Read Rongmei Naga ESTHAR 2 Bible Online

ESTHAR 2 - Rongmei Naga bible

ESTHAR 2

¹Katang thangc guangh tei kalungpuam nchu key datmei tangv nganvna Vashti rui sw kanmei tei khatni karuc khou kaucpat kanmei tei kakhanhna bam khwan e.

²Kumna guangh daeng niat dianghmei kabaancpwam nunc rui sa the, “Kalwn kachav gaymei liuchang tunac phu dat damc the cho?

³Kumna nang guangcdic kabamv kathuicna khou kalwn kachav gaymei tunac nunc ta phu lana Susa kaidai ntumei nunc kai khou nduangh guang khang meicdaihmei nunc ta langlou tho. Kumna kaniw ta kiuc nang tuang ntumei nunc ta sin bammei kapumc siammei Hegay baanc khou tiilou tho—kumna kaniw ta karuh chuyna karuhlou kan di tho.

⁴Kaniw pang khou rui nang rui kahaw liangmei ta kapah lana Vashti phaan liammav tiswlou tho.” Guangh tei mi hei gaymei lat the twna laa the kumna hei tei tat key the.

⁵Susa kaidai khou Jihudimei kazanc Mordekai twmeipu, Jair rui puanhmei, Benjamin kaikhwangmei Kis khatni Shimei kikta gaanv khat lungc bam khwan e.

⁶Babilonmei guangc Nebukadnezar rui Judamei guangc Jehoiakin ta khatni baihmei kangmei nunc ta Jerusalem khou rui Babilon thangc nym tat khou Mordekai ni kazauh khwan e.

⁷Kapu chana nac aluh Esthar, Ibrimei lat khou rui Hadassa twmeipui gaanv khat nai bam khwan e. Mipui tei kapumc lwan gaymei, khatni kalwn kachav gaymeipui khwan e. Kapui kapu theic kan tina Mordekai rui kata kanac swna makuat thau khwan e.

⁸Mi latdanv tei guangh rui kaucpat pwkhou Susa kaidai khou tunac mpeyna nduangh guang khwan e, kumna mi pang khou tei Esthar ni gaanv khat khwan the. Guanghkai khou ntumei nunc kai sinmeipu Hegay baanc khou kata ni tiilou the.

⁹Hegay rui Esthar ta kahaw the, kumna kata tei laa nii the. Hegay rui kasiamruai sw chuyna sw the khatni taektw gaymei titu the. Ntumei nunc kai khou tei kakhang kabamv gay liangmei tiilou the khatni guanghkai khou rui kadahloumei tunac gaanv chanei ta kasiamruai sw khang langlou the.

¹⁰Mordekai rui saloumei theilayna Esthar tei kamei Jihudimei e twmei sapat mak khwan e.

¹¹Esthar tei tukumh bam tu cho khatni kata tabui sw puni cho twmei thay niina Mordekai tei tingmik pum ntumei nunc kai kaisangh khou tei tatpat tatgutna bam khwan e.

¹²Mi nunc ta tei howgay diu khang kapuih guangmei tei tingkwm akhat gut re— bw charuk rui mir thauc rui khatni bw charuk akhat rui balsam thauc rui teyna siamruai sw the. Mi tangv tei tunac nunc tei gaanv khat gaanv khat swna guangh Serses khou phungc guang the.

¹³Kaniw tei guangh daeng khou guang ni khou tei kamei kamei rui kahawmei pwan piu nuh khwan e.

¹⁴Kamei tei guangh daeng khou tingzyn guangna tinggaanc pat dat pwkhou ntumei nunc kai baihmei guangh now nunc ta sinmei kapumc siammei Shaasgaz daeng khou nduangh guanglou dat nina e. Guangh tei rui kata kahawna kazanc ntana kaw dat mak saanv kamei guangh daeng khou guang dat nuh mak khe.

¹⁵Esthar kamei guangh daeng khou guang khang kaganv guang the. Abihail rui puanhmei, Mordekai rui kanac swna makuat thaumei, kapu chana nac, howloumei guay rui kahawmei Esthar tei kaliang guang tangc pwkhou ntumei nunc kai sinmeipu Hegay rui samei theilayna kapwan piu the.

¹⁶Kumna Serses rui guanghtumei chaneimei kwm, ruh tangmei bw, Tebet bw khou Esthar ta guanghkai khou Serses daeng khou phungc guang the.

¹⁷Guangh tei rui kata tunac baihmei ta suangc kamei rui nzianmei baih baihmei ta suangc kahaw mbu the. Guangh rui kapy khou liammav pykhim khimlouna Vashti phaan liammav tiswlou the.

¹⁸Khoutei Esthar ta chakhwang swmei swna katuang saengcdaihmei khatni kandih sinmei nunc ta kawna khwmkih ngai dai ngay the. Kamei rui kaguanghdic kapwmna khou tei nthaekcmei tingmik kaucpat the kumna guangh akhat tuang biuhmei kaipat nzanh the.

¹⁹Tunac nunc ta luanneimei swna phungc guang kariumei ganv khou tei Mordekai tei guangh tuang raengc khou tei dungcbam khwan e.

²⁰Esthar kamei tei Jihudimei e twmei tithay pat mak ge. Kamei rui alaucna khou rui thauna kapulauc lat piu guangmei kumcna kapulauc lat piuna hei tei sapat makmei tuang e.

²¹Mordekai rui guanghkai chaengmun khou dungc bammei kaanc khou, guanghkai kaimun rigaanvmei kapumc siammei Bigthana lev Teres rui guangh Serses ta howmuna swluai khang nkamhna chamvraeng sw the.

²²Hei tei Mordekai rui thay lana Liammav Esthar khou dinclou tina Esthar rui Mordekai zanc khou guangh khou poulou the.

²³Mi lam tei kathat nthan gut pwkhou hei tei nchumh bam khwan the, kumna kaney gaanv nei ta thaengcluai the. Kumna hei tei kaguanghdic tuang latrik khou hykeylou o twna guangh rui latdanv pat the.