Read Rongmei Naga TATPATMEI 12 Bible Online

TATPATMEI 12 - Rongmei Naga bible

TATPATMEI 12

¹RINGHPOUC rui Izip kandic khou Mousi lev Aron kaney khou kumna sa the.

²“Mi bw hei rui tingkwm khou kahouh reymei nangniw khang rey liangmei bw sw puni the.

³Mi bw tuang zaeng ruh puinungc kaikhunh kathuic rui kakai kakai khang lauziunac hamh e the ziuhnac kadahlou nina the twna Isaraelmei kapwmna khou mi hei dinclou tho.

⁴Kaikhunh nthyam langvna khouringh tei tu ngam lak ge thei, kainingmei lev meic sing khatni tu nimei zu theilayna chak lana tu nzanh nuh e.

⁵Lauziu ni nuh e, ziuh ni nuh e, tiki hei tei tingkwm akhat tanghmei hiaksuimei kachic nina e.

⁶Mi bw tuang zaeng 14mei nungc tingzyn, Isaraelmei kaguayna rui mi khouringc tei swluai nina e.

⁷Khouringh zanc tei tumei kaikhunc kathuic rui zei asaekc tei laana kaimun tiangc kanei khatni kaimun py khou teylou nina e.

⁸Zanh tei mi nungc zingbangc tei rawna nkhucmei nuy lev khay loumakmei ntyan rui mitu nina e.

⁹Mi zanc tei nzina hamh e thei louc mincna tu nuh mak ge, kapumc tei—kapy, katan, kalungcna kazauhna raw mincna tu nina e.

¹⁰Hei tei lauthwan khang katit na sini tu nsaekclou nuh mak ge. Tu nsaekcloumei tuang nai e thei hei tei mai raw ganc nina e.

¹¹Chaeng tat nimei thak swna siangiat kagiatcna, phaythuapc tuangcna, builwang sinna katumcna tu nina e. Mi hei RINGHPOUC ata champouhmei tuang Kaanpatpui Ngai e.

¹²“Mi nungc zingbangc tei ai Izip kandic tat kaan pat puni the, kumna nareimei mpouh khatni khouringh khou puanc reymei kachic guay ta swluai puni the, kumna Izip tuang rav kapwmna ta dandi tii puni the. Ai hei RINGHPOUC e.

¹³Kaimun khou teyloumei zei tei rui hei tei nangniw kai e twmei thay khang e. Zei tei how pwkhou ai rui tat kaanlou puni the, kumna Izipmei nunc ta swluaimei khou tei nangniw kazauh lak khe.

¹⁴RINGHPOUC, ai rui taanclou kanmei tei ningtowmei ngai swna mi ngai hei nangniw ngay nina e. Guang nimei ganv guay khou ni mi hei ngay nina e.”

¹⁵RINGHPOUC rui sa the, “Zaeng chanei nangniw khay loumei ntyan tu lak nina e khay loumakmei ntyan na tu nina e. Rey liangmei nungc tei nangniw kai khou rui khay guay tei laa ganc ngam nina e, kalam thu mi tingmik lungc khou tei khay loumei ntyan tupui mei ta tei thu Isaraelmei pang khou rui alay ganc puni.

¹⁶Reymei nungc lev chaneimei nungc tei nangniw chingkhiuhna guang kariu nina e. Mi tingmik nei khou tei taanvtaanc lak nina e, tiki tuzangv khang napgan thu suangc nuh e.

¹⁷Mi ngai hei ngay bam nina e, kalam thu mi nungc hei ai rui nangniw zaat ta Izip kandic khou rui nduangh patlou the. Guang nimei ganv guay khou mi tingmik hei ngaekna ngay tanh tan bam nina e.

¹⁸Reymei bw tuang zaeng 14 nungc tingzyn rui thauna zaeng 21 nungc tingzyn nganv khay loumei ntyan akhat na sini tu lak nina e.

¹⁹Zaeng chanei nangniw kai khou khay nai lak nina e, kalam thu dilungmei pwni gin pwni khay loumei ntyan tumei ta tei thu Isaraelmei pang khou rui swluai ganc puni.

²⁰Nangniw rui bammei bamv kathuic khou khay loumei ntyan tulak nina e, khay loumakmei ntyan tu nina e.”

²¹Mousi rui Isaraelmei kapy nunc ta kaw kaduaina sa the, “Nangniw kathuicna lauziunac hamh e thei ziuhnac kadah lana hei tei dowluaina Kaanpatpui Ngai ngay tho.

²²Kaikhuang khou naimei khouringh zei khou tei hissop phwam ntin lana, hei tei kaimun-tiangc nei khatni kaimunpy khou tei teylou tho. Tinggaanh mak saanv meic gaanv khat na sini kapaengc pat nuh mak ge.

²³Izipmei nunc ta swluai khang RINGHPOUC Izip tat ruan pat pwkhou kamei rui kaimun-tiangc khatni kaimunpy khou zei naimei tei how pwkhou kamei rui Theihmei baanchara tei nang kai khou tigutna nangniw ta swluai mak puni.

²⁴Nangniw khatni nangniw nac guayna mi riak hei tingsaengzaeng tat bam nina e.

²⁵RINGHPOUC rui nangniw khang nrianhloumei kandic khou tei nangniw gut pwkhou, mi riak hei nangniw taanc nina e.

²⁶‘Nangniw nac nunc rui mi hei tabui tuang kalummei taanv cho’ twna thanv pwkhou

²⁷‘Mi hei RINGHPOUC ta champouhmei tuang kaanpatmei kalummei tuang taanv e, kalam thu kamei rui Izip khou Isaraelmei kai guay ta tatkaanlou the. Kamei rui Izipmei ta swluaina Isaraelmei ta nsaekclou the’ twna daw khang e.” Isaraelmei nunc tei tangkhungh keyna kalum the.

²⁸Kaniw tei tat patna RINGHPOUC rui Mousi lev Aron khou saloumei tei taanc the.

²⁹Zipchwng ganv khou RINGHPOUC rui Izipmei nareimei nac mpouh guay guangh bamv khou dungc bammei guangh nac mpouh khou rui thauna kangkai khou bammei kang bammeipu nac mpouh ta nganvna swluai the; kiruai guay tuang puanc reymei ni theic the.

³⁰Mi nungc zingbangc tei guangh, katuang meicdaihmei nunc, khatni baihmei Izipmei guay tei rak gaanc the. Izip kandic kapwm khou kaucna kapmei khwan rui padik the, kalam thu meic theih makmei kai kaikhunc akhat na sini maek khe.

³¹Mi nungc zingbangc kahak tei guangh rui Mousi lev Aron ta kaw guangna sa the, “Nang mei Isaraelmei nunc ta nduanghna tat kan tho! Akandih mpatlou tho; nangney rui ney bammei kumcna RINGHPOUC ta kiuc kalum tat tho.

³²Nangniw tuang khouringh khounah khatni kiruai guay nduangh tat tho. Kumna akhang ni suaihiam neylou o.”

³³Isaraelmei nunc tei Izip kandic khou rui tat pat katumc kanmei ta Izipmei rui kahaw the, kumna “Nangniw tat mak ge thei aniw theic ngam changh puni the” twna sa the.

³⁴Kumna Isaraelmei nunc tei khay loumakmei kaniloumei ntyan tei kaniw ntyan kabihmei lai khou lou padiklouna hei tei phey rui kasiatclouna kaniw bou khou puancna tat the.

³⁵Mousi rui samei tei Isaraelmei nunc tei taanc the, kumna kachaekc tuang khatni daandi tuang ntuh-ntah khatni pheybaan Izipmei nunc khou ney the.

³⁶RINGHPOUC rui Izipmei nunc ta tei Isaraelmei nunc ta chakhwang tiswna kaniw rui ney neymei tei tii the. Heikumna Isaraelmei nunc tei Izipmei lanv phungc tat the.

³⁷Isaraelmei nunc Ramesi khou rui kaamc thauna Sukkot nzwanna phay rui tat thau the. Ntumei khatni alauc ta chak makna nggaanvmei meic 600,000 ge.

³⁸Meic baihmei mpeyna lev khouringh khounah khatni guaih pang mpeyna kaniw nduangh tat khwan e.

³⁹Izip khou rui phungc patmei khay loumakmei kaniloumei ntyan dwm khou tei rui ntyan kasiamh the, kalam thu kaniw ta tei Izip khou rui thay mak daekna nthau pat tina kaniw ntyan kasiamh chamdaanv khang khatni khay loumei ntyan kanilou khang kaganv maek khwan e.

⁴⁰Isaraelmei nunc tei Izip khou tingkwm 430 lungclou khwan e.

⁴¹Tingkwm 430 luaimei tingmik nungc Ravguangc mei nunc tei Izip mpatlou the.

⁴²Kaniw ta Izip khou rui nduangh pat khang RINGHPOUC rui nkhwan bammei tei zingbangc khwan e; guang nimei ganv guay khou Isaraelmei nunc nkhwanna bam khang mi nungc zingbangc tei RINGHPOUC khou katgutlou the.

⁴³RINGHPOUC rui Mousi lev Aron khou sa the, “Mi hei Kaanpatpui Ngai khou sw nimei riak ge: Ginnac gaanv khat na sini kaanpatmei taektw tu nuh mak ge,

⁴⁴kum e tiki nang rui liuloumei bangc thu gihruamc tangmei e thei tu nuh e.

⁴⁵Bam khanvloumei hamh e thei taanv phic bammei nunc tei thu tu nuh mak ge.

⁴⁶Mi taektw tei kasiamhmei kai kainung khou tei rui tu ngam nina e; hei tei kaizaengc thangc laa pat nuh mak ge. Mi khouringc rou tei akhat na sini swbau nuh mak ge.

⁴⁷Mi ngai hei Isaraelmei kapwmna rui ngay nina e.

⁴⁸Kum e tiki kagic ruamh makmei rui thu hei tei tu nuh mak ge. Nangniw ding khou bammei zaatc baihmei rui RINGHPOUC ta chakhwang swna mi kaanpatmei ngai hei ngay nii e thei, kakai kaikhuncmei nggaanvmei guay tei gihruamc rey nina e. Kumna kata tei dilungmei akhat kumcna swlouna mi ngai khou tei tikazauh nuh e.

⁴⁹Mi riak hei dilungmei Isaraelmei khatni nangniw pang khou lungc bammei Isaraelmei rui tat nimei riak ge.”

⁵⁰RINGHPOUC rui Mousi khatni Aron khou latdanv swna tiiloumei guay tei Isaraelmei rui piuna taanc the.

⁵¹Mi tingmik nungc hei RINGHPOUC rui Isaraelmei ta Izip khou rui thuakpatlou the.