Read Rongmei Naga EZRA 5 Bible Online

EZRA 5 - Rongmei Naga bible

EZRA 5

¹Mi ganv khou tei muhzwng gaanv nei Hagai khatni Iddo rui puanhmei Zekaria rui Juda khatni Jerusalem khou bammei Jihudimei nunc khou Ravguangc rui samei lat dinclou khwan e.

²Shealtiel rui puanhmei Zerubbabel khatni Jehozadak rui puanhmei Joshua rui muhzwng nei lat tei chu lana Ravkai taanv tei kahouh dat the, kumna muhzwng nei tei rui ni kaney ta nkhav khwan e.

³Dyng mak khou Euphratis Neihkey ramv tuang guanghkhyn Tattenai, Shethar Bozenai, khatni kaney tuang meicdaihmei nunc lev twna Jerusalem khou guangna, “Mi tuang Ravkai hei sw thau dat lana ramh guay hei lou datna bam o twna thow rui nangniw khou latdanv tii pwna cho?” twna sa the.

⁴Ravkai taanv khou tei nkhavloumei nunc zanc ni kaniw rui thanv the.

⁵Tiki Jihudimei gaanvthaih nunc ta tei Ravguangc rui zauclouna bam e, kumna Persiamei meicdaihmei nunc tei kaniw rui Darias khou tatdyn hy lana hei tei daw guang mak saanv taanv tei thu ti-nthaekc mak khang ding the.

⁶Kaniw rui guanghdaihmei khou mi hei kumcna poulou the:

⁷“Guanghdaihmei Darias, nang nchu-nzaenghna guangh sw bam kan diu.

⁸“Guangh rui thaylou nimei thu aniw Juda kandic thangc tat the kumna Rav daihmei tuang Ravkai tei ntauh daih daihmei rui tap thauna bammei khatni ngaengsaengc khou tei thing luang daih daihmei peiclou bammei guay tei aniw how the. Taanv tei taanc ntipna taanc bam the kumna nthaekc makna tat keyna bam the.

⁹“Ravkai tei kasiamh thau dat khang khatni mi tuang na guay tei duanclou dat khang thow rui ngamv tii pwna cho twna ai rui kaniw tuang kapy swmei nunc khou thanv khwan e.

¹⁰Mi taanv khou tei thow thow rui kapy sw bam tu cho twmei nang khou tithay khang aniw rui kaniw zanc ni thanv khwan e.

¹¹“Kaniw rui daw the, ‘Aniw hei tingpuk kandih damhmei Racguangc siamruaimei nunc de, kumna rey nungc kangamv daihmei Isaraelmei guangc akhat rui kasiamh thaulouna kana guay duancloumei Ravkai tei aniw kasiamh dat bammei tuang de.

¹²Tiki aniw pupouc nunc rui tingkauh Racguangc lung tipuamclouna kamei rui Kaldiamei zaat Babilonmei guangc Nebukadnezar ta aniw ruc khou rih tikeylou the. Ravkai tei sw kasic kan the khatni meic nunc ta tei Babilon thangc nym tat kan the.

¹³Mi tangv tei Guangh Sairas rui Babilonmei guanghdaihmei swmei tuang reymei tingkwm Ravkai tei sw thau dat khang kamei rui latdanv pat the.

¹⁴Nebukadnezar rui Jerusalem tuang Ravkai khou rui laana Babilon tuang Ravkai khou guang lou bam khwanmei kachaekc khatni daandi tuang na guay tei kamei rui tii guang dat the. Sairas rui mi taanv na guay tei kamei rui Juda tuang guanghkhyn khang suamc loumei Shesbazar baanc khou tii patlou the.

¹⁵Mi guay tei Jerusalem tuang Ravkai thangc phungc guang datna Ravkai tei kabamv khou tei kasiamh thau dat tho twna guanghdaihmei rui kakhou sa the.

¹⁶Kum tina Shesbazar rui guangna Ravkai bamv tei kasiamh thaulou dat the; hei khou tei rui thauna taanv tei tat key bammei tuang the, tiki ntaw nganv Ravkai tei luai mak he.’

¹⁷“Kumna guangh rui nuh e thei, Jerusalem tuang Ravkai kiu kasiamh thau dat khang guangh Sairas rui latdanv tiilou changh bu ny twmei hyloumei tuang tei kathat lana mi lam khou hei nang tabui kumhna ning cho twmei aniw khou tithaylou dat ro.”