Read Rongmei Naga ESTHAR 9 Bible Online

ESTHAR 9 - Rongmei Naga bible

ESTHAR 9

¹Adar bw tuang zaeng 13mei tingmik, guangh tuang lat tei taanv swna sin thau nimei tingmik, Jihudimei ta zauczihmei nunc rui Jihudimei ta kaniw baanc khou laagut khang lwmgay bammei tingmik guang tangc pu the. Tiki mi phaan tei Jihudimei rui kaniw ta ngam the.

²Mi guangcdic lungc khou naimei kaidai guay khou Jihudimei bammei bamv guay khou kaniw ta sw khang guangmei guay ta adow khang chamdaanv the. Kabamv kathuicna khou kaniw ta ping the, kumna meic gaanv khat na rui sini kaniw ta dingda bauh mak khe.

³Kandih baih baih khou bammei guanghdic kalang akhat sinmei nunc, kandih sinmei nunc, khatni guanghkhyn nunc rui Jihudimei ta nkhav the, kalam thu kaniw ni Mordekai ta ping the.

⁴Mordekai hei guanghkai khou kangamv naimeipu e kumna kangamv hei daic hay hay bam e twmei mi guangcdic kapwm khou thay lik sikh sik the.

⁵Kumna Jihudimei nunc rui kaniw tuang zauczihmei nunc ta kaniw rui sw nii niimei thak sw nuh the. Kaniw rui zauczihmei nunc ta dowluai the.

⁶Susa tuang kaidai lungc khou nganvna Jihudimei nunc rui meic gaanv 500 ta swluai the.

⁷Parshandatha, Dalphon, Aspatha,

⁸Poratha, Adalia, Aridatha,

⁹Parmasta, Arisai, Aridai khatni Vaizatha mi nunc hei kazauh the.

¹⁰Hei pang khou tei Hammedatha rui puanhmei Jehudimei nunc ta zauczihmeipu Haman nac mpouh gaanv ruh kazauh the.

¹¹Mi nungc Susa kaidai khou dowluaimei sing kahak tei guangh khou poulou the.

¹²Khoutei kamei rui Liammav Esthar khou sa the, “Susa kaidai khou hei Jihudimei rui Haman nac mpouh gaanv ruh tei kazauhna meic gaanv 500 dowluai the. Kandih kabamv baih baihmei guay khou thu kaniw rui tukumhna swlou bam puni the cho! ntaw nang tabui kahaw dat di he cho? kahaw hawmei tii puni the. Nang kahawmei baihmei nai e thei sa tho, nang khang tii puni the.”

¹³Esthar rui daw the, “Guangh rui nuh e thei, Susa khou bammei Jihudimei nunc rui aseic kaniw ta titaanhmei kumcna nthuanh ni titaanclou dat ro. Haman nac mpouh gaanv ruh ta kiuc thaenghpaeng khou thaengh khang latdanv tipatlou o.”

¹⁴Hei tei sw tho twna guangh rui latdanv pat the kumna mi latdanv tei Susa kaidai khou tiipat the. Haman nac mpouh gaanv ruh tuang pumc tei charuangc khou thaengc lyanlou the.

¹⁵Adar bw tuang zaeng 14mei nungc Susa kaidai khou bammei Jihudimei nunc guang kariu dat lana mi kaidai khou tei meic gaanv 300 ta dowluai dat kan the. Tiki kaniw puat thu asut laa mak ge.

¹⁶Kandih kabamv baih baih khou bammei Jihudimei nunc ni kaniw ta gaek khang chamdaanv the. Kaniw rui kaniw ta howmu-zauclakmei meic gaanv 75,000 ta swluaina kaniw ta zauczihmei nunc khou rui duakpat the. Tiki kaniw rui puatc asut laa mak ge.

¹⁷Hei tei Adar bw tuang zaeng 13mei nungc pat kanmei tuang the. Zaeng 14mei nungc thu swluai-swtiat datmei maek khe, kumna mi tingmik tei neihlana khum ngaimei tingmik tisw the.

¹⁸Susa kaidai khou bammei Jihudimei nunc rui zaeng 15mei neic tei nei the. Kalam thu zaeng 13 lev 14mei nungc tei zauczihmei nunc ta dowluaina zaeng 15 mei nungc tei nthaekc the.

¹⁹Kaidai lau launa khou bammei nunc rui Adar bw tuang zaeng 14mei nungc neihlamei zaengthaek tingmik, khumngai tingmik khatni khat khat khang taektw tii karymei tingmik swna ngay the.

²⁰Mi sw kanmei guay hei Mordekai rui hy lana guangh Serses tuang guanghdic lungc khou bammei Jehudimei duhmei khatni anamei khou bammei guay khou

²¹Adar bw tuang 14mei khatni 15mei tingmik hei tingkwm pum ngaymei tingmik swna ngaek go twna nzanh pat the.

²²Mi zaeng neih nei hei Jihudimei nunc khang kaniw ta zauczihmei nunc khou rui duakmei tingmik e. Mi bw hei lung ryanra ryanriumei khou rui neihla zaenggaymei khou guanhloumei bw e. Mi tingmik nei khou hei napkawna, khat khat khang khatni lungcsi lungcroucmei nunc khang taektw nzanh lana ngay o twna kaniw khou salou the.

²³Heikumna Jihudimei nunc tei Mordekai tuang lat piuna taanc the kumna mi ngai hei kaniw riak khou tingkwm pum ngay the.

²⁴Hammedatha rui puanhmei Haman, Agak kiktamei, Jihudimei nunc ta zauczihmeipu tei Jihudimei guay ta swmaan khang swna Jihudimei ta sw kamut kamai nimei tingmik kamei rui “Purim” daanh saancna dinglou khwan e.

²⁵Esthar rui guangh khou poulou the kumna guangh rui kalatdanv hy keyna Haman kamei rui Jihudimei ta sw khang swloumei raeng tei karuc khou keylou dat the—kata khatni kanac nunc ta katuang thaenghpaeng khou thaengc luai the.

²⁶Hei zaeng rui mi tingmik guay ta Purim twna kaw e. Mordekai tuang tatdyn zaeng rui khatni kaniw ruc khou patlou kanmei kaguay zaeng rui,

²⁷mi tingmik kanei khou hei Jihudimei khatni Jihudi guanhmei guay Mordekai rui samei kumcna tingkwm pum ngaek nina e twmei kaniw riak sw kan the.

²⁸Kandih kabamv kathuic khou khatni kaidai kathuic khou bammei Jihudimei guay Purim tingmik hei guang nimei ganv guay khou ni ngaekna lungc bam nina e twna dinglou the.

²⁹Kumna Abihail nac aluhpui Liammav Esthar lev Mordekai rui Purim ngai lam khou su-ntiploumei swna ngamv kazauhna kaneimei tatdyn swna hy the.

³⁰Mi tatdyn tei Jihudimei meic guayna khang hyna mi tatdyn tei Persia guanghdic tuang kandih 127 khou nzanhlou the. Mi khou tei Jihudimei khou nchu-nzaenghmei khatni giuga makmei nai diu khang huayna

³¹kaniw rui munthiangcna chwnsi-zaengsimei riak tei ntipna sinmei kumcna Jihudimei guay rui kaniw kikta guay nganvna Purim ngai tei kaganv khou ngaek khang dinc the. Hei tei Mordekai lev Liammav Esthar rui latdanv swna tiimei tuang e.

³²Purim ngai tei sw ntiploumei tuang Esthar tuang latdanv tei latrikzy khou hylou khwan e.