Read Rongmei Naga ESTHAR 4 Bible Online

ESTHAR 4 - Rongmei Naga bible

ESTHAR 4

¹Mordekai rui mi lam tei thay pwkhou kalung kabiuna kaphey siat the. Kamei rui zaengsiphey piuna khatni kapy khou mbut ruailouna kap ranvna kap ngiuh ngiuna kaidai tei ruan padak dak gutna

²guanghkai raengcmun khou guang the. Kamei kalungc khou gut mak khe kalam thu zaengsiphey piuna gaanv khat na ta sini guanghkai kalungc khou tigut mak ge.

³Guangh tuang latdanv tei chu tanghmei kandih kabamv kathuicna khou, Jihudimei guayna rui kap ranvna kap chinh chin the. Kaniw geihmei tei zaengsiphey piuna mbut ding khou nliauna munthiangcna kapna huayna bam the.

⁴Esthar khou kabangcpui nunc lev kapumc siammei nunc rui sw bammei tei raclou pwkhou, kamei kalung kabiu the. Zaengsiphey tei luak gancna pheychangh piu dat khang kamei rui Mordekai khang phey tiipat the, tiki kamei hei tei laa mak khe.

⁵Guangh rui kabangc khang tiimei kapumc siammeipu Hathak ta kamei rui kawna, Mordekai daeng thangc tatna tabui naina heikum bam tu cho twna thanv no twna thouclou the.

⁶Guanghkai raengcmun daeng khou naimei kaidai tuang sanghbamv khou Hathak rui Mordekai daeng khou guang the.

⁷Mordekai rui karuc khou pat bammei guay tei khatni Jihudimei guay ta swluai ngam e thei Haman rui guangh lanv khou syan azuh tii khang nrianhloumei hei guay hei Hathak khou raclou the.

⁸Jihudimei guay ta sw kamut kamai khang Susa kaidai khou rui tiipatmei latdanv tei kamei rui Hathak khou tiilou kan the. Hei tei Esthar khou phungc guang tangcna, mi lam tei kakhou raclou lana, guangh daeng khou kamei kahak tatna kamei nunc ta zauc-nzianlou khang sa o twna sa tio twna Mordekai rui kakhou sa the.

⁹Hathak rui hei tei raclou the,

¹⁰kum pwkhou Mordekai khou dinclou tio twna Esthar rui mi lat hei tiilou the:

¹¹“Thow pwni, ntumei ni nggaanvmei ni, guangh kamei rui kaw makna guanghkai lungc khou gutna guangh ta ariw e thei, mi kumhpui mei tei theic nina e. Mi hei kariak the, guangh lev lat kaphianhmei nunc khou rui thauna kandih baih baihmei khou bammei meic kathuicna rui hei tei thay the. Mi tuang riak ti hei tat nkic nuhmei chaeng akhat na kha nai e; mi kiu thu guangh rui katuang kachaekc builwang kari pat re thei mi kumhmeipu panty tei thu duak puni e. Tiki guangh rui ata sowriu khang kawmei thu bw akhat tangc the.”

¹²Esthar tuang lat tei Mordekai rui chu pwkhou,

¹³kamei rui Esthar khou sa the: “Nang guanghkai khou bampui zaeng rui Jihudimei kaguayna khou rui nang rana duak puni twna ning riu.

¹⁴Hei kumhmei ganv khou hei nang reih reina bam tithei Jehudimei nunc ta thu tingkauh thangc rui keyna nkhavlou kan puni e, kumna kaniw ta thu kanlou kan puni e, tiki nang thu theic puni the. Kumna nang pu kaikhunc mut puni the, tiki thow thayna cho—hei kumhmei ganv khang rui nang ta Liammav tiswlou bammei tuang kho ni nuh e!”

¹⁵Esthar rui Mordekai khou daw the:

¹⁶“Nang tatna Jihudimei guay ta Susa khou khuam guang kaduai tho; kumna munthiangcna akhang huayneylou o. Zaeng neih thumh zingbangc kalaanv tu mak zangv makna munthiangc o. Abangcpui nunc ta nduanghna ai ni munthiangcna kalum bam puni. Mi tangv kiu, kariak rui nuh mak bam sini, guangh daeng khou ai tat puni. Mi zaeng khou tei rui theic nimei tuang nai sini ai theic rap puni the.”

¹⁷Mordekai rui tatna kakhou Esthar rui samei guay tei taanc the.