Read Rongmei Naga NEHEMIA 5 Bible Online

NEHEMIA 5 - Rongmei Naga bible

NEHEMIA 5

¹Kanakmei tangv ntumei ni nggaanvmei ni meic mpeyna rui kaniw Jihudimei makaamv nunc ruc khou sa guang the.

²Gaanvsaekc rui sa the, “Akai thu kaikhunh daic e, aniw tu ringh khang nap maek khe.”

³Baihmei asaekc rui sa the, “Aniw bung khang aniw tuang laupuk, drakhalau, khatni kai sindaanclouna nap-bi pou bam di the.”

⁴Baihmei gaanvsaekc rui sa the, “Aniw tuang lau khatni drakhalau ramvpuan khang syan pouna tii bam di the.

⁵Aniw hei ni Jihudimei muay de chana punav akhat na de. Aniw nac nunc hei ni kaniw nac nunc kumcna kungc muay de. Tiki aniw thu aniw nac nunc ta bangh tisw mak nuh makmei tuang guang the. Aniw nac aluh gaanvsaekc ta thu bangh swna ni zuanc kan the. Aniw thu ramh sw dat kadai khang maek khe, kalam thu aniw tuang laupuk khatni drakhalau guay tei laa ngam kan the.”

⁶Kaniw tuang lat tei chulou pwkhou alungpuamc the kumna

⁷taanv sin thau ni the twna ai dinglou the. Ai rui kapy nunc khatni meicdaihmei nunc ta tei luhna sa the, “Nangniw hei nangniw chana punav nunc ta sintu bam di the!” Mi tuang latbamv tei kaphianh khang ai rui charuangc dai kaw kariuna

⁸kumna sa the, “Aniw rui ngammei kamv aniu chana punav nunc ti hei zaatc baihmei nunc khou rui thuak pat dat khang karamcna thuak pat the. Kumlana ntaw nangniw rui nangniw chana punav nunc ta nangniw bangc ti-mbaihna bam e!” kapy nunc tei reih rei bam the kumna kaniw ramh lat sa khang maek khe.

⁹Khoutei ai rui sa the, “Nangniw rui sw bammei hei nkhuay the! nangniw Ravguangc ta ping nina de kumna nchumhmei taanc nina de. Heikum e tu e thei aniu rui aniu ta zauczihmei zaatc baihmei nunc rui aniu ta sinnui khang kabamv tii mak puni e.

¹⁰Ai rui syandui ni nap-bi ni meic nunc khang tipou pat re, apammei khatni ataanv taanhmei guay ni heikumna tipou pat muay the. Hei guay tei aniu khangc dat khang sa nangh khe.

¹¹Kaniw rui syandui ni, nap-bi ni, drakha dui ni, Olive thauc ni pou kanmei guay tei kuaklou ti tho. Kumna kaniw khou rui laaloumei laupuk, drakhalau, Olive lau, khatni kai guay tei katumcna hanclou dat ti tho!”

¹²Kapy nunc tei rui daw the, “Nang rui samei aniw piu ni the. Mi guay tei aniw hanclou dat ni the, pow guay tei ni laa dat lak khe.” Ai rui amuh nunc ta kaw guangna kapy nunc ta tei kaniw tuang latdyng tei ngaek khang amuh nunc hu khou syangdyng tisw the.

¹³Ai rui atuang sianlang ric patna hei tei kakhuplou the. “Kalatdyng piu makpui mei ta mi phey kakhup kumc Ravguangc rui kakhup ganc puni. Ravguangc rui nangniw tuang kai khatni nangniw tuang naimei katana kakhup ganc puni, kamei rui ramh akhat na sini nsaekclou lak ge” twna ai rui kaniw khou sa the. Khoutei bammei meic kathuicna rui “Kum kan di tho!” twna mundaw the. Heikumna Ravguangc ta thuancku the. Kumna kapy nunc tei kaniw tuang latdyng ngaek the.

¹⁴Arthasastha rui guanghdaihmei swmei tuang 20mei kwm rui thauna tingkwm 32 nganv, ai rui Juda tuang guanghkhyn swmei tingkwm 12 hei akai kaikhuncmei ni ai ni guanghkhyn akhat swna tu nimei taektw tei tu mak ge.

¹⁵Ahu khou guanghkhyn sw kanmei guay tei meic nunc khang kaniw rui puatrith sw khwan e kumna kaniw rui tu zangv khang tingmik kathuic daandi paek riakdei riakdei gut khwan e. Kaniw tuang bangc nunc rui nganvna meic nunc ta sintu khwan e. Tiki ai thu hei tei kumcna sw mak ge, kalam thu ai RINGHPOUC ta ping e.

¹⁶Ai apumtan guay tei raengh kasiamhmei khou gutlou ngam kan the kumna akhang ramhkhat na sini ntaanvlou mak ge. Kumna ataanv taanhmei guay tei ni raengh kasiamh datmei taanv khou taanc muay di the.

¹⁷Lungc nkuay bammei zaatc nunc khou rui guangmei nunc ta tei chak makna Jihudimei kapy swmei nunc kazauhna meic 150 ta ai rui kic tanh tan bam khwan e.

¹⁸Tingmik kathuic ai guaih akhat akhat, kameigaymei lauziu charuk charuk, khatni nruay mpeyna tii tanh tan the, khatni zaeng ruh pum drakhadui thanh tii tanh tan the. Tiki meic nunc khang adih nrit puni cho twmei ai thayna, guanghkhyn akhat khou tii nimei tuang tei akhang tii o twna ai sa mak ge.

¹⁹He Ravguangc, ai rui meic nunc khang taanclou kanmei kathuicna thukh hei ningtowlou khang ai huay e.