Read Rongmei Naga ESTHAR 6 Bible Online

ESTHAR 6 - Rongmei Naga bible

ESTHAR 6

¹Mi nungc zingbangc guangh tei zipthuy zipmang key ngam mak khe, kumna katuang guanghdic tuang latrik laaguangna kakhou pac khang thouclou the.

²Kaniw rui hei tei pac key pwkhou guanghkai kaimun rigaanvmei Bigthana lev Teres rui guangh ta swluai khang sw bammei raeng ta Mordekai rui thay pat kanmei lam tei pac pat the.

³Guangh rui thanv the, “Mi khang rui aniu Mordekai khang akumhna chakhwang swlou kan tha khatni tabui swan tiilou kan tha?” Kabangc nunc rui daw the, “Kakhang ramhkhat na sini swlou kan mak ge.”

⁴“Atuang meicdaihmei thow thow guangh kai khou bam bu cho?” twna guangh rui thanv the. Khoutei Haman tei guangh kai kaisangh khou gut rap the; Mordekai khang thaenghpaeng nravlouna thaengcluailou khang guangh khou sa khang kamei guangmei tuang khwan e.

⁵Kumna bangh nunc rui “Haman nang ta ariw khang nkhwan bam e,” twna guangh khou salou the. “Kata kiuc nduangh gut ro,” twna guangh rui sa the.

⁶Kumna Haman gut pwkhou guangh rui kakhou sa the, “Ai rui chakhwang swlou nii hakmei meic gaanv khat nai e. Mipu ta kiuc tabui tuang swlou tikho cho?” Haman rui kakhanh the, “Guangh rui heidi chakhwang swlou niimei kiu thow ta lana cho? Ata rap khwang di the.”

⁷Kumna kamei rui guangh khou sa the, “Guangh rui taanclou nii niimei khou taanlou tho

⁸Guangh tuang pheybaan khatni guangh rui dunghmei takuanc, takuan khou loumei guangh tuang karuh pwan tei tilaaguang o.

⁹Kumna nang tuang meicdaihmei pang khou rui daic liangmeipu ta mipu pwan tei ti sw tho, kumna kata takuanh ruc khou tidungclouna mipu ta kiuc takuanh tei tizayna kaidai tiruan titho. Guangh rui chakhwang swlou niimei mei ta akumhna swlou cho twmei ‘zauclo! twna meicdaihmeipu tei rui hu khou kaucna tat kan di tho!’ ”

¹⁰Khoutei guangh rui Haman khou sa the, guanghkai chaengmun khou dungc bammei Jihudimei Mordekai khang “Mi pwan khatni takuanh kiu katumcna laa tat tho, kumna Jihudimeipu Mordekai khang mi chakhwang kiu swlou ti tho. Nang rui samei kaguayna tei kakhou swlou ti tho. Kamei guanghkai raengcmun khou dungc bam khwang e.”

¹¹Kumna Haman rui mi pwan khatni takuanh kiu laana, Mordekai ta takuanh ruc khou dungclouna, Haman rui takuanh tei zay lana, “Guangh rui chakhwang swloupui mei ta zauclo!” twna kaucna tat the.

¹²Mi tangv tei Mordekai tei guanghkai raengcmun thangc tat dat kan the, kumna Haman tei kalamsina kazaw kagoucna kakai tat kan the.

¹³Kamei rui sw kanmei guay kanow khatni kapammei nunc khou raclou the. Khoutei kanow khatni ningtyngmei kapammei nunc tei rui kakhou sa the, “Nang Mordekai hu khou nang tuang ngamv maek khe. Kamei hei Jihudimei de, tiki nang kata ngam mak khe. Kamei rui nang ta ngam puni the.”

¹⁴Kaniw heikumna racna bam khou, Haman ta Esthar tuang napkaw bamv khou guang khang kaw khang guanghkai tuang kapumc siammei nunc katumcna guang the.