Read Rongmei Naga ESTHAR 1 Bible Online

ESTHAR 1 - Rongmei Naga bible

ESTHAR 1

¹Heikumna pat khwan e, Serses ganv khou guangh Serses rui India khou rui Ethopia nganvna kandih 127 ta guanghtuna bam khwan e.

²Mi ganv khou tei guangh Serses tei katuang guangcdic Persia kaidai Susa khou rui sin bam khwan e.

³Kamei guanghtumei kathumhmei kwm katuang meicdaihmei guay khatni dihsinpouc guay khang khwmkic khwan e. Persia khatni Mediamei tuang ricmei guay kandih lang sinmei guay khatni guanghdih guay tuang meicdaihmei guay khoutei kazauh khwan e.

⁴Kaguangh kandic tuang lungcgay khiukhingh guay tei katik kahym kazauhna bw charuk lyan khwan e.

⁵Mi tangv tei guangh tei rui Susa kaidai khou bammei lungcsi lungcgay kapah makna meic kaguayna khang khwmkih raeng raengclou khwan e. Hei tei zaeng chanei guanghkai tuang pikwan khou sw khwan e.

⁶Guanghkai kaimav khou tei phey mphuanmei khatni nrymmei khamthinghphey khou gaymei haengcnrymmei linen langcriang rui kariang swna daandi rui kahaengv swna ntauhhuc mphwanmei rui katiangc swloumei khou thaengclou the. Kaimav tei ntauhhuc mphwanmei, ntauh haenghmei, gaanhmei hira, khatni ntauhhuc nrymmei rui bamcpiangh pianglou khwan e. Khoutei kachaekc khatni daandi tuang laengv pang lou khwan e.

⁷Zouh tei kachaekc buangc khou tizangv bam khwan e. Mi buangc guay tei kalwn baic baic ngam khwan e. Guangh tei rui katuang zouc tei nzav tuang maekna tiipat khwan e.

⁸Zangvmei tei karian kadath nai dat maek khe; meic kathuicna ta zangv diu saanv tizangv o twna guangh rui guangh kai tamthiwmei nunc khou tei sa the.

⁹Kum bam khou tei Liammav Vashti rui ni guangh kai lungc khou ntumei nunc khang khwmkic bam khwan e.

¹⁰Zaeng chaneimei nungc guangh tei zouh zangv the kumna neihla the, kumlana kapumc siammei kabangc gaanv chanei: Mehuman, Biztha, Harbona, Bigtha, Abagtha, Zethar, khatni Karkas hei nunc ti hei kaw guang the.

¹¹Liammav Vashti ta Liammav pykhim khimlouna nduangh guang o twna kaniw khou latdanv tii the. Liammavpui tei kalwn kacha gay khwan e, kum tina guangh rui kata meicdaihmei nunc khatni meic nunc khou lyan nii khwan e.

¹²Tiki guangh bangc nunc tei rui Liammav Vashti khou salou the tiki kamei tei pat mu the. Kum tina guangh tei kalung mpeyna puamc the.

¹³Kandih tuang lunghriak lam khou guangh rui thaymei nunc khou akumh cho twna thanv raph rap bam khwan e, kum lapui zaeng rui thaymei katuang ningtyngmei nunc ta kaw khwan the.

¹⁴Kamei rui mi kumhmei ganv khou katupcna kaw bammei nunc thu Karshena, Shethar, Admatha, Tarsis, Meres, Marsena, khatni Memukan mi kaguanghdic khou kauh liangmei thaek khou lou bammei Persia khatni Mediamei meicdaihmei gaanv chanei hei the.

¹⁵Kamei rui mi nunc khou tei sa the, “Guangh Serses ai rui kapumcsiammei nunc ta thouclouna Liammav Vashti ta guang o twna latdanv tii the, tiki kamei hei tei piu mak khe! Kata tabui sw o twna dihriak rui sa bu cho?”

¹⁶Khoutei Memukan rui guangh khou khatni katuang meicdaihmei nunc khou kumna kauc pat the: “Liammav Vashti rui guangh ta swzakmei na hamhna katuang meicdaihmei nunc kalingmei thu kaguanghdic khou bammei meic guayna ta tizakmei tuang e!

¹⁷Liammavpui rui sw kanmei tei mi guanghdic khou bammeipui guay rui chu la thei kaniw gaanv gaanv ta mala puni the. ‘Guangh Serses rui Liammav Vashti ta kadaeng khou guang khang kaw tina guang kan mak ge,’ twna kaniw sa puni the.

¹⁸Persia khatni Media kandic tuang meicdaihmei now nunc rui Liammav kheiliak tei chu pwkhou neih key mak khou rui kaniw gaanv nunc khou mi lam tei sarap puni the. Ntumei guay rui kaniw gaanv nunc ta chakhwang sw ni tuang hamh the, kumna nggaanvmei guay rui kaniw now nunc ta lungpuam puni the.

¹⁹Guangh rui nuh e thei thu, Vashti tei guangh hu khou guangh dat nuh mak khe twna salou o. Persia khatni Media tuang riak khou hei tei kalaic dat nuh makmei riak swna hy keylou o. Kumna Liammav hei kaphaan baihmei ntumei gaymei khou tiilou dat tho.

²⁰Guangh rui kaucpatmei tei mi guangcdic daihmei khou chulik pwkhou, ntumei kathuic rui lungcsi lungcgay baih makna kagaanv kagaanv ta chakhwang sw puni e.”

²¹Guangh khatni katuang meicdaihmei nunc rui mi lat hei kahaw the, kumna Memukan rui samei tei kumcna guangh rui taanc the.

²²Guangh tuang kandic guay khou kakandih dih lat khatni hiak rui kaikhunh kathuic khou nggaanvmei rui kaipouc sw nina e kumna nggaanvmei lat tat nina e twna hyna nzanh pat the.