Read Rongmei Naga ESTHAR 5 Bible Online

ESTHAR 5 - Rongmei Naga bible

ESTHAR 5

¹Zaeng neihthumh munthianghmei tangv Esthar tei Liammav pwan piuna guanghkai kalungcmei khou gutna guangh bamvpaeng naimei kainung biak kazaw karihlouna ding the. Guangh tei kalungc thangc guangh bamvpaeng khou dungcna kaimun biak kazaw karihna bam khwan e.

²Guangh tei rui Esthar kapaengc khou ding bammei ta how lana, kata zauc-nzianlou the kumna guangh rui kahu khou katuang kachaekc builwang karipat the. Khoutei kamei rui tat kuna mi builwang twan tei kahi the.

³“Tabui tuang naina cho, Liammav Estharle? Nang rui kahaw hawmei tei sa o, atuang guanghdic paek akhat ney pwsini tii puni,” twna guangh rui sa the.

⁴Esthar rui daw the, “Guangh nang rui nuh e thei, aseic zingbangc hei Haman nangney ai rui chamdaanvloumei napkawmei bamv khou guanglou o.”

⁵Kumna mi bamv khou kiu tat khang Haman ta katumcna guang khang guangh rui latdanv pat the. Heikumna guangh lev Haman rui Esthar tuang napkaw bamv khou guang the.

⁶Zouh zangv hiuh hiulouna guangh rui kakhou thanv the, “Nang rui kahaw hawmei sa o, ai tii puni. Nang rui ney neymei tii puni, atuang guanghdic kapaek nganvna swbakna tii puni.”

⁷Esthar rui daw the,

⁸“Guangh rui nzianlouna ai rui neymei tiilou nuh e thei thu, guangh lev Haman nthuanh nangney khang swloumei atuang napkaw bamv akhat khou ni guanglou dat ro. Ai rui kahawmei kiu hei ganv khou kiu rui tithaylou dat puni.”

⁹Haman tei mi napkaw bamv khou tei rui tatpat dat pwkhou neihlana khatni kalung gaancna pat khwan e. Kum e tiki Mordekai ta guanghkai kaimun khou tei ariw pwkhou, Mordekai rui kata kalum makmei ta how lana Haman tei Mordekai ta kalungpuamc the.

¹⁰Tiki kamei mi dyng khou tei kalungpuam khou rui akhaengvna kakai thangc tat kan the. Kamei rui kapammei nunc ta kakai khou kaw guang the kumna kanow Zeres ta ni kaniw pang khou kazauh khang kaw the.

¹¹Karam lunggay, kanac mpouh geihmei, guangh rui kata bamv kauhmei khou tikuloumei, guangh meicdaihmei pang khou kamei daic mbumei hei guay zaeng khang kamei rui kaniw hu khou kagaengh sw the.

¹²Haman rui sa key e, “Heina hamhna nai e,” “Liammav Esthar rui guangh lev aney khang na hamhna meic baihmei ta napkaw mak ge, nthuanh khang ni kaw dat di he.

¹³Kum e tiki Jihudimeipu Mordekai rui guanghkai raengcmun khou dungc bammei ta how bam saanv thu mi guay tei nsa de.”

¹⁴Khoutei kanow khatni kapammei nunc rui sa the, “Chowbuk 50 kauhmei thaenghpaeng kasiamh damc the cho? Nthuanh lauthwan guangh khou sana kata thaengcluai tho, kumna napkawmei khou kiu neihlana tat dat tho.” Hei tei gay dyng the twna Haman rui laa the, kumna thaenghpaeng kasiamh the.