Read Rongmei Naga NEHEMIA 1 Bible Online

NEHEMIA 1 - Rongmei Naga bible

NEHEMIA 1

¹Mi hei Hakalia rui puanhmei Nehemia rui taanclou kanmei taanv chakh ge. Arthasastha rui Persia guangcdic tuang guanghdaihmei swmei tuang 20mei kwm Kislev bw khou Nehemia ai, Persia guangcdic tuang guangh kaidai Susa khou bam khwan e.

²Khoutei achana swmei gaanv khat Hanani twna kawmeipu meic gaanvsaekc ta nduanghna Jerusalem thangc rui guang khwan e. Jerusalem lam khou khatni Babilon khou rui hanc guang dat kanmei aniw Jihudimei nunc lam khou ai rui kaniw khou thanv khwan e.

³Khoutei ringc bam duhmei nunc khatni hanc guang datmei nunc tei kungc sihna bam e khatni kaniw daeng khou lungc nkuay bammei zaatc baihmei nunc rui kaniw ta malana bam e twna kaniw rui akhou raclou the. Jerusalem tuang raengc guay pangv ngamna ganclou bam di he khatni raengh kaikhamv guay tei ni mai nteiloumei tangv tei kasiamhlou dat mak he twna ni kaniw rui raclou the.

⁴Mi guay tei chu pwkhou, ai dungc keyna kap the. Tingmik ramhbiuc dou ai azaengsina tuzangv makna kapna bam khwan e. Ai rui Ravguangc khou kumna huayney the,

⁵“He RINGHPOUC tingkauh Ravguangc! Daihmei meicpingmei Racguangc! Nang ta nzianmei khatni nang tuang latdanv piumei nunc khou kalatdyng suai zat makna bammeipu,

⁶nang bangc Isaraelmei khang zingbangc kalaanv huayneyna bammei ati hei zauclou o khatni ai rui neymei chulou o. Ai khatni Isaraelmei aniw rui nkhuai loumei guay nang hu khou kalauh e. Aniw pupouc nunc khatni ai rui paapc taanc the.

⁷Aniw nang nuh makmei simei taanv taanc the khatni nang tuang latdanv piu mak khe. Nang bangc Mousi khou nang rui tii guangmei latdanv guay tei aniw piu mak khe.

⁸‘Isaraelmei nangniw akhou lwm nuh mak ge thei, ai rui nangniw ta zaatc pang khou zin phaklou puni.

⁹Tiki nangniw akhou karih guang datna atuang latdanv guay tei piu dat re thei, nangniw ta kandih tintou nganv zin phaklou sini ai rui nangniw kalummei bamv khang kadahloumei bamv khou hei phungc guanglou dat puni’ twna nang bangc Mousi khou kadyloumei tei ntaw ningtowlou o.

¹⁰“He RINGHPOUC, kaniw hei nang bangc nunc e, nang mei nunc e. Nang tuang daihmei ngamv khatni pumtan rui nang rui kaniw ta kan patlou the.

¹¹Ntaw hei ai rui huayneymei khatni nang ta chakhwang champouh swmei nang bangc nunc rui huayneymei hei chulou o. Ai rui karamc bammei hei aseic hei tiguang tangclou o kumna guanghdaihmei rui ata zauc nzianlou khang tiswlou o.” Mi douc tei ai guanghdaihmei tuang zouh sinmei sw bam khwan e.