Read Rongmei Naga EZRA 8 Bible Online

EZRA 8 - Rongmei Naga bible

EZRA 8

¹Mi hei Arthasastha rui guangh swna bammei douc Babilon khou rui Jerusalem khou Ezra thei hanc guang datmei kaikhwang puinac nunc tuang kapy nunc e:

²Phinehas puinacmei Gershom, Ithamar puinacmei Daniel, David puinacmei Shekania rui puanhmei Hattus,

³Paros puinacmei Zekaria, kakaikhwangmei nggaanvmei 150 lev (kaniw pupouc kin hyloumei tuang nai e).

⁴Pahat Moab puinacmei Zerahia rui puanhmei Eliehoenai lev meic 200

⁵Zattu puinacmei Jahaziel rui puanhmei Shekania lev meic 300

⁶Adin puinacmei Jonathan rui puanhmei Ebed lev meic 50;

⁷Elam puinacmei Athalia rui puanhmei Jeshaia lev meic 70,

⁸Shephatia puinacmei Mikael rui puanhmei Zebadia lev meic 80,

⁹Joab puinacmei Jehiel rui puanhmei Obadia lev meic 218,

¹⁰Bani puinacmei Josiphia rui puanhmei Shelomit lev meic 160,

¹¹Bebai puinacmei Bebai rui puanhmei Zekaria lev meic 28,

¹²Azgad puinacmei Hakkatan nac mpouh Johanan khatni kamei nunc lev meic 110,

¹³Adonikam puinacmei Eliphelet, Jeuel khatni Shemaia lev meic 60, (kaniw guang nkhamhmei e),

¹⁴Bigvai puinacmei Uthai khatni Zakkur lev meic 70.

¹⁵Ai rui meic guayna ta tei Ahava kaidai khou luangcloumei duithuak daeng khou tei khuam kaduai guangna aniw mi khou tei zaeng neih thumh zypui swna ziplou the. Mi pang khou tei amuh nunc ariw the, tiki Levimei thu maek khe.

¹⁶Ai rui kapy swmei gaanv chakiu: Eliezar, Ariel, Shemaia, Elnathan, Jarib, Elnathan, Nathan, Zekaria, khatni Meshullam hei nunc ta khatni dinhpouc gaanv nei Joiarib lev Elnathan ta ni kaw guang the.

¹⁷Kasiphia khou bammei nunc tuang kapy Iddo khou khatni kapammei nunc khou Ravkai khou Ravguangc siamruai swmei khang maansei ney o twna ai rui kaniw ta thouclou the.

¹⁸Ravguangc zauzian paan rui kaniw rui Sherebia twna kawmeipu, ramh ngammeipu, Levimei Mahli puinacmei gaanv khat ta thouc guang the. Kanac mpouh khatni kachana gaanv 18 ta kamei rui nduangh guang the.

¹⁹Kaniw rui Merari puinacmei Hashabia khatni Jeshaia kaney ta kaney kai kaikhuncmei nunc lev thouc guang the.

²⁰Mi ruc khou tei rui David khatni katuang meicdaihmei nunc rui Levimei nunc ta nkhavlou khang swloumei nunc kikta Ravkai taanvtaanhmei gaanv 220 ni thouc guang kazauh the. Kaniw guayna zanc tei hy keylou the.

²¹Munthiangcna Ravguangc hu khou niamh keyna kamei rui aniu chaenglwan khou zaylou khang khatni aniu ta, aniu nac nunc ta khatni aniu tuang puatchei guay ta gaeklou khang ney tho twna ai rui kaniw khou Ahava duithuak daeng khou latdanv pat the.

²²Aniw ta aniw chaenglwan khou zauczihmei nunc khou rui gaeklou khang takuanh ricmei kang akhat tiilou o twna guanghdaihmei khou ney khang ai zakna ney mak ge, kalam thu aniw tuang Racguangc rui kata lwmloumei kathuicna ta gaeklou puni khatni kakhou rui karih ntheina tatmei kathuicna ta kamei neihla mak ge khatni dandi tii e twmei ai rui kakhou salou kan the.

²³Hei zaeng rui, aniw ta gaeklou khang khatni aniw rui huayneymei dawlou khang aniw munthiangcna huayney khwan e.

²⁴Kapy swmei amuh nunc gaanv 12 pang khou rui ai rui Sherebia, Hashabia, khatni baihmei gaanv ruh ta kadah pat the.

²⁵Ravkai khou piu khang guanghdaihmei, katuang latdinhpouc nunc khatni meicdaihmei nunc, khatni Isaraelmei guay rui tii guangmei daandi, kachaekc khatni laibung lairiu guay tei karith nthau the, kumna mi guay tei amuh nunc khou tiilou kan the.

²⁶Ai rui kaniw baanc khou daandi talent 650, daandi tuang na rui talent 100 khatni kachaekc talent 100 nthauna tiilou the.

²⁷Kachaekc lev nchamhmei manv khou tamkuak 20 khatni tanzinc tuang tamkuak kanei,

²⁸Ai rui kaniw khou sa the: “Nangniw khatni katguangloumei daandi khatni kachaekc tuang laibung lairiu guay hei RINGHPOUC, nangniw pupouc nunc Ravguangc khang nthanmei the.

²⁹Ravkai guang tangh mak saanv nangniw rui mi guay ta tei gaek chuy nina the. Guang tangc pwkhou mi guay hei amuh nunc kailangv khou tei karith nthau lana amuh khatni Levimei kapy nunc, khatni Jerusalem khou bammei Isaraelmei kapy nunc khou mi guay hei nsinlou tho.”

³⁰Kumna daandi, kachaekc, khatni laibung lairiu guay tei Jerusalem Ravkai khou phungc guang tangh khang amuh nunc khatni Levimei nunc rui kaniw thouc sw kan the.

³¹Reymei bw tuang zaeng 12mei nungc aniw Ahava duithuak khou tei rui kaamc thau dat the. Aniw tuang chaenglwan khou zauczihmei nunc rui adow nimei khatni nchwanna sw nimei guay khou rui Ravguangc rui aniw ta gaeklou the.

³²Aniw Jerusalem guang tangc pwkhou, aniw zaeng neih thumh nthaekc the.

³³Kumna zaeng padeihpui nungc, aniw Ravkai thangc tatna daandi, kachaekc khatni laibung lairiu guay tei karith nthauna mi guay tei Uria rui puanhmei amuh Meremot khou nsinlou kan the. Khoutei kadaeng khou Phinehas rui Eleazar khatni Levimei gaanv nei Jeshua puinacmei Jozabad khatni Binnui rui puanhmei Noadia ni bam khwan e.

³⁴Kaguayna tei kasing pac lana karith nthau the, kumna kadyng khou rui mi guayna tuang sing tei nthuihna chanclou the.

³⁵Isarael Racguangc khou rawna khaeng khang hanc guang datmei guay tei rui kaniw tuang puatkat phungc guang the. Kaniw rui Isaraelmei guay khang guaituamchic 12, lauziuchic 96 khatni lauziunac 77 khaeng the; kaniw rui kaniw tuang paap sw nthan khang ziuh 12, ni khaeng the. Mi guay hei mai nteina RINGHPOUC khang khaeng the.

³⁶Kaniw rui guanghdaihmei rui hyloumei che tei laa patna mi douc tei kaniw ta khatni Ravkai khou kalummei ta matungna bammei Euphratis Neihkey ramv tuang guanghkhyn khatni meicdaihmei nunc khou tei tiilou the.