Read Rongmei Naga NEHEMIA 6 Bible Online

NEHEMIA 6 - Rongmei Naga bible

NEHEMIA 6

¹Raengh kaikhamv lou luai mak sini raengh tei thu kasiamh luai the, phoumei bamv maek khe twmei Sanballat, Tobia, Geshem, khatni baih baihmei zauczihmei guay tei rui chu the.

²Kumlana Ono nzaengc khou namv akhat khou ariw kho twna Sanballat lev Geshem rui akhou chamv tii guang the. Mi hei kaney rui ata sw kasic khang swmei tuang rouc khwan the.

³“Ai nthukmei taanv taancna bam e, mi khou tei ai key ngam mak ge. Nangney ta ariw tat khang na rui ai ataanv nthaekc ngam mak ge,” twna kaney khou sa o twna ai rui latdiumei thouclou the.

⁴Mi lat kahak tei kaney rui akhou tii guangliang padeih e, kumna tii guangmei kathuic ai rui hei tei kumna daw dat muay muay the.

⁵Sanballat rui katuang panguhmei chamv tei kabangc gaanv khat khou rui tii guang the. Mi tatdyn tei kagwm laanclouna tii guang the.

⁶Khoutei heikumna hylou the: “Nang khatni Jihudimei guay rui rihthau khang sw bam lana nangniw raengh tei swthau dat bammei tuang e twna kainingmei zaat pang khou racna bammei chu e twna Geshem rui akhou raclou e. Nang rui nang ta guangh tisw khang karamc bam the,

⁷Kumna nang hei Juda tuang guangc the twmei Jerusalem khou tikauc pat khang nang rui amuh gaanvsaekc khou choulou bam the twmei ni kamei rui akhou raclou the. Mi chamv guay hei Guanghdaihmei rui suai makna chu kan di the. Hei kumhpui zaeng rui anei ariwna mi lam khou tei kaphianh kho.”

⁸Ai rui kakhou kumna tithay the, “Nang rui sa bammei guay hei saraamhmei lat rana de. Mi guay hei nang rui kasiamhmei lat rana de.”

⁹Mpinna taanv tei ti-nthaekc khang kaniw karamc e. “He Ravguangc, ntaw apumtan titanclou o!” twna ai huayney the.

¹⁰Delaia rui puanhmei Mehetabel tou, Shemaia kakai khou rui tat pat makna bammeipu daeng khou mi ganv khou tei ai tat the. Kamei rui akhou sa the, “Anei tatna Ravkai tuang Nthanmei bamv khou tei kaikhamv mbanghlouna dup nina di the, kalam thu nang ta swluai khang kaney guang puni the. Kadoucha chamei zingbangc akhat khou guangna swluai rap pw nimei tuang di the.”

¹¹Ai rui daw the, “Ai hei pakna nkamh tat bammei zaat hamh e. Ai Ravkai khou nkamhna apanty duak khang sw pwng e twna nang ningna cho? Ai hei tei sw ni tuang hamh e.”

¹²Ai rui kakhanh pwki, Shemaia khou Ravguangc rui kachuclou mak ge tiki Tobia lev Sanballat rui mi lat tei sa khang lanvlou tina sa bammei tuang e twmei ai thay the.

¹³Azanc sw kasicna ata tizakclou khang rui kamei rui ati hei kapinna paapc titaanh khang kaney rui kata niakmei tuang khwan the.

¹⁴Ai rui kumna huayney the, “He Ravguangc, Tobia lev Sanballat rui taanc bammei hei ningtowlou o kumna kaney ta dandi tiilou o. Ata mpin khang sw bammei muhzwngpui Nodia ta tei khatni baihmei muhzwng nunc ta tei ningtowlou o.”

¹⁵Taanv tei zaeng 52 taanc lana Elul bw tuang zaeng 25mei nungc raengh kapwm tei taanc luai the.

¹⁶Aniw daeng khou lungc nkuay bammei zaatc nunc rui mi chamv hei chu pwkhou kaniw zaw maek khe twmei kaniw thay the, kalam thu Ravguangc rui nkhavloumei paan rui mi taanv tei taanc ngammei tuang e twmei meic kathuicna thay e.

¹⁷Taanvtaanc bam saanv tei Jihudimei kapy nunc lev Tobia lat ti alamv bam khwan e.

¹⁸Juda khou bammei meic mpeyna Tobia biak liangc bam khwan e, kalam thu kamei Jihudimei Ara rui puanhmei Shekania nac aluhpui ta kaw khwan e. Mi ruc khou tei rui, kanac Jehohanan ni Berekia rui puanhmei Meshullam nac aluhpui ta kaw khwan e.

¹⁹Tobia rui taancloumei taanv gaymei guay tei chakna meic nunc rui akhou raclou e kumna ai rui samei guay tei ni kaniw rui kakhou poulou dat bam khwan e. Kumna ata mpinmei tuang tatdyn tii guang taek makna bam khwan e.