Read Rongmei Naga ESTHAR 7 Bible Online

ESTHAR 7 - Rongmei Naga bible

ESTHAR 7

¹Kumna guangh khatni Haman tei Esthar lev tu nchamc khang tat the.

²Hei tei kaneimei the. Zouh zangvlouna guangh rui kakhou thanv dat re, “Liammav Esthar, nang tabui kahaw bu cho? Nang ney neymei tii puni, guanghdic kapaek sini tii puni.”

³Liammav Esthar rui daw the, “Ai rui sa nimei guangh rui dawlou nuh e thei thu, ai rui kahawmei thu ai ni amei nunc ni ringc nii e.

⁴Ai khatni amei nunc ta dow luai ngam khang luailou bam the. Bangh swna zuancloumei tuang na re thei, ai hei reihna guangh ta sw kaguakc bam lak nimei tuang de; tiki aniw ti hei swluai mutsutlou pw nimei zaeng rui the!”

⁵“Thow rui hei kumhmei kiu sw bam buna cho?” Mipu kiu tabui thangc bamna cho? twna guangh Serses rui Liammav Esthar khou thanv the.

⁶Esthar rui daw the, “Aniw ta zauczihmei, aniw ta raimei meicsimeipu kiu mi Haman hei the!” Haman tei Liammavpui khatni guangh ta pingna kaluang the.

⁷Guangh tei kalungpuamcna ding thau the; kapaengc patna guangh kai pikwan thangc tat kan the. Haman tei guangh rui kata dandi tii puni the twmei thay lana kapanty na tei thu kanlou o twna Liammav Esthar khou sa me twna bam duc the.

⁸Zauc nzianlou o twna kamei Esthar laeng khou bow nkhum khuakh key the. Guangh tei rui pikwan thangc rui kainung khou gut dat pwki Haman Esthar laeng khou zip bammei ta howna guangh tei rui heikumna kauc pat the, “Mipu hei akai kahak khou, ahu khou anow ta nym khang sw bam tu bu the!” Guangh rui hei tei sa pat rappui lev, kapumc siammei nunc tei rui Haman py gum kan the.

⁹Khoutei kaniw pang khou Harbona twmeipu rui sa the, “Haman twmeipu hei rui guangh panty kanduakloumeipu Mordekai ta thaengc luai khang chowbuk 50 kauhmei thaenghpaeng nravlou bam the!” “Hei khou kiu Haman ta thaengcluai tho!” twna guangh rui latdanv pat the.

¹⁰Heikumna Mordekai ta thaengc luai khang swloumei thaenghpaeng khou tei Haman ta thaengc luai the. Hei tangv tei guangh lungpuam nchu key kan the.