasiamh khwan e, kumna akhat khat tei dymei kachaekc kilogram kathumh thumh rui duam khwan e. Kamei rui mi guay tei Lebanon Ngouc twna kawmei kai khou tei lou khwan e.

¹⁷Guangh David rui guangh bamvpaeng daihmei akhat ni tikasiamh khwan e. Hei tei kalangv asaekc guaipwangnei rui khatni baihmei guay tei kachaekc nthanmei rui duam khwan e.

¹⁸Guangh bamvpaeng ku nimei phaykhuat charuk nai khwan e, kumna mi khou tei kachaekc rui duammei phaybah bamv akhat lou khwan e. Guangh bamvpaeng baanzat baandau khou baanh baengpui bamv nai khwan e, kumna kadaeng kanei khou tei kamangliangpui maengc lou khwan e.

¹⁹Phaykhuat khou tei katin khou kamangliangpui maengc akhat akhat louna kaguayna 12 lou khwan e. Mi guangh bamvpaeng kumhmei tei guanghdih baih khou nai kan mak ge.

²⁰Guangh Solomon tuang buangh guayna tei kachaekc nthanmei rui kasiamh tuang e. Solomon ganv khou thu daandi hei kunghmei puat re twna chak dat mak khe.

²¹Guangh Hiram tuang rungh pang lev twna tatmei katuang duipui khou tatmei rungh pang nai khwan e. Tingkwm kathumh pum katuang rungh pang tei kachaekc, daandi, guaipwangnei, zoucdai pang, khatni zouc pang phungcna guang dat raph rap khwan e.

²²Guangh Solomon tei kandih namruc khou naimei guangh guay khou rui lungcgayliang khatni ningting liang khwan e.

²³Ravguangc rui kakhou tiiloumei ningting tei nking khang kandihmei guangc guay guang kaduai bam khwan e.

²⁴Kaniw guay tei rui Solomon khang daandi khatni kachaekc tuang puat, thiula saenghmei, rih na, maruai, khatni takuanh kaipat swna phungc guang bam khwan e. Hei tei tingkwm tingkwm swna phungc guang bam khwan e.

²⁵Guangh Solomon tei katuang takuanh gari lev takuanh kai 4000 khatni rih takuanc 12,000 nai bam khwan e. Mi asaekc tei Jerusalem khou lou the kumna baihmei guay tei kaidai baih baihmei khou lou the.

²⁶Euphratis duithuak khou rui Philistia khatni Izip ramvrei nganv khou naimei guangh guay ruc khou kamei hei daic liangmei guangc sw the.

²⁷Kamei guangh sw bammei ganv khou Jerusalem khou daandi hei ntauh kumc mphamh khwan e, khatni sidar thing hei sikamor thing kumc geic khwan e.

²⁸Solomon rui Izip khatni baih baihmei kandic thangc rui takuanh laaguang bam khwan e.

²⁹Solomon rui guangh swloumei pary kahouhmei khou rui luaimei nganv muhzwng Nathan tuang pary khou, Shilomei Ahija tuang Ramundinhmei buk khatni Isaraelmei guangc Jeroboam lam hyloumei muhzwng Iddo tuang ndawman buk khou hylou the.

³⁰Solomon Jerusalem khou rui Isaraelmei ta tingkwm 40 sinlou khwan e.

³¹Kamei theicna David kaidai khou mbeihlou the kumna kanac mpouh Rehoboam rui kaphaan guanghtu lyn the.