Read Rongmei Naga EZRA 6 Bible Online

EZRA 6 - Rongmei Naga bible

EZRA 6

¹Guangh nunc rui hylou duhmei tuang Babilon khou phu o twna guanghdaihmei Darias rui latdanv pat the.

²Tiki Media ramv khou naimei Ekbatana twna kawmei kaidai khou latrik zy akhat phu patmei khou kumna hylou bam khwan the:

³“Ravkhaengmei bamv khang khatni puatkat rawmei bamv khang Jerusalem tuang Ravkai tei kasiamh thau dat tho twna guanghdaihmei Sairas rui kamei guangh sw reymei kwm latdanv pat the. Mi Ravkai tuang kakau khatni kadai tei chowbuk 60 nina e.

⁴Ngaengsaengc tei ntauh tuang thaek kathumh pum thing tuang thaek akhat akhat louna sw nina e. Gut nimei syandui guay tei guangh tuang lanv khou rui laa patna tii nina e.

⁵Kumna Guangh Nebukadnezar rui Jerusalem tuang Ravkai khou rui Babilon khou phungc guangloumei kachaekc khatni daandi tuang kuak guay tei Jerusalem tuang Ravkai khou kabamv kabamv khou lou dat nina e.”

⁶Khoutei Darias rui hei kumcna mundaw guang the: “Euphratis Neihkey ramv tuang guanghkhyn Tattenai, Shethar Bozenai, khatni kaney tuang meicdaihmei nunc khou tithay e. “Ravkai khou tei rui tat pat kan o

⁷kumna hei tei kasiamh bammei ta tei nchyan rio. Juda tuang guanghkhyn khatni Jihudimei gaanvthaih nunc tei rui Ravguangc tuang Ravkai tei mi tuang rey nungc bamv khou tei kasiamh thau dat kan diu.

⁸Mi taanv khou tei nkhavlou khang ai rui nangniw khou latdanv tiimei tuang e. Taanv tei sw chana mak khang Euphratis Neihkey ramv khou rui guangmei dihkhav guay khou tei rui mi khou gut nimei syandui guay tei katumcna tii tio.

⁹Jerusalem tuang amuh nunc rui Tingkauh Racguangc khou khaeng khang kage naimei guaituamchic launa, lauziu, lauziunac, gehu, ntey, drakhadui, Olive thauc hei guay tingmik tingmik khou kage naimei tei suai makna kaniw khang tii tio.

¹⁰Hei tei kumcna sw bammei thu kaniw rui Tingkauh Racguangc khou laalou nuhmei puatkat tei katna akhang khatni anac nunc khang suaihiam ney bam khang e.

¹¹Ai rui mi hei latdanv swna tii e twmei thu mi latdanv hei piu makpui mei ta tei kakai khou rui thingbungc sat pat lana sui nchumhna kapumc khou hui nzut phutlou nina e. Kumna kakai tei sw katuptuayna ganclou nina e.

¹²Hei tuang latdanv ti hei thouh sw makna Jerusalem tuang Ravkai ta sw kasic khang swmei guangh hamh e thei zaatc ta tei Jerusalem ti hei kata kalummei bamv khang kadahloumei Racguangc rui swmaan kan di tho. Darias, ai rui mi latdanv hei tiimei tuang e. Mi hei piu nthuih nina e.”

¹³Khoutei guanghkhyn Tattenai, Shethar Bozenai, khatni kaney pammei meicdaihmei nunc tei guanghdaihmei rui samei tei piuna taanc the.

¹⁴Muhzwng Hagai lev Zekaria rui katiu thaulouna Jihudimei gaanvthaih nunc rui Ravkai taanv tei katumcna tat key the. Isarael Racguangc, Sairas, Darias khatni Arthasastha tuang latdanv theilayna kaniw rui Ravkai tei taanc luai the.

¹⁵Guanghdaihmei Darias tuang charukmei kwm Adar bw tuang zaeng neih thumhpui nungc kaniw rui Ravkai tei taanc luai the.

¹⁶Khoutei Isaraelmei nunc amuh nunc, Levimei nunc, khatni hanc guang datmei meic guay na tei rui neihlana Ravkai tei kat gut the.

¹⁷Katgutmei tuang puatkat swna guaichic 100, lauziu 200, lauziunac 400 khatni paapc khang Isaraelmei kaikhwang kathuic sing ziuh 12 khaeng the.

¹⁸Jerusalem Ravkai tuang taanv swmei khang amuh nunc khatni Levimei nunc Mousi tuang latrik khou hyloumei theilayna duanclou the.

¹⁹Pat datmei kwm tuang rey liangmei bw khou zaeng 14mei nungc hanc guang datmei guay tei Kaanpatmei Ngai ngay the.

²⁰Amuh nunc khatni Levimei nunc tei kaniw ta sw nthan the kumna kaniw kaguayna nthan the. Levimei nunc tei rui hanc guang datmei nunc, amuh nunc khatni kaniw khang Kaanpatmei Ngai tuang khaeng nimei khouringc guay tei swluai the.

²¹Kangmei khou rui hanc guang datmei Isaraelmei guay khatni rav baih baihmei ta kalummei panty tei ganclou lana RINGHPOUC Isarael Racguangc ta guangna kalummei mi kandic khou lungc bammei meic baihmei guay rui ni mi khaengmei zanc tei tu the.

²²Kumna kaniw Khay lou makmei Ngai tei zaeng chanei ngay the. Kaniw tei neihlamei padik the kalam thu RINGHPOUC rui Asiriamei guanghdaihmei ta sinswlouna mi guangc tei rui matunglouna Isarael Racguangc tuang Ravkai tei kasiamh thaulou dat the.