Read Rongmei Naga EZRA 7 Bible Online

EZRA 7 - Rongmei Naga bible

EZRA 7

¹Tingkwm mpeyna tangv, Arthasastha rui Persiamei guanghdaihmei swmei douc Ezra twna kawmeipu gaanv khat nai khwan e. Kamei hei kapu kapouc Tingkuh Aron khou heikumna suiclou e: Ezra hei Serai nac e, Seraia hei Azaria nac e, Azaria hei Hilkia nac e, Hilkia hei

²Shallum nac e, Shallum hei Zadok nac e, Zadok hei Ahitub nac e, Ahitub hei Amaria nac e,

³Amaria hei Azaria nac e, Azaria hei Meraiot nac e, Meraiot hei

⁴Zerahia nac e, Zerahia hei Uzzi nac e, Uzzi hei Bukki nac e, Bukki hei Abishua nac e,

⁵Abishua hei Phinehas nac e, Phinehas hei Eleazar nac e, Eleazar hei Aron nac e.

⁶Sa bammeipu Ezra hei Babilon thangc rui guang khwan e. Ezra hei Riakdanv nchamloumeipu, RINGHPOUC, Isaraelmei Racguangc rui Mousi khou tiiloumei Riakdanv tei thay mincna thaymeipu e. Ezra ta RINGHPOUC kaRacguangc rui suaihiamlou timei zaeng rui, kamei rui neymei guayna guanghdaihmei rui tii the.

⁷Arthasastha rui guanghtumei tuang chaneimei kwm Ezra rui amuh nunc, Levimei nunc, Ravkai khou ludowmei nunc, Ravkai rigaanv nunc, khatni taanvtaanhmei nunc kazauhmei Isaraelmei kang akhat ta nduanghna Babilon khou rui Jerusalem tat khang kaamc thau the.

⁸Guangh rui guanghtumei chaneimei kwm tuang panguhmei bw khou Ezra rui Jerusalem khou guang tangc the.

⁹KaRaguangc rui kata gayna nduanghloumei paan rui reymei bw tuang reymei tingmik nungc Babilon khou rui kaamc thauna panguhmei bw tuang reymei tingmik nungc Jerusalem khou guang tangc the.

¹⁰Ezra rui RINGHPOUC tuang Riakdanv tei taanh khang khatni mi khou tei dincloumei latdanv khatni riak guay Isaraelmei nunc khou dinclou khang lungh gutna kathai the.

¹¹Mi hei Arthasastha rui amuh khatni Baibal nchamloumeipu, RINGHPOUC rui Isaraelmei khang tiiloumei latdyn khatni latdanv guay tei thaymeipu Ezra khou tii guangmei latdyn e:

¹²“Guanghdaihmei Arthasastha khou rui amuh khatni Tingkauh Racguangc tuang latdanv nchamloumeipu Ezra khou tiimei.

¹³“Ai rui latdanv tii the twmei thu atuang guanghdic kapwm khou bammei Jerusalem thangc tat dat nimei Isaraelmei kaguayna amuh nunc, Levimei nunc meic guayna ta nang nduangh tat nuh the.

¹⁴Nangniw Racguangc rui nangniw khou nsinloumei latdanv tei adih piu chuyna bam bu cho twmei thay khang Juda khatni Jerusalem tuang lwnlung kathai khang ai khatni atuang latdinhpouc nunc gaanv chanei rui nang ta ndiuloumei tuang the.

¹⁵Isarael Racguangc, katuang Ravkai Jerusalem khou naimei Ravguangc khang ai khatni atuang latdinhpouc nunc rui tii nimei daandi khatni kachaekc puatkat hei phungc tat nina the.

¹⁶Babilon ramv kapwm khou rui kakha guangmei daandi khatni kachaekc khatni Isaraelmei nunc khatni amuh nunc rui Jerusalem khou naimei kaniw Ravguangc tuang Ravkai khang tii guangmei puatkat guay tei phungc tat tho.

¹⁷“Nang mi syandui guay hei piu chuyna piu nina e kumna guaichic nunc, lauziuchic nunc, lauziunac nunc, nap-bi, khatni drakhadui liuna Jerusalem Ravkai tuang ravchapaeng khou katlou o.

¹⁸Kumna piu nsaekcloumei daandi khatni kachaekc tei nangniw Racguangc rui chwnmei theilayna nang khatni nang kandihmei nunc rui piu nii niimei bamv khou piu tho.

¹⁹Ravkai khou sinsw khang nang khou tiilou kanmei kuak guay tei Jerusalem khou Ravguangc khou katlou nina e.

²⁰Kumna baih baihmei Ravkai khang kage naimei guay tei guangh tuang lanv khou rui laa nina the.

²¹“Tingkauh Racguangc tuang Riakdanv nchamloumeipu khatni amuh sw bammei Ezra rui nangniw khou kage naina sa pwkhou hei tei lungh gutna tiipat nina e, mi latdanv hei guangh Arthasastha ai rui duipaengc ramv khou lungc bammei guay khou tii patmei tuang e.

²²Daandi talent 100, gehu kor 100, drakhadui bath 100, Olive thauc bath 100 khatni ntey kasing kaling thay mak khe.

²³Tingkauh Racguangc rui katuang Ravkai khang kage naimei kaguayna tei nangniw tii nina the, kumna kamei rui aruc khou hamh e thei atangv thangc guanghtu dat nimei nunc ruc khou kalungpuam keylou mak khang sw nina the.

²⁴Nangniw rui amuh nunc, Levimei nunc, ludowmei nunc, rigaanv nunc, taanvtaanhmei nunc, khatni Ravkai khou kadam naimei guayna khou tei rui dihkhav laa lak nina e.

²⁵“Ezra, Euphratis Neihkey ramv khou bammei Ravguangc tuang latdyn khou lungc bampui mei nunc ta tei sin khang, Ravguangc rui nang khou tiiloumei ningting tei sinswna dihsinpouc nunc khatni latzanpouc nunc suamclou o. Ravguangc tuang latdyn tei thay makmei guay khou nang rui dinclou nina e.

²⁶Thow pwni nang Racguangc tuang latdanv hamh e thei mi guanghdic tuang latdanv tat mak ge thei mi kumhpui mei ta tei thu swluaina bu ny, ginramc thangc nthau gancna bu ny, karamv kadui asutna bu ny, hamh e thei kang bangclouna bu ny katumcna dandi tii nina e.”

²⁷Ezra rui sa the, “RINGHPOUC, aniw pupouc Racguangc ta thuanc e! kamei rui guangh ta RINGHPOUC tuang Jerusalem Ravkai ta heikumna chakhwang tiswlou the.

²⁸Kazauzian paan rui guanghdaihmei rui, katuang latdinhpouc nunc rui khatni ngamv naimei katuang meicdaihmei guay rui ata zauc nzianlou the; RINGHPOUC aRacguangc rui ata tibauclouna ai rui Isaraelmei puinac kapy swmei mpeyna ta athei nduangh guang dat khang kaw pat ngam dyng the.”