Read Rongmei Naga TATPATMEI 11 Bible Online

TATPATMEI 11 - Rongmei Naga bible

TATPATMEI 11

¹Khoutei RINGHPOUC rui Mousi khou sa the, “Ai rui Izipmei guangc khatni kamei nunc khou dandi akhat tii dat puni he. Mi tangv tei thu kamei rui nangniw ta titat puni the. Kamei rui nangniw kapwmna ta mi khou rui alay pat puni the.

²Isaraelmei nunc kapwmna tei kaniw kaining kaigeimei khou rui kachaekc khatni daandi tuang ntuh-ntah ney khang sa ti tho.”

³Izipmei nunc rui Isaraelmei nunc ta RINGHPOUC rui chakhwang tiswlou the. Kalingna meic nunc khatni meicdaihmei nunc tei Mousi ta meicdaihmei akhat swna kakhanh the.

⁴Khoutei Mousi rui guangh khou sa the, “RINGHPOUC rui sa the, ‘Zipchung ganv khou ai Izip kandic tatruan puni the,

⁵kumna Izipmei nac mpouh nareimei guay, guangh bamv khou dungc bammei guangh nac nareimei khou rui thauna nap riak bammei banghpui nac mpouh nareimei nganvna theic puni the. Kiruai guay tuang puancreymei guay tei ni theic puni.

⁶Kap zat kan makmei khatni hei tei kumcna kap dat lak nimei ramkap Izip kandic kapwm khou kap puni the.

⁷Kum e tiki Isaraelmei ta khatni kaniw tuang khouringc nunc ta thu si na rui sini kasangvlou ni tuang hamh e. Hei khou kiu, RINGHPOUC ai rui Izipmei lev Isaraelmei kak khou baicna sw the twmei nang thay puni the.’ ”

⁸“Nang tuang meicdaihmei guay tei akhou guangna nang khatni nang thei lay bammei guay na tat tho twna nkhum keyna sa puni. Mi tangv ai tat puni.” Kumna Mousi kalungpuamcna Pharao khou rui tat pat kan the.

⁹RINGHPOUC rui Mousi khou sa the, “Ai rui Izip khou charynmei taanv asaekc taanclou dat khang rui guangh tei nang lat chulou mak bam puni di he.”

¹⁰Mousi lev Aron rui mi charynmei taanv guay hei guangh hu khou taanclou the, tiki RINGHPOUC rui kalung titanclou the, kumna kamei rui Isaraelmei nunc ta kakandih khou rui titat mak khe.