Read Rongmei Naga NEHEMIA 8 Bible Online

NEHEMIA 8 - Rongmei Naga bible

NEHEMIA 8

¹Chaneimei bw khou Isaraelmei guay tei kaniw tuang kaidai kaidai khou lungc dat ngam the. Mi bw tuang rey liangmei tingmik nungc kaniw meic guayna Jerusalem khou Dui Raenghmun twna kawmei khou naimei sanghbamv khou guang kaduai the. RINGHPOUC rui Isaraelmei khang Mousi khou rui tii guangmei Riakdanv nchamloumeipu Ezra ta Riakdanv buk tei laaguang khang sa the.

²Kumna ntumei, nggaanvmei, khatni kabah thay nuhmei alauc guay lev twna guang kaduaina bammei bamv khou tei Ezra rui hei tei phungc guang the.

³Raengh daeng khou naimei mi sanghbamv khou tei kamei rui mi Riakdanv tei tinggaanc pat rap khou rui kalaanv nganv kaniw khou pac the. Hei tei meic nunc tei rui lungh gutna nking the.

⁴Mi khang tei rui thing rui nravloumei paeng ruc khou Ezra tei ku ding the. Mi khou tei Mattithia, Shema, Anaia, Uria, Hilkia, khatni Maaseia kaniw rui kabaanzat thangc, khatni Pedaia, Mishael, Malkija, Hashum, Hashbaddana, Zekaria, khatni Meshullam kaniw rui kabaandau thangc ding the.

⁵Ezra tei paeng ruc khou tei dingna meic nunc ruc khou kauh taph tapna ding bam tina, meic nunc tei rui kata phaengcna bam the. Kamei rui mi buk tei laanc pat pwkhou kaniw meic guayna ding thau the.

⁶“RINGHPOUC, Daihmei Ravguangc ta thuanc o!” twna Ezra rui sa the. Meic guayna rui kaniw baanc zay thauna “Amen! Amen!” twna mundaw the. Kaniw tangkhungh keyna kaniw zaw kandih sow nkhum khuakh khuak keyna kalum the.

⁷Kaniw tei thau datna kabamv kabamv khou ding bam khou Jeshua, Bani, Sherebia, Jamin, Akkub, Shabbethai, Hodia, Maaseia, Kelita, Azaria, Jozabad, Hanan, khatni Pelaia kaniw rui Riakdanv tei kabah dinclou the.

⁸Kaniw rui Ravguangc tuang Riakdanv tei pacna hanc patlou the, kumna meic nunc tei kabah thay nuh khang kabah ni dinclou the.

⁹Mi Riakdanv buk khou hyloumei tei meic nunc rui chu pwkhou, kaniw lungc heidikamv kabiuna kap the. Kumhpui zaeng rui guanghkhyn Nehemia, amuh Ezra, khatni Riakdanv tei kabah dincloumei Levimei nunc tei rui meic nunc khou tei sa the, “Mi tingmik hei RINGHPOUC aniu Racguangc khang nthanmei tingmik de, kumhpui zaeng rui nangniw kap lak nina de.

¹⁰Ntaw thu nangniw kai thangc tatna ngay tho. Maekmei nunc khang nangniw tuang taektw khatni drakhadui tei tu zangv nzanh tho. Aseic hei aniu Kaipouc khang nthanmei tingmik ge, kumhpui zaeng rui nangniw zaengsi riu. Kaipouc rui nangniw khang tiiloumei ram neihla tei rui nangniw ta titanclou puni.”

¹¹Levimei nunc tei rui tatna meic nunc ta swmrimh rimlou the kumna nthanmei tingmik nungc tei zaengsi lak nina e twna salou the.

¹²Kumna kaniw meic guayna kakai kakai thangc tatna neihla zaenggayna tu the, zangv the khatni kaniw tuang naimei guay tei nzanh the, kalam thu kaniw khou pacloumei lat tei kaniw kabah thay the.

¹³Nthuanh thauna puinac kapy nunc, amuh nunc khatni Levimei nunc lev twna Riakdanv tei kathai khang Ezra daeng khou guang the.

¹⁴RINGHPOUC rui Mousi khou tii guangmei Riakdanv khou tei Chaengkai Ngai khou Isaraelmei guay matat akhat khang swloumei thingnuy kai khou lungc nina e twna dincloumei kaniw ariw the.

¹⁵“Riakdanv khou dincloumei theilayna thingnuy kai kasiamh khang chyngbut thangc kuna alu chy, Olive chy, mirtal thing chy, tadanv chy, khatni baih baihmei thing chy dow tho,” twna kaniw rui mi lat hei Jerusalem khou khatni baihmei kaidai, namvdai guay khou dinc lik the.

¹⁶Heikumna meic geihna thing chy downa kaniw tuang kainam khou, kaimav khou, Ravkai kaimav khou khatni Dui Raenghmun lev Ephraim Raengcmun daeng khou naimei sanghbamv kanei khou zypuikai swlou the.

¹⁷Meicbangc bam tatmei khou rui guang datmei guay tei zypui kai kasiamhna mi khou tei lungc the. Nun rui puanhmei Joshua ganv khou rui thauna aseic nganvmei lungc khou mi hei sw rey liangmei the, kumna meic kathuicna neihla zaenggay the.

¹⁸Mi ngai tuang rey liangmei tingmik nungc rui thauna luaimei nganvna Ravguangc tuang Riakdanv kalang akhat akhat tingmik kathuic Ezra rui pac the. Kaniw zaeng chanei ngay the, kumna zaeng tachatmei nungc Riakdanv khou tei dincloumei theilayna luailoumei taanv taanclou the.