Read Rongmei Naga NEHEMIA 2 Bible Online

NEHEMIA 2 - Rongmei Naga bible

NEHEMIA 2

¹Nisan bw khou, Arthasastha rui guanghtumei 20 tanghmei kwm khou zaeng neihkhat guanghdaihmei Arthasastha tu zangv bammei ganv khou, ai rui kakhou zouhbuangc puanc guang the. Kahu nungc thu kamei ai neihla makna bammei ta how zat kan mak khwan e,

²kumlana kamei rui akhou “Nang nnau mak ki tabui swna ryanrameilwn kumc bam tu cho? Mi hei lungh ryanra puilwn de,” twna thanv the. Ai kaluang the

³kumna ai rui mundaw the “Guangh ringc saengc o! Apu apouc nunc ta phuploumei kaidai tei sw kasic karouhna khatni mi kaidai raengcmun guay tei mai rui raw ngamna ganclou bam khou akumhna ai neihla ngam nina cho?”

⁴“Nang rui kahawmei kiu tabui tuang sih cho?” twna guanghdaihmei rui thanv the. Ai tingkauh Racguangc khou huayney the,

⁵kumna ai rui guanghdaihmei khou sa the, “Guangh rui ata zauc nzianlouna ai rui neymei hei tiilou nuh e thei, Juda kandic thangc, apu apouc nunc ta phuploumei kaidai tei kasiamh thau dat khang ata titatlou o.”

⁶Guanghdaihmei tei lev kadaeng khou dungc bammei liammavpui tei rui ai rui zaenghuaymei tei nuhlou the. Ai asaanh tat nina cho khatni tabui nungc guang dat nina cho twmei kamei rui akhou thanv pwna ai rui kakhou hei tei dinclou the.

⁷Ai Juda kandic thangc tat nuh khang Euphratis Neihkey kandic tuang guanghkhyn nunc khou zauc nzianna guangh tuang lat hylou o twna ai rui guangh khou ney the.

⁸Isaraelmei rigaanvkai tuang raengcmun guay khang, kaidai raengcmun khang, khatni ai lungc nimei kai khang thing tii khang guangh tuang ngouh ramv sinmeipu Asap khou ni guangh tuang lat hylou khang ai rui ney the. Ai rui neymei guayna guanghdaihmei rui tiilou the, kalam thu Ravguangc rui ata nkhavlou the.

⁹Guanghdaihmei rui rihpy asaekc lev takuanh ricmei kang khat athei thouclouna ai Euphratis Neihkey ramv kandic biak thangc tat key the. Khoutei ai rui guanghdaihmei tuang tatdyn guay tei guanghkhyn nunc khou tei tiilou the.

¹⁰Tiki Isaraelmei nunc khang taanvtaanclou khang meic gaanv khat guang e twmei Beth Horon kaidaimei Sanballat, khatni Ammon ramv khou bammei meicdaihmei Tobia rui chu pwkhou kaney lungpuamc ranvsih thau the.

¹¹Ai Jerusalem khou guang tangcna zaeng neihthumh bamlou the.

¹²Tiki Jerusalem khang taanvtaanh khang Ravguangc rui ata katiu thauloumei tei ai meic gaanv khat na khou sini raclou mak ge. Kumna zipchwng khou thauna apam gaanvsaekc nduanghna tat pat the. Ai tuanghmei kuanniam na tei aniw nduanghna pat the.

¹³Zingbangc thangc ai neihkey biak thangc naimei Nzaengc Raengcmun khou tei rui tat patna dihba biak thangc Thaanngangc duipuakkai tei tat kaan keyna Mphuam tanacmei Raengcmun khou tei keylou the. Kumna tatna tatna pangv keylou bammei raengc khatni mai rawloumei raengcmun guay tei zauc tat the.

¹⁴Mi tangv kaidai tuang neihpat raengc thangc dihpy biak tat karih nganghna Duipuakkai Raengcmun khatni Guangh tuang Zeic khou tei nganghlou the. Ai rui tuanghmei kuanniam tei ntauh ding khou tei tat gut dat khang kachaeng maek khena

¹⁵ai Kidron nzaengc khou key dat the. Ai tatna tatna raengh tei zauc key the. Khoutei rui aniw tat patmei twn tei suic datna Nzaengcbaek Raengcmun chaeng tei rui kaidai lungc khou tei gut dat the.

¹⁶Mi khou tei bammei meicdaihmei gaanv khat na rui sini ai tabui thangc tat kan tu cho khatni ai tabui sw bam tu cho twmei thay mak khwan e. Ntaw nganvmei lungc khou ai rui aniw Jihudimei makaamv amuh nunc, kapy nunc, meicdaihmei nunc, khatni taanv khou tei kazauh pw nimei baih baihmei guay khou sini raclou mak ge.

¹⁷Tiki ntaw thu ai kaniw khou kumna sa the, “Jerusalem hei sw kasic karoucna ganclou bammei zaeng rui khatni mi tuang raengcmun guay hei ra ngamna bammei zaeng rui aniu hei adih ryanra bam tu cho twmei zauc tho. Kaidai raengc guay hei aniu raeng dat di kho kumna aniu zak bammei hei timaan di kho.”

¹⁸Akumhna Ravguangc rui ata nduanghlouna nkhavlou tu cho khatni guanghdaihmei rui tabui salou bu cho twmei ai rui kaniw khou raclou the. “Aniu taanc thau dat di kho!” twna kaniw rui mundaw the. Kumna taanv tei taanc kahouh dat diu khang kaniw chamdaanv the.

¹⁹Aniw rui mi taanv tei sin thau nina bammei tei Sanballat, Tobia, khatni Arabmei Geshem twna kawmeipu kaniw rui chu lana kaniw aniw ta nuicna sa the, “Nangniw tabui sw bam tu cho? Nangniw guanghdaihmei ruc khou rih thau me twna sw bam tu cho?”

²⁰Khoutei ai rui daw the, “Aniw taanc ngam khang tingkauh Racguangc rui aniw ta nkhavlou puni. Aniw hei kabangc nunc e, kumna aniw rui mi kaidai raengc hei kasiamh thau dat puni the. Jerusalem khou hei nangniw tuang ramv maek ge, khatni Jerusalem hei nangniw tuang hamh e.”