Read Rongmei Naga NEHEMIA 9 Bible Online

NEHEMIA 9 - Rongmei Naga bible

NEHEMIA 9

¹Mi bw tuang zaeng 24mei nungc Isaraelmei nunc tei guang kaduaina khaamseiphey baanvna khatni kaniw py khou mbut louna munthiang khwan e.

²Isaraelmei nunc tei zaatc baihmei nunc khou rui kalang khat patna ding the kumna kaniw paap khatni kaniw pupouc nunc tuang paap kalauh the.

³Khuangh dak kathumh dou RINGHPOUC tuang Riakdanv kaniw khou pac the, khatni mi tangv khuangh dak kathumh kaniw paap kalauhna RINGHPOUC kaniw Racguangc ta kalum the.

⁴Levimei nunc khang ni paeng nravlou khwan e kumna mi khou tei Jeshua, Bani, Kadmiel, Shebania, Bunni, Sherebia, Bani, khatni Kenani kaniw ding bam khwan e. Kaniw RINGHPOUC kaniw Racguangc khou kauc ranvna kalum the.

⁵Levimei Jeshua, Kadmiel, Bani, Hashabneia, Sherabia, Hodia, Shebania, khatni Pethahia kaniw rui kalum khang kabaina kumna sa the: “Dingthauna RINGHPOUC aniu Racguangc ta thuanc o; kata tingsaeng tingsaengzaeng thuanc o! meic kathuicna hym gaanhmei kazanc ta thuanc o, maansei ram thuan na rui biuc zat mak ge.”

⁶Khoutei Isaraelmei nunc rui heikumna huayney the: “He RINGHPOUC, nang na hei RINGHPOUC e; Nang rui tingpuk khatni gaanchuangcna guay damclou the. Nang rui ramkiang, duipui, mi khou naimei kata na ta damclou the; nang rui kaguayna khou ringhmei tiilou the. Tingkauh tuang ngamv guay rui nkhum keyna nang ta kalum e.

⁷RINGHPOUC Ravguangc nang rui Abram ta kadahlou the kumna kata Babilon tuang Ur kaidai khou rui nduangh pat the; nang rui kazanc Abraham twna kalaiclou the.

⁸Kamei nang khou lwm nuhmei e twmei nang thay lana, nang rui kakhou latdyng swlou the. Kanaanmei ramv, Hittimei khatni Amormei ramv, Perizimei, Jebusimei, Girgasimei ramv guay tei kakhang tii ni twna nrianhlou the, kakik kata lungc bammei kandic khang twna. Nang rui nang tuang latdyng tiguang tangclou the kalam thu nang thu suai zat makmeipu e.

⁹“Aniw pupouc nunc Izip khou ryanra bammei ta nang how the; nkhavlou khang Ntou duipui khou rui kaniw rui kauc pwkhou nang rui chulou the.

¹⁰Nang rui Izipmei guangc ruc khou katuang meicdaihmei nunc khatni katuang kandicmei nunc ruc khou charynmei taanv taanclou the, kalam thu kaniw rui nang tuang mei nunc ta rai bammei tei nang thay e. Aseic dincna bammei nang zanc hei mi ganv khou tei rui dinc kanmei tuang the.

¹¹Nang rui nang mei nunc khang duipui chung khou chaeng kasiamhlou the, heikumna ramvkiang swna zay kaanlou the. Kaniw ta nthau keymei nunc tei kamuatc bammei duipui khou ntauh limh kumc limc ngam kan the.

¹²Kaniw ta kalaanv chaeng muangh rui zaylou the, zingbangc kaniw chaeng mai rui tigaanclou the.

¹³Nang Sinai Chyng khou tingkauh thangc rui key the; kumna nang rui nang tuang mei nunc khou lat salou the khatni kaniw khang nchumhmei lunghriak latdanv khatni latdyn gaymei tiilou the.

¹⁴Nang tuang Sabbathneic nthanna ngaek khang nang rui kaniw khou dinclou the kumna nang bangc Mousi khou rui nang tuang latdanv kaniw khang tiilou the.

¹⁵“Kaniw ndaapc pwkhou nang rui kaniw khang tingkauh thangc rui ntyan tii key the, kaniw tari pwkhou taudaic khou rui dui tiilou the. kaniw khang tii ni twna nrianhloumei kandic tei gutna sin tho twna kaniw khou nang rui sa the.

¹⁶Tiki aniw pupouc nunc tei ngangc sangh sang thau the khatni kaniw lung tanc the kumna nang tuang latdanv guay piu mak khe.

¹⁷Kaniw nang lat piu zih the; nang tuang taanv guay kaniw amuc the; nang rui charynmei taanv taanc kanmei guay tei kaniw amuc the. Kaniw lung tancna Izip khou kaniw ta bangh khang zaylou dat khang chaengzayloumei khang kadah the. Tiki nang thu kuakloumei Racguangc e; nang thu zauzian khatni nzianmei rui padik ge, lunghpuamhmei khou nzaeng e. Nang zauzian hei daic e; kumna nang rui kaniw ta mpatlou mak khwan e.

¹⁸Kaniw guaituamchic tuang ravmaengc kasiamh khwan e kumna hei tei kaniw ta Izip khou rui zaypatloumei rav the twna sa khwan e. He RINGHPOUC, kaniw rui nang zaw adih tisilou kan tu cho!

¹⁹Tiki nang rui kaniw ta tazikramv khou tei ganclou mak khwan e, kalam thu nang zauzian hei daic e. zingbangc kalaanv kaniw ta zaylou bammei mai lev muangh tiangc tei nang rui laa ganclou mak khwan e.

²⁰Kaniw rui sw nimei tei nang zauzian paan rui nang rui kaniw khou dinclou khwan e; nang rui kaniw ta manna titulou khwan e, khatni zangv khang dui tiilou khwan e.

²¹Tingkwm 40 tazikramv khou kaniw khang kage naimei guay nang rui tiilou khwan e; kaniw tuang pheybaan kaek zat mak khwan e, kaniw phay ni tat puamh mak khwan e.

²²“Nang rui nkhavloumei paan rui kaniw rui zaatc baihmei nunc ta, guanghdic nunc ta khatni kaniw daeng khou lungc nkuay bammei guangcdic guay ta ngamna laa the. Guangh Sihon rui sin bam khwanmei kandic Heshbon khatni Og rui guangh sw bam khwanmei Bashan kandic ta kaniw rui ngamna laa the.

²³Nang rui kaniw khang kaniw tunapuan tingpuk khou naimei gaanchuangcna zu tigeiclou the, kumna kaniw ta tibaengtanc rihliangclou the kumna kaniw pupouc nunc khou nrianhloumei kandic khou kaniw ta tilungclou the.

²⁴Kaniw rui Kanaan kandic ta laa the; mi khou tei lungc bam khwanmei nunc ta nang rui Isaraelmei nunc hu khou rih ngam gutlou the. Kanaanmei nunc khatni kaniw guangh nunc ruc khou kaniw rui sw nii niimei swlou khang nang rui nang mei nunc ruc khou pumtan tiilou the.

²⁵Raengh raengloumei kaidai guay, kandih gaymei ramv, lanv rui padikmei kai guay, khiauclou tangmei duikhunc guay, Olive bang laic, tingthaibang laic, khatni drakhalau guay nang rui nang mei nunc khang tiilou the. kaniw rui tu nii tu niimei tuna kaniw pumc gay the; nang rui tiiloumei ramh gaymei guay paan rui kaniw amanvna lungc the.

²⁶“Tiki nang mei nunc rui nang ta meicliamna nang lat piu mak khe; nang tuang Riakdanv ta kaniw rui thei kaneilou the. Kaniw ta luhloumei muhzwng nunc ta, nang khou karih guang dat khang samei nunc ta kaniw rui swluai the. Kaniw rui kaluaih kaluaihna nang zaw sw kasic the.

²⁷Kumhpui zaeng rui kaniw ta tei kaniw ta zauczihmei nunc baanc khou tikeylou the. Kaniw ryanra pwkhou nkhavlou khang nang ta kauc the kumna tingkauh thangc rui nang rui kaniw khou dawlou the. Nang zauzian daihmei paan rui nang rui kaniw khang zaylou nimei ndiu guang the kumna zauczihmei nunc baanc khou rui kaniw ta kan patlou dat the.

²⁸Nchu-nzaenghna lungc dat pwkhou, kaniw paapc taanc dat the, kumna kaniw ta zauczihmei nunc baanc khou tikeylou dat the. Kum e tiki kaniw lungh laic datna kaniw ta kanlou khang huayney pwkhou, tingkauh thangc nang rui chulouna nang zauzian daihmei paan rui kaniw ta kanlou dat dat the.

²⁹Nang tuang latdyn guay piu khang nang rui kaniw ta luhlou khwan e, tiki kaniw daihriw swna nang tuang latdanv guay tei laalou mak ge, nang tuang Riakdanv ngaekmei hei ringc nimei chaeng bam sini, meicliamna khatni kaniw lung tancna, samei kaniw piu mak ge.

³⁰Kaniw ramhthay kan khang tingkwm mpeyna kaniw khang dinc guang the. Nang rui muhzwng nunc ta katiulouna kaniw rui nang mei nunc khou salou the, tiki nang mei nunc tei chulou mak khe, kumhpui zaeng rui zaatc baihmei nunc baanc khou kaniw ta tikeylou the.

³¹Kum bam khwan sini nang zauzian daihmei paan rui nang rui kaniw ta ganclou mak ge, sw ni sw kamut kamailou mak ge. Nang hei nzianthaymei khatni zauzian thaymei Racguangc e!

³²“He Ravguangc, aniw Racguangc, nang hei adih daic cho! Adih meicpingmei Racguangc cho! Adih ngamv daihmeipu cho! Nang thu nang tuang latdyng suai zat makna ngaek bam e. Asiriamei guangc nunc rui aniw ta rai khou tei rui thauna ntaw nganvmei, aniw adih ryanra akhaengv kan tu the cho! Aniw tuang guangc nunc, kapy nunc, amuh nunc, khatni muhzwng nunc, aniw pupouc nunc khatni aniw meic guayna ryanramei ariw the. Aniw adih ryanra kan the cho ningtowlou o!

³³Nang rui aniw ta riapmei hei riap biuhmei tuang di the; kalam thu nang thu nchumhna taanc bam e. tiki aniw thu paapc taancna bam e.

³⁴Aniw pupouc nunc, aniw guangc nunc, kapy nunc khatni amuh nunc ni nang tuang latdanv piu mak khe. Nang tuang Riakdanv khatni luhloumei lat guay tei nkinglou mak khe.

³⁵Nang rui nang mei nunc ta kaniw khang tiiloumei ramv daihmei khatni kandih gaymei dic khou tilungclouna nang tuang zauzian paan rui guangh mpeyna rui nang mei nunc ta sinna lungc kan the; tiki kaniw rui paapc khou rui tat patna nang tuang siamruai sw kan mak ge.

³⁶Kumhpui zaeng rui ntaw thu aniw hei mi nang rui aniw khang tiiloumei nap-bi thuihmei, ramv gaymei kandic khou hei bangh swna bam the.

³⁷Mi kandic khou rui patmei guay tei aniw paap zaeng rui aniw ruc khou guangh tituloumei guangh nunc khang tei tii ngam the. Kaniw rui aniw ta khatni aniw tuang guaih bangh guay ta kaniw nyng sw the, kumna aniw kanganv maekna ryanra the.”

³⁸Pat kanmei kaguay zaeng khou tei ruina, Isaraelmei aniw rui ntipmei latdyng akhat hykey the, kumna aniw tuang kapy nunc, Levimei nunc khatni amuh nunc rui kaniw tuang sil mi khou tei diangc lou the.