Read Rongmei Naga EZRA 1 Bible Online

EZRA 1 - Rongmei Naga bible

EZRA 1

¹RINGHPOUC kamei rui muhzwng Jeremia khou dinc kasuakclou kanmei tei Persiamei Guangc Sairas rui guanghdaihmei swmei tuang reymei kwm tiguang tangclou the. Guangh tei rui heikumna latdanv akhat tii patna hykeyloumei latdanv tei kaguanghdic kapwm khou pac ranvna tipac lik go twna RINGHPOUC rui Sairas khou katiu the:

²“Mi hei Persiamei tuang Guanghdaihmei Sairas tuang latdanv e. RINGHPOUC, tingkauh Racguangc kamei rui ata kandih kapwm tuang guangc tiswlou the kumna Juda kandic khou naimei Jerusalem kaidai khou kakhang Ravkai kasiamhlou khang thouclou the.

³Ravguangc rui kamei nunc nangniw ta nduanghlou diu. Nangniw Jerusalem thangc tat datna RINGHPOUC, Isarael Racguangc, Jerusalem khou kalummei Ravguangc tuang Ravkai tei kasiamh dat nina e.

⁴Tabui tabui kandic khou pwni gin swna lungc bammei Isaraelmei Jerusalem thangc tat dat khang kaniw khang ramh kage naimei tuang nai e thei kaniw tuang kainingmei nunc tei rui kaniw khang daandi, kachaekc, puatchei, puatc phunghmei khouringc, khatni Jerusalem khou naimei Ravguangc tuang Ravkai khou kat khang puatkat khang tiilouna nkhavlou nina e.”

⁵Khoutei Juda khatni Benjamin kaikhwang nei tuang puinac nunc tuang kapy nunc, amuh nunc khatni Levimei nunc, khatni Ravguangc rui kaniw lung khou katiuloumei kathuicna Jerusalem thangc tatna RINGHPOUC tuang Ravkai kasiamh dat khang chamdaanv the.

⁶Kaniw tuang kainingmei nunc rui ramh mpeyna: daandi tuang laibung lairiu, kachaekc, puktaek, puatc phunghmei khouringc nunc, baihmei kamanv kunghmei puat guay khatni Ravkai khou kat nimei puatkat tiina nkhavlou the.

⁷Guangh Nebukadnezar rui Jerusalem tuang Ravkai khou rui laana katuang rav nunc tuang Ravkai khou lou bammei kaikhuang guay khatni tamkuak guay tei Sairas rui kaniw khou tiilou dat the.

⁸Guangh rui mi guay tei guangh tuang lanvrymei daic liangmeipu Mithredat khou tiipat the, kumna kamei rui Judamei tuang guanghkhyn Shesbazar khang kasing tei,

⁹kumna chanclou the: Khaengmei tuang kachaekc kaikhuang — 30 Khaengmei tuang daandi kaikhuang — 1000 Baihmei kaikhuang — 29 Kachaekc tuang kuak nthyammei — 30 Daandi tuang kuak nthyammei — 410 Baihmei laibung lairiu — 1000

¹¹Kachaekc khatni daandi tuang kuak kaguayna 5,400 tangc e. Rih nymtatmei nunc ta Shesbazar rui Babilon khou rui Jerusalem khou nduangh guang datmei ganv khou mi guay tei phungc guang dat kanmei tuang e.