Read Rongmei Naga NEHEMIA 4 Bible Online

NEHEMIA 4 - Rongmei Naga bible

NEHEMIA 4

¹Jihudimei aniw rui raengh tei kasiamh thau dat the twmei Sanballat rui chu pwkhou kamei kalungpuamc the kumna aniw ta sinnui thau the.

²Kapammei nunc khatni Samariamei ricmei nunc hu khou kamei rui sa the, “Mi kumhmei suan-simei Jihudimei nunc hei kaniw tabui sw me twna ning lana cho? Kaniw mi kaidai tei kasiamh thau dat khang sw bam lana cho? Kaniw rui ravkhaengloumei paan rui zaeng neih khat lungc khou taanv guay tei luai la diu e twna ning lana cho? Mi raw kasic karoucna ganclou bammei ntauh khwan khou rui kai sw thau diu e twna ning lana cho?”

³Kadaeng khou ding bammeipu Tobia rui kumna sa katynlou the, “Tabui kumhmei raengc na kaniw raengc langc e twna cho? Asacsi na rui sini kaphat ku e thei kapangv siaw kan nimei ta!”

⁴Khoutei ai huayney the, “He Ravguangc, aniw ta sinnui bammei nunc lat tei nkinglou o. Kaniw rui sinnui bammei tei kaniw ruc khou keylou kan diu. Kaniw tuang naimei guay tei ni mei nunc rui asut laa ngam kan diu kumna kaniw ta gin kandic thangc kangmei nunc swna nym tat kan diu.

⁵Kaniw tuang simei taanv guay tei kuaklou riu khatni kaniw tuang paap guay amuclou riu, kalam thu kasiamh thau bammei aniw ta kaniw rui tizak the.”

⁶Kumna aniw nthaekc makna raengh tei kasiamh thau the. Kumna asaanh mak khou kapaek taanc ku tangc nuangc the, kalam thu meic nunc tei taanc niina taanc khwan e.

⁷Aniw rui Jerusalem tuang raengc tei katumcna kasiamh thau bam the kumna phoumei guay tei nkat dat ngam the twmei Sanballat, Tobia, khatni Arabmei, Ammonmei, khatni Asdodmei rui chu lana kaniw lung mpeyna puamc the.

⁸Kumna kaniw kaguayna kariuna Jerusalem ta guang adow khang khatni sw kaguakclou khang karamc the,

⁹tiki aniw huayneyna zingbangc kalaanv rigaanvmei louna gaek the.

¹⁰Mi ganv khou tei Judamei nunc rui suanna bammei lu akhat nai khwan e. Mi kiu thu: “Nritmei kakhaengna aniw ryanra the; pangv keyloumei tauc laaganh khang nai geic di he. Akumhna aniw aseic hei raengh tei kasiamh ngam nina cho?”

¹¹Kaniw rui aniw khou guang rapna aniw ta swluaina raengh tei tikasiamh nthaekc raplou mak saanv kaniw rui sw nina bammei tei thay ni tuang hamh e twna mi zauczihmei nunc hei rui ning khwan e.

¹²Zauczihmei nunc rui aniw ta sw nina bammei chamv tei kaniw pang khou bammei Jihudimei nunc rui aniw khou katupc sihna poulou the.

¹³Kumhpui zaeng rui meic nunc ta buy, baeng, khatni sauhpai tisinna kasiamh luai makmei bamv guay khou tei puinac puinac swna raengh thei khou rigaanv lou the.

¹⁴Meic nunc tei lungh ryanra bammei ta ai howna ai rui kaniw khou khatni kaniw tuang kapy nunc khatni meicdaihmei nunc khou kumna sa the, “Zauczihmei nunc ta ping riu. RINGHPOUC hei adih daihmei khatni meicpingmeipu cho, kumna kamei rui aniu chana punav nunc khang, aniu nac nunc khang, aniu now nunc khang khatni aniu kai khang adowlou bam e twmei amuc riu.”

¹⁵Aniw ta zauczihmei nunc tei kaniw rui aniw ta sw nina sw bammei tei aniw thay the twmei kaniw chu the, khatni kaniw tuang raeng guay tei Ravguangc rui swbaklou ngam the twmei kaniw thay the. Khoutei aniw guayna raengh tei taanc thau dat the.

¹⁶Hei khou tei rui thauna aniw meic kapaek akhat rui taanvtaanc the, kapaek akhat rui rihpwan piuna, buy, nggih, khatni sauhpai sinna rigaanv the. Aniw tuang kapy nunc rui

¹⁷taanvtaanh bammei nunc ta tei matung the. Thing tauh phungc puanc bammei nunc tei ni kabaanc kabiak akhat thangc buy-baeng sinna kabiak akhat thangc rui taanc the.

¹⁸Meic kathuicna kasian khou baengsaeng phungc raph rapna taanc the. Rih guang pwkhou bianggun amuan nimeipu tei adaeng khou bam the.

¹⁹Ai rui meic nunc khou, kaniw tuang meicdaihmei nunc khou, khatni kapy nunc khou sa the, “Aniw hei taanv bamv duc ducna taanc lik sikh sik bammei zaeng rui aniw guay hei khat khat khou rui duc the.

²⁰Kumhpui zaeng rui, nangniw bianggun khwan chu rap e thei adaeng khou guang kaduai tho. Aniu Racguangc rui aniu khang adowlou puni.”

²¹Kumna tingmik kathuic, tinggaanc pat rap khou rui tingzyn gaanchuangcna how mak saanv, meic kapaek akhat rui raengh tei taanc the, kapaek akhat rui buy-baeng sinna rigaanv the.

²²Aniw rui kalaanv taanvtaanc, zingbangc kaidai tei gaek tu bam khang rui taanvpy sinmei nunc khatni kaniw ta nkhavloumei nunc tei mi ganv khou tei Jerusalem khou zip bam nina the twna ai rui kaniw khou sa the.

²³Ai ni, apammei nunc ni, asiamruaimei nunc ni, apumc rigaanv nunc ni zingbangc nganvna pheybaan luak pat mak khe. Aniw meic guayna buy-baeng mpat mak khe.