Read Rongmei Naga TATPATMEI 15 Bible Online

TATPATMEI 15 - Rongmei Naga bible

TATPATMEI 15

¹Khoutei Mousi khatni Isaraelmei nunc rui mi lu hei RINGHPOUC khou suanlou the: “Ai RINGHPOUC khou suan ni, kalam thu katik kahym rui rih ngamlou the; kamei rui takuanh pang khatni mi khou tei tuangc guangmei nunc ta duipui khou phaiclou the.

²RINGHPOUC hei apumtan khatni alu the; kamei hei ata kanloumeipu e. Kamei hei aRacguangc e, kumna ai rui kata thuanc ni, kamei hei apu apouc Racguangc e, kumna ai kahym ta suan kauh ni.

³RINGHPOUC hei rihmei e; RINGHPOUC twmei hei kazanc e.

⁴“Kamei rui Izipmei ricmei nunc khatni rih gari guay ta duipui khou phaiclou the, kaniw tuang gay liangmei meicdaihmei nunc tei Ntou duipui khou alip luai the.

⁵Nthukcmei duipui rui kaniw ta gumbin kan the; kaniw tei ntauhbut kumc duisyng thangc limc kan the.

⁶“He RINGHPOUC, nang baanzat ngamv hei meicpingmei tuang e; hei tei rui zauczihmei nunc ta siaucpuat paruatlou the.

⁷Ngammei ramngam khou nang rui nang ta zauczihmei nunc ta ngamlou the. Nang lungpuam chuangc thauna napgou ta kumc kaniw ta raw kan the.

⁸Nang nwkwang khou rui patmei thiu tei rui dui tei ngaengsaengc kumc kakhuan kakhuan khuan kan the. nthuk liangmei duipui syng tei ramvkiang guanh kan the.

⁹‘Ai rui kaniw ta nthauna nym ni ai rui kaniw tuang lanv nzanh puni; kumna ai kahawmei guay laa puni. Ai rui atuang baengsaeng satpatna kaniw khou naimei guay ai rui laa puni,’ twna kaniw rui sa the.

¹⁰Tiki nang tuang thiu amuan pat pwkhou; duipui rui kaniw ta gumbin kan the. Duipui duidai khou tei kaniw ntanh limh kumcna limc kan the.

¹¹“He RINGHPOUC, rav pang khou tabui rav tei nang kumhmei naina cho, nthanmei khou charynmeipu? thow tei rui nang kumcna charynmei khatni taanv daihmei hei taanc ngam cho?

¹²Nang baanzat tei ntyng pat pwkhou aniu ta zauczihmei nunc ta kandih rui aluakc kan the.

¹³Nang rui thuakloumei nunc ta nang tuang taek makmei ramzian rui zaylou the, nang tuang pumtan rui nthanmei kai khou zaylou the.

¹⁴Zaatc nunc rui chu the, kumna kaniw ping kadunh the; Philistinmei nunc tei pingmei rui ramh sw la khang thay mak khe.

¹⁵Edommei kapy nunc tei ping the; Moab tuang tancbauhmei nunc tei kadunh the; Kanaanmei tei kabau maek khe.

¹⁶Pingmei rui kaniw khou padik the. He RINGHPOUC, kaniw nang ngamv how the— kumna nang mei nunc tei tat kaan pat kan mak saanv pingna ramh sw la khang thay makna ding bam e bangh khou rui nang rui ricpatloumei nunc tei tat ruan pat pwkhou.

¹⁷Nang rui kaniw ta tei phungc guangna nang tuang chyngbut khou lingclou e, He RINGHPOUC, nang rui nang kai khang kadahloumei bamv khou tei, nang rui kasiamhloumei Ravkai khou lingclou the.

¹⁸He RINGHPOUC, nang hei tingsaengzaeng guangh sw puni.”

¹⁹Isaraelmei nunc tei duipui chung khou ramvkiang khou tat kaan the. Tiki Izipmei tuang rih gari guay takuanh lev kazauhna khatni gari thoucmei nunc tei duipui chung khou tei gut pwkhou, RINGHPOUC rui dui tei tiguang dat the, kumna kaniw ta liak bin kan the.

²⁰Muhzwng Miriam, Aron kainacpui, katuang syamtuaihkhuangc sinna, ntumei guay rui ni syamtuaihkhuangc sinna alaamh the.

²¹Miriam rui kaniw khou kumna lu suanlou the: “RINGHPOUC khou suanlou o, kalam thu katik kahym rui rih ngamlou the; kamei rui takuanh nunc khatni mi khou tei tuanghmei nunc ta duipui khou phaiclou the.”

²²Hei tangv tei Mousi rui Isaraelmei nunc ta tei Ntou duipui khou rui Shur tuang tazikramv khou nduanghlou the. Tazikramv khou tei kaniw zaeng neih thumh tat the, hei khou tei dui ariw mak khe.

²³Hei tangv kaniw tei Mara twna kawmei bamv khou guang the, mi khou tei naimei dui tei nkhuc tina kaniw zangv nuh mak khe. Kum tina kaniw rui mi bamv ta tei Mara twna kaw the.

²⁴“Aniu tabui tuang zangv nina cho?” twna kaniw rui Mousi khou nutna sa the.

²⁵Mousi rui Ravguangc khou huayney ranvna huayney pwkhou, RINGHPOUC rui kakhou thingchiang akhat lyanlou the. Kamei rui hei tei dui khou tei phaiclou pwkhou mi dui tei zangv nuh dat the. Hei khou tei RINGHPOUC rui kaniw lungc nipui riak kaniw khang tiilou the, khatni kaniw ta nchanv the.

²⁶RINGHPOUC rui sa the, “RINGHPOUC nangniw Racguangc khwan tei nking chuyna kamik zuat khou nchumhmei tei taancna, kalatdanv guay tei nangniw lunghlouna piu e thei, ai rui Izipmei nunc khou tiguang kanmei riapkanmei akhat na tei sini nangniw khou tiguang lak ge, kalam thu ai hei nangniw ta tigayloumei RINGHPOUC e.”

²⁷Mi tangv tei kaniw Elim khou guang the, hei khou tei duipuakkai 12 khatni tadanv bang 70 nai khwan e; khou tei dui daeng khou tei kaniw zypui sw the.