Read Rongmei Naga EZRA 9 Bible Online

EZRA 9 - Rongmei Naga bible

EZRA 9

¹Mi guay hei taanc tang pwkhou, Isaraelmei tuang kapy nunc gaanvsaekc guangna Isaraelmei nunc, amuh nunc ni, Levimei nunc ni kaniw daeng khou lungc nkuay bammei nunc Ammonmei, Moabmei, Izipmei, Kanaanmei, Hittimei, Perizimei, Jebusimei, Amormei hei nunc hei kariu karana lungc bam de twna poulou the. Meic nunc rui sw bammei chanymei taanv tei kaniw ni sw bam muay di the.

²Jihudimei nggaanvmei nunc rui zaatc baihmei luc nunc ta kaw the, heikumna Ravguangc tuang nthanmei nunc ta kaniw rui sw mphuam the. Kapy nunc khatni meicdaihmei nunc hei nkhuaimei khou kapy nunc the.

³Ai heitei chu pwkhou alung kabiuna aphey siatkaek the. Asam, amwanghiw phuai gancna, lungh kabiuna dungc key the.

⁴Tingzyn khaengmei ganv guang tangh mak saanv lungh kabiuna mi khou tei dungcna bam the. Meic guayna hanc guang datmei nunc paap lam khou Isarael Racguangc rui samei tei chu lana pingna bammei guay tei adaeng khou guangna ding nkuay bam the.

⁵Tingzyn khaeng nimei ganv tei guang pwkhou ai mi bamv khou tei rui thau the, kumna atuang siatkaekmei pwan tei piuna, ai khuksun keyna RINGHPOUC aRacguangc khou abaanc haamvthauna kalum the.

⁶Ai rui sa the, “He Ravguangc, nang hu khou ai apy ngangc thau khang zak the. Aniw tuang paap hei aniw hyang thum the; tingpuk khuan tangc the.

⁷Aniw pupouc nunc kin khou rui thauna ntaw nganv aniw nang mei nunc hei paapc daicna taanc the. Aniw tuang paap guay zaeng rui aniw, aniw tuang guangc nunc khatni aniw tuang amuh nunc zaatc baihmei guangc nunc baanc khou keylou the, kumna aniw ta dowluai the, aniw tuang kwam laa the, khatni kangmei swna nym tat the. Aniw ta zaw tisilou the, aniw aseic lungc bammei lwnlung hei kumcna.

⁸RINGHPOUC aniw Racguangc, matat akhat khang aniw ta zauc nzianlouna aniw ta bangh khou rui tiduaklouna mi nthanmei bamv khou hei giuga makna bam the. Aniw bangh sw bammei khou rui ntaw thu aniw khang panty kathanc tiilou dat the.

⁹Aniw bangh sw bam khwan e, tiki nang rui aniw ta bangh swna ganclou mak ge. Nang rui Persia tuang guanghdaihmei ta aniw ruc khou tizauc nzianlouna aniw ta mi bamv khou tilungclou dat the khatni sw kasic karoucloumei Ravkai tei tikasiamh thaulou datna aniw Juda khatni Jerusalem khou giuga makna bam e.

¹⁰“Mi lwnlung khou hei tabui lat sa nina tha! he aniw Racguangc, nang latdanv guay aniw ganc pat dyng the.

¹¹Nang tuang siamruaimei muhzwng nunc khou rui Nang rui gutlaa nimei kandic hei nthanmakmei e, kalam thu mi khou tei lungc bammei maansei nunc tei kabamv kathuicna khou simei taanv rui padik the twna aniw khou salou khwan e.

¹²Aniw rui mi kandic ramgai guay tei laa nii e thei kumna mi hei aniw tounac nunc khang tingsaengzaeng khang tiilou nii e thei aniw rui kaniw tei lev nowkaw-nahlaa kary lak nina e khatni kaniw lungcgay chingkhiuh khang nkhavlou lak nina e twna ni kaniw rui aniw khou dinclou khwan e.

¹³Aniw tuang paap guay khatni khuay guay khang aniw khang tiimei dandi aniw ariw tang sini, aniw tuang Racguangc, nang rui aniw ta riaplou biuhmei zu tei riaplou makna aniw ta tiringclou bam e twmei aniw thay e.

¹⁴Kum e tw e thei akumhna aniw rui nang tuang latdanv guay tei thouh swlou makna mi meicsimei nunc hei lev nowkaw-nahlaa kary bam nina cho? Aniw rui kum bam e thei, nang lungpuamcna aniw ta swmaan mutsutlou puni the kumna meic gaanv khat na ta sini tiringclou bam ni tuang hamh the.

¹⁵RINGHPOUC Isarael Racguangc, nang hei nchumhmeipu e, kum khwan sini nang rui aniw ta tiringclou the. Aniw rui aniw khuay nang khou kalauh the; aniw hei nang hu khou guang khang biuh mak khe.”