Read Rongmei Naga EZRA 4 Bible Online

EZRA 4 - Rongmei Naga bible

EZRA 4

¹Ginramdic thangc rui guang datmei nunc tei rui RINGHPOUC, Isarael Racguangc tuang Ravkai kasiamh thau dat bam the twmei Juda khatni Benjaminmei ta zauczihmei nunc rui chu the.

²Kumna kaniw Zerubbabel khatni kaikhwang guay tuang gaanvthaih nunc khou guangna kumna sa the, “Aniw ni Ravkai kasiamhmei khou tei kazauh lou nii e. Aniw ni nangniw kalummei Racguangc ta tei kalum muay di the, kumna Asiriamei guanghdaihmei Esarhaddon rui aniw ta mi khou hei lungh khang thouc guang khou tei rui thauna mi Racguangc khang khaengna lungc guang di the.”

³Zerubbabel, Joshua, khatni kaikhwang nunc tuang gaanvthaih nunc tei rui kaniw khou sa the, “RINGHPOUC aniw Racguangc tuang Ravkai nangniw rui kasiamh nkhavlou khang kage maek ge. Persiamei guanghdaihmei Sairas rui latdanv pat kanmei kumcna mi hei aniw rana kasiamh kan ni de.”

⁴Hei kandic khou lungc bammei nunc tei rui Jihudimei nunc ta tei kaniw lung titangkhyn lana khatni tiping lana taanv ti-nthaekc khang karamc the.

⁵Persiamei dihsinpouc nunc rui ni kaniw ta thingh khang kaniw rui lanvbiw the. Kaniw heikumna Sairas rui guangh sw bam khou rui thauna Darias rui guangh swmei nganvna sw guang the.

⁶Guanghdaihmei Serses rui guanghtu kahouhmei ganv khou Juda khatni Jerusalem khou lungc bammei nunc ta zauczihmei nunc rui kaniw ruc khou khuay nkhamna hy guang khwan e.

⁷Khatni Arthasastha rui Persiamei tuang Guanghdaihmei swna bammei douc, Bishlam, Mithredat, Tabeel, khatni kaniw duangmei nunc rui guanghdaihmei khou tei tatdyn hy guang khwan e. Mi tatdyn tei Aramaikmei lat khou hy guang tina hanc patna pac khwan e.

⁸Guanghkhyn Rehum khatni mi ramv tuang hymeipu Shimshai rui ni Arthasastha khou Jerusalem lam khou kumna hy guang khwan e:

⁹“Guanghkhyn Rehum, mi ramv tuang hymei Shimshai, kaney pamv nunc, latzanpouc nunc, khatni baihmei meicdaihmei nunc, Erek, Babilon khatni Elam kandic khou Susa khou rui guangmei nunc,

¹⁰ngamv naimei Ashurbanipal rui kaniw kai tikalaiclouna Samaria kaidai khatni Euphratis duithuak neihkey kandic thangc lungc bammei guay lev kazauhna mi hei hy guangmei tuang e.”

¹¹Tatdyn lat kiu mi hei e: “Guanghdaihmei Arthasastha khou Euphratis duithuak neihkey kandic thangc bammei kabangc nunc rui tii guangmei tuang e.

¹²“Aniw rui guangh khou tithay niimei lat thu mi hei e, twmei thu baih baihmei kandic guay thangc rui guang datmei Jihudimei nunc Jerusalem khou lungc bam the, kumna sikanmei meicliammei kaidai tei kasiamh thau dat bam the. Kaniw tuang raengc guay raeng thau dat the kumna katumcna luai kan puni the.

¹³Guanghle, mi kaidai hei kasiamh thau datna raengh tei raeng luai dat la thei kaniw tei dihkhav tii taan pwng the, kumna guangh tuang syandui guangmei chaeng tangkhyn key pwng the.

¹⁴Ntaw aniw guangh bangc khou bammei zaeng rui heikumna pat bammei ta zauc nii mak ge, kumhpui zaeng rui aniw nang khou kumna sa nii e,

¹⁵twmei thu nangpu nangpouc nunc rui hylou duhmei guayna phuna zauh khang latdanv pat tio. Kumna zauc pw e thei, mi kaidai hei rui meicliamna adow tanh tan guang e kumna rey khou rui nganvna mi kandic tuang guangc nunc khatni dihsinpouc nunc rui sw katuakc guangmei tuang de twmei thay puni. Kaniw hei sinbin khang kunghmei maansei nunc the. Hei zaeng rui mi kaidai ti hei sw kamut kamailoumei tuang e.

¹⁶Kumhpui zaeng rui mi kaidai hei kasiamh thau datna raeng luai dat kan e thei Euphratis Neihkey kandic hei guangh rui sin bow dat pu lak khe.”

¹⁷Guanghdaihmei rui kumna daw guang the: “Guanghkhyn Rehum, mi ramv tuang hymeipu Shimshai, khatni Samaria khou khatni Euphratis Neihkey ramv khou bammei kapammei nunc ta kalumna hy e.

¹⁸“Nangniw rui tii guangmei tatdyn tei hanc patna akhou pac the.

¹⁹Ai rui latdanv patna phu zauc the, kumna rey khou rui thauna Jerusalem rui guangh ngamv ta liamna kaniw suc-rih swna sw katuakcna guang the twmei how the.

²⁰Kapumtan daihmei guangh nunc rui mi khou tei sin bam khwan e khatni Euphratis Neihkey ramv guay hei kaniw rui sinna dihkhav laana bam khwan e.

²¹Hei zaeng rui ai rui latdanv daihmei tii pat dat mak saanv kaniw mi kaidai tei taanc nthaekc go twna nangniw rui latdanv pat tho.

²²Ramh thay o, hei tei ntaamvlou ri tho, kumna guangh ta kabiu mak khang taanc tho.”

²³Mi Arthasastha tuang tatdyn hei Rehum, Shimshai khatni kaniw pammei nunc khou pac rappui lev katumcna kaniw Jerusalem thangc tatna Jihudimei nunc ta tei mi kaidai tei kasiamh nthaekc khang sa the.

²⁴Persiamei guanghdaihmei Darias rui guanghtumei tuang kaneimei tingkwm tangh mak saanv Ravkai taanv tei nthaekcna ganclou bam khwan e.