Read Rongmei Naga NEHEMIA 13 Bible Online

NEHEMIA 13 - Rongmei Naga bible

NEHEMIA 13

¹Mousi tuang Riakdanv tei meic nunc khou pac ranvna paclouna bam khou Ammonmei khatni Moabmei ta Ravguangc tuang mei pang khou tikazauh nuh mak ge twmei latbamv tei pac pat the.

²Mi hei Isaraelmei nunc rui Izip khou rui guangmei ganv khou Ammonmei khatni Moabmei nunc rui kaniw khang tu zangv khang tii mak ge twmei zaeng rui e. Isaraelmei ta sianglou khang kaniw rui Balaam khang syan tiina niak the, tiki Ravguangc rui mi syang tei suaihiam tiguanhlou the.

³Isaraelmei nunc rui mi latdanv hei chu pwkhou, zaatc baihmei nunc ta tei kaniw pang khou tibam mak khe.

⁴Ravkai tuang ramh ryloumei tuang guay kathouc swmeipu amuh Eliasib tei Tobia lev kaganv tingsaengc sihna nduangh chuyna bam khwan e.

⁵Nap-bi khatni agaw, Ravkai khou sinswmei nanu, amuh nunc khang tii guangmei puatkat, kadam ruh tuang kat guangmei nap-bi, drakhadui, khatni Levimei nunc, Ravkai ludowmei nunc, khatni Ravkai rigaanv nunc khang katguangmei Olive thauc hei guay hei rylou nimei tuang kai daihmei akhat Tobia rui sinsw khang tiilou the.

⁶Heikumna sw bammei ganv khou tei, ai Jerusalem khou bam mak khwan e, kalam thu guangh Arthasastha rui Babilonmei guangdaihmemei swmei tuang 32mei kwm kakhou ataanv guay poulou khang kadaeng thangc tat dat khwan e. Kanakmei tangv kamei rui nuhloumei theilayna

⁷ai Jerusalem khou guang dat khwan e. Khoutei Eliasib rui Ravkai khou naimei kai daihmei akhat Tobia rui sinsw khang tiilou bam the twmei thay pwkhou ai kaluang the.

⁸Ai alungpuam patna Tobia tuang puat guay tei kaliang pat the.

⁹Mi kai guay tei sw nthan dat khang khatni Ravkai tuang nanu guay, nap-bi katguangmei, khatni agaw hei guay hei lou dat khang ai rui latdanv pat the.

¹⁰Levimei nunc khang kat guang khang swloumei dam tei tii ntangh timakna kaniw tei Jerusalem mpatlouna katuang katuang laupuk thangc lungc tat dat kan the twmei ni ai thay the.

¹¹Ravkai ta ti ntaamvna ganclou bammei zaeng rui ai rui meicdaihmei nunc ta tei luh the. Ai rui Levimei nunc khatni lu suanmei nunc ta tei Ravkai khou kaw guang datna kaniw ta kaniw taanv titaanc dat the.

¹²Khoutei Isaraelmei nunc rui kaniw tuang nap-bi, drakhadui, khatni Olive thauc kadam ruh tuang Ravkai khou phungc guang dat the.

¹³Ai rui amuh Shelemia, Riakdanv nchamloumeipu Zadok, khatni Levimei Pedaia hei nunc ti hei puatkat ryloumei bamv tei sin khang lou the. Zakkur rui puanhmei, Mattania tou, Hanan ta mi nunc ti hei nkhavlou khang thouclou the. Mi nunc hei kaniw khang ramh nzanh khang lwm nuhmei nunc the twmei ai thay the.

¹⁴He Ravguangc, nang tuang Ravkai khang khatni mi khou tei kalum khang ai rui taanc kanmei kaguayna hei ningtowlou o.

¹⁵Mi kaanc khou tei Sabbathneic meic nunc rui drakhadui sunc bammei ta ai how the. Meic gaanvsaekc rui napbi, drakhadui, drakhathai, tadutthai, khatni baih baihmei puat kaniw tuang kuanniam nunc rui phungc lana Jerusalem khou guang bam e; kumhpui zaeng rui Sabbathneic ramhkhat na sini zuanc nuh mak ge twna ai rui kaniw ta sa the.

¹⁶Tur kaidai thangcmei meic gaanvsaekc Jerusalem khou lungc bam khwan e, kumna kaniw rui Sabbathneic kaidai khou zuanh khang kaniw rui khav khatni baih baihmei puat zaat guayna mi kaidai khou phungc guang bam khwan e.

¹⁷Ai rui Jihudimei kapy nunc ta luhna kumna sa the, “Nangniw rui taanc bammei simei taanv hei zauc tho! nangniw rui Sabbathneic ta swtanac the.

¹⁸Ravguangc rui sw kamut kamaimei tiguangna nangniw pupouc nunc ta riap kanmei kiu mi zaeng rui the. Kum bam tisini nangniw Sabbathneic ta swtanacna Isaraelmei ruc khou Ravguangc lungpuam tikeylou hay hay khang swna bam e.”

¹⁹Kumhpui zaeng rui Sabbathneic kahouh ni nungc tingzyn key rap e thei kaidai raengcmun guay mbangh nina the kumna Sabbathneic luai mak saanv laanc dat nuh mak khe twna latdanv pat the. Sabbathneic puat phungc gutmei ta zauh khang ai rui raenghmun guay khou meic lou the.

²⁰Ramh zaat guayna zuanhmei alimei nunc Sabbathneic hu khou zingbangc akhat kanei thu kaidai raengh paengc khou bam the.

²¹“Tinggaanhmei ta nkhwanna mi khou tei bamna nsa de. Nangniw heikumna sw dat re thei nangniw ruc khou baanhkey puni the” twna luhlou the. Mi khou tei rui thauna kaniw Sabbathneic guang dat mak khe.

²²Sabbathneic tei swtanac mak khang Levimei nunc ta tei kaniw pumc sw nthan lana raenghmun guay tei gaek nina e twna ai rui kaniw khou latdanv pat the. He Ravguangc, mi khang rui ata ningtowlou o, kumna nang zauzian daihmei paan rui ata kanduaklou o.

²³Jihudimei meic mpeyna rui Asdodmei, Ammonmei, khatni Moabmei luc nunc ta kaw laa bam the twmei ni ai thay pat the.

²⁴Kaniw nac nunc kalang akhat rui Asdodmei lat khatni lat baihmei sana aniw lat sa thay mak khe.

²⁵Ai rui hei kumhmeipu nunc ti hei luh the, kaniw ruc khou sianglou the, bai the, khatni kaniw sam phuay phungh phunglou the. Kaniw ni, kaniw nac nunc ni zaatc baihmei lev kaw laa dat mak khang ai rui kaniw ta Ravguangc zanc khou latdyng tisw the.

²⁶Ai rui sa the, “Guangh Solomon ta paapc khou tikeyloumei tei zaatc baihmei luc rui e. Kamei hei zaatc baih baihmei guangc nunc suangc daic liangmei guangc e. Ravguangc rui kata nzianna Isaraelmei guayna guangc tiswlou the, tiki kata zaatc baihmei luc rui paapc khou tikeylou the.

²⁷Kum e tw e thei aniw nangniw thei lay luaihna Ravguangc lat piu makna zaatc baihmei luc nunc ta kaw bam nina cho?”

²⁸Joiada hei Tingkuh Eliasib nac mpouh e, tiki Joiada nac mpouh gaanv khat rui Beth Haronmei Sanballat nac aluhpui ta kawmei zaeng rui, ai rui Joiada ta Jerusalem khou rui alay ganc the.

²⁹He Ravguangc, mi nunc hei rui amuh nunc tuang taanv khatni nang lev amuh nunc khatni Levimei nunc kak khou sw kanmei latdyng tei akumhna swtanac kan tu cho twmei ningtowlou o.

³⁰Zaatc baihmei lev kariu karamei tuang guay tei ai rui meic pang khou rui sw nthan pat the. Amuh nunc khatni Levimei nunc ni kaniw thouc thouc thay kan khang kaniw rui taanc nimei thouc tei kasiamhlou the.

³¹Ravkhaeng khou piu nimei thing ni kaganv chana phungc guang khang kaphianhlou the. Meic nunc rui kaniw tuang rey liangmei nap-bi khatni tingthai paannu phungc guang khang ni kasiamhlou the. He Ravguangc, mi guay hei ningtowlou o, kumna mi khang tei ahuat chaklou o.