Read Rongmei Naga ESTHAR 8 Bible Online

ESTHAR 8 - Rongmei Naga bible

ESTHAR 8

¹Mi nungc kahak tei guangh Serses rui Jihudimei ta zauczihmeipu Haman tuang lanv guay tei Liammav Esthar khang tii kan the. Esthar rui Mordekai hei kakaimei e twna guangh khou raclou tina hei khou tei rui thauna Mordekai ta guangh daeng khou tiguang khang nuhlou the.

²Khoutei guangh rui katuang sil naimei baanrwn Haman khou tiiloumei tei laa datna Mordekai khang tii dat kan the. Haman tuang lanv guay tei Mordekai khou Esthar rui nsinlou kan the.

³Khoutei Esthar rui guangh phaypav khou nkhum khuakh khuak keyna kalumna sa dat re. Agag kiktamei Haman rui Jihudimei ta swmaan khang swloumei raeng tei ti-nthakclou khang zaenghuay the,

⁴Guangh tei katuang kachaekc builwang Esthar hu khou karipat the, kum tina kamei ding thauna sa the,

⁵“Guangh rui nuh e thei, guangh rui akhang kadanlouna mi hei swlou nimei tuang dyng e twmei nai e thei Haman tuang latdanv—nang guanghdic khou lungc bammei Jihudimei guay ta sw kamut kamai khang Agag kiktamei Haman rui tiipat kanmei latdanv tei tat key mak khang thingclou o.

⁶Hei kumhmei hei amei nunc ruc khou patlou e thei, ariang aluaic guay ta swluai ngam kan e thei ai akumhna khaeng bam ngam nina cho?”

⁷Khoutei guangh Serses rui Liammav Esthar khatni Jihudimei Mordekai khou sa the, “Zauclo, ai rui Haman ta kamei rui Jihudimei ta sw kasic khang swmei zaeng rui kata thaengc luaina, katuang lanv guay Esthar khang tii kan the.

⁸Tiki guangh tuang sil diangclouna guangh zanc khou tiipat kanmei lat tei thu kak dat ngam mak khe. Tiki atuang sil diangclouna azanc khou nang rui sa nii niimei Jihudimei nunc khou sa nuh the.”

⁹Mi hei kathumhmei bw, Sivan bw tuang zaeng 23mei nungc pat kanmei tuang the. Mordekai rui guangh tuang hymei nunc ta kawna Jihudimei nunc khou khatni India khou rui thauna Sudan nganvmei lungc khou kandih 127 khou bammei guanghdic kalang akhat sinmei nunc, dihsinpouc nunc, khatni meicdaihmei guay khou tatdyn tihy the. Kumna mi tatdyn guay tei kandih kathuic khou kalat kalat khatni kakandih dih tuang hiak khou khatni Jihudimei nunc khou kaniw lat khatni kaniw tuang hiak khou hy kan the.

¹⁰Mordekai rui mi tatdyn guay tei guangh Serses zanc khou hy lana guangh tuang sil hei khou tei diangclou the. Kumna mi guay tei guangh tuang takuanhkai khou rui nkhap liang liangmei takuanh nunc tuangcna nzanh tat the.

¹¹Mi tatdyn khou hyloumei lat kiu thu kaidai kathuic khou Jihudimei guay kaniw ta gaek khang chamvbui lana taanv sw thau khang guangh rui nuh the. Tabui bui kandic khou tabui bui zaat rui pwni rihpwan piuna Jihudimei kaniw nownac nunc ta adow pw e thei kaniw rui adow khangc lana kaniw ta tei swluai mutsut sutlouna kaniw tuang naimei guay laa nuh the.

¹²Mi latdanv hei Jihudimei ta swluai khang nrianhloumei tingmik, bw 12mei, Adar bw tuang zaeng 13mei nungc rui taanv swna tat key nuh the.

¹³Mi tingmik kiu guang tangc pwkhou Jihudimei nunc rui kaniw ta sw nimei nunc ta khwm khangh khang mi hei latdanv swna kandih kathuicna khou meic kathuicna khou tithay liklou nina e.

¹⁴Guangh tuang latdanv theilayna meic nunc tei takuanh tuangcna pak ranvna pak tat kan the. Mi latdanv tei Susa kaidai khou ni mathiucna khou kauc ndauhlou the.

¹⁵Mordekai tei nrymmei khatni mphwanmei guangh pwan khatni nthanmei haengcnrymmei linen tuang pwan piuna khatni karangmei kachaekc tuang guangh pyrun runna guanghkai khou rui tatpat the. Khoutei Susa kaidai chaengluang guay khou neihla zaenggaymei khwan rui padik the.

¹⁶Jihudimei nunc khang neihla zaenggaymei pat the, lung ryanramei kuak the khatni rihngammei kumc the.

¹⁷Guangh tuang lat tei chumei kaidai khatni kandih kathuic khou Jihudimei nunc tei neihlana khumngai sw the. Meic mpeyna Jihudimei ta pingna Jihudimei ngguanh the.