Read Rongmei Naga NEHEMIA 12 Bible Online

NEHEMIA 12 - Rongmei Naga bible

NEHEMIA 12

¹Kabangc khoumei amuh nunc khatni Levimei nunc hei Shealtiel rui puanhmei Zerubbabel lev Tingkuh Joshua thei Babilon thangc rui guang datmei nunc e.

²Amuh nunc: Seraia, Jeremia, Ezra, Amaria, Malluk, Hattus, Shekania, Rehum, Meremot, Iddo, Ginnethon, Abija, Mijamin, Maadia, Bilga, Shemaia, Joiarib, Jedaia, Sallu, Amok, Hilkia, khatni Jedaia. Mi nunc hei Joshua ganv khou amuh pang khou kapy swmei nunc the.

⁸Levimei nunc: Jeshua, Binnui, Kadmiel, Sherebia, Juda, khatni Mattania hei nunc hei thuanckumei lu suan khang kathouc swmei nunc e.

⁹Bakbukia, Unno, khatni kaniw pammei Levimei nunc rui suan adangvmei kang sw the.

¹⁰Joshua hei Joiakim pu e; Joiakim hei Eliasib pu e; Eliasib hei Joiada pu e;

¹¹Joiada hei Jonathan pu e; khatni Jonathan hei Jaddua pu e.

¹²Joiakim rui amuh swna bammei douc, kabangc khoumei amuh nunc hei amuh puinac nunc tuang kapy nunc the: [Amuh] — [Puinac] Meraia — Seraia Hanania — Jeremia Meshullam — Ezra Jehohanan — Amaria Jonathan — Malluki Josep — Shebania Adna — Harim Helkai — Meraiot Zekaria — Iddo Meshullam — Ginnethon Zikri — Abija ... — Miniamin Piltai — Moadia Shammua — Bilga Jehonathan — Shemaia Mattenai — Joiarib Uzzi — Jedaia Kallai — Sallai Eber — Amok Hashabia — Hilkia Nethanel — Jedaia

²²Eliasib, Joiada, Johanan khatni Jaddua rui Tingkuh sw bammei douc Levimei khatni amuh kaikhunc nunc kapy nunc zanc tei hykeylou khwan e. Darias rui Persia guangcdic tuang guanghdaihmei sw bammei douc rui mi chakh tei hy luai khwan e.

²³Tiki Levimei kaikhunc kapy nunc tei Ki buk khou Eliasib tou Johanan hak nganvna kha hylou khwan e.

²⁴Hashabia, Sherabia, Jeshua, Binnui, khatni Kadmiel rui zayloumei bangc khou Levimei nunc tei kaphwam kaphwam swna kasiamhlou the. Kaphwam kanei rui adangvna Ravguangc mei David rui dincloumei thei layna Ravguangc ta thuancna khatni thuanckuna suan the.

²⁵Ravkai rigaanv Mattania, Bakbukia, Obadia, Meshullam, Talmon, khatni Akkub hei nunc hei rui Ravkai raengcmun daeng khou naimei ramh rypuikai guay tei gaek the.

²⁶Mi nunc hei Joshua rui puanhmei, Jehozadak tou, Joiakim khatni guanghkhyn Nehemia, latdanv nchamloumeipu amuh Ezra kaniw zuk khou lungcloumei nunc the.

²⁷Jerusalem kaidai raengc tei katgutpui kaan khou, nrah zayna thuanckumei lu suan nimei Levimei nunc ta kaniw bamv bamv khou rui Jerusalem khou phungc guang the.

²⁸Lu suanmei Levimei kaikhunc nunc tei kaniw lungc bam bammei Jerusalem daeng haengvmei khou rui khatni Netopha daeng haengvmei khou naimei kaidai guay khou rui,

²⁹khatni Beth-gilgal, Geba, khatni Azmavet kaidai khou rui guang kaduai the.

³⁰Amuh nunc khatni Levimei nunc rui kaniw rana sw nthan lana, meic nunc ta, raenghmun guay ta, khatni kaidai raengc ta sw nthanmei taanv taanc the.

³¹Ai rui Juda tuang kapy nunc ta raengh ruc khou kaw guang kaduai the kumna Ravguangc ta thuanckuna mi kaidai ta tei tat nkuay khang kaniw ta tei kakang kanei khang damclou the. Kakang akhat rui raengh ruc khou tei baanzat biak Mphuammei Raenghmun biak tat pat the.

³²Hoshaia rui lu suanmei nunc thei khou tat the, kumna mi thei khou tei Juda tuang kapy nunc kakang akhat rui lwan tat the.

³³Azaria, Ezra, Meshullam,

³⁴Juda, Benjamin, Shemaia, khatni Jeremia,

³⁵kaniw thu khou tei amuh nac nunc asaekc bianggun amuanna lay tat the. Mi nunc kiu thu Jonathan nac mpouh Zekharia, kamei hei Shemaia rui puanhmei e. Zekaria pupouc hei Mattania, Mikaia khatni Asap puinacmei Zakkur hei nunc hei e.

³⁶Kathei khou kakai puinacmei nunc Shemaia, Azarel, Milalai, Gilalai, Maai, Nethanel, Juda, khatni Hanani, kaniw hei Ravguangc mei Guangh David rui sinmei lu suan khou dowmei na guay sinna tat the. Ezra rui mi kang ta chaengzay the.

³⁷Duipuakkai Raengcmun khou rui David kaidai nganghmei ngaengv tei tat ngangh datna, David tuang guangckai tat ruan gut the kumna neihpat biak thangc Dui Raengcmun khou guanglou dat the.

³⁸Thuanckumei kang akhat tei raengh ruc khou tei mbai biak thangc tat karih the, kumna mi kang akhat thei tei ai ni lay tat the. Aniw Maimangh Rigaanvkai tat kaanna raenghmun Daihmei khou tei patlou the.

³⁹Hei khou tei rui Ephraimmei Raengcmun, Jeshana Raengcmun, Khav Raengcmun, Hananel tuang Rigaanvkai, Phay khat tuang Rigaanvkai hei guay hei tat ruan guangna Lauziu Raengcmun khou guang tangclou the. Aniw lwan guangmei tei Ravkai raengcmun daeng khou luailou the.

⁴⁰Heikumna Ravguangc ta thuanckuna lwan tatmei kang kanei tei Ravkai daeng khou guang dat tangc the. Ai rui nduangh tatmei kapy nunc na tei hamhna,

⁴¹Eliakim, Maaseia, Miniamin, Mikaia, Elioenai, Zekaria, khatni Hanania mi amuh nunc hei bianggun amuanna tat the;

⁴²kumna kaniw thei khou tei Maaseia, Shemaia, Eleazar, Uzzi, Jehohanan, Malkija, Elam, khatni Ezar hei nunc hei luan tat the. Lu suanmei nunc tei Jezrahia rui kapy swna, ngammei kasang kaucna tat the.

⁴³Mi nungc tei kaniw ravkhaengmei tei khaeng dai khaeng the, khatni meic nunc tei neihlamei rui padik the, kalam thu Ravguangc rui kaniw ta tineihlalou the. Ntu-pangna khatni alauc nunc ni mi ngai khou tei kazauh the, kumna kaniw rui sw bammei khwan tei duh duh thangc sini chu tangc the.

⁴⁴Ravkai khou puatkat kat guangmei guay kadam ruh tuang akhat, khatni tingkwm khou nthai luan reymei tingthai khatni nap-bi guay kazauhna, kat guangmei guay tei loumei bamv tuang kathouc sw nimei nunc khang ni lou the. Riakdanv theilayna meic nunc rui amuh nunc khatni Levimei nunc khang puatkat tii guang nimei tei kaidai kaidai daeng khou naimei laupuk laupuk khou rui kakha tatmei tei mi nunc tuang thouc sw khang e. Judamei meic guayna rui amuh nunc khatni Levimei nunc ta pian khwan e,

⁴⁵kalam thu Ravguangc tuang latdanv theilayna kaniw sw nthanmei tuang taanv khatni baih baihmei kalummei tuang taanv taanc bam khwan e. Ravkai tuang lu suanmei nunc khatni Ravkai rigaanv nunc tei ni Guangh David khatni kanac Solomon rui kasiamhloumei riak theilayna kaniw tuang thouc taanc bam khwan e.

⁴⁶Guangh David khatni ludowmei Asap ganv khou rui thauna ludowmei nunc tei rui Ravguangc ta thuanhmei khatni thuanckumei lu suanmei khou zaylou bam khwan e.

⁴⁷Zerubbabel khatni Nehemia ganv khou Isaraelmei guayna rui Ravkai ludowmei nunc khatni Ravkai rigaanv nunc ta makuat khang tingmik kathuic puatkat phungc guang bam khwan e. Meic nunc rui Levimei nunc khang nthanmei puatkat tii bam khwan e, khatni Levimei nunc rui amuh nunc khang tii nimei dam tei tii bam khwan e.