Read Rongmei Naga TATPATMEI 17 Bible Online

TATPATMEI 17 - Rongmei Naga bible

TATPATMEI 17

¹Isaraelmei kapwm tei Sin tuang tazikramv khou rui tat thau datna, RINGHPOUC tuang latdyn theilayna zypui kalaic kalaicna tat bam khwan e. Kaniw Rephidim khou zypui guang sw the, tiki khou tei dui maek khwan the.

²Kaniw rui Mousi ta nutna, “Aniw zangv khang dui tii tho” twna sa the. Mousi rui daw the, “Nangniw tabui swna pian makna katuaih-kaninh bam tu cho? Tabui swna nangniw RINGHPOUC ta nchanv bam tu cho?”

³Kum e tiki meic nunc tei mpeyna tari the kumna kaniw Mousi khou nutna sa the, “Tabui swna nang aniw ta Izip khou rui nduangh pat tu cho? Aniw ta, aniw nac nunc khatni khouringh khounah ta dui khaengvna swluai khang phungc patlou tu cho?”

⁴Mousi rui kalung kabiuna huayneyna RINGHPOUC khou sa the, “Mi nunc khou hei ai tabui tuang sw kho cho? Kaniw ata ntauh nkwam puni the.”

⁵RINGHPOUC rui Mousi khou sa the, “Isaraelmei kapy nunc asaekc ta nduanghna meic nunc hu khou tat kasuakcna tat pat tho. Nang Nail duithuak ta bai kanmei builwang tei sin o.

⁶Sinai Chyng khou tei nang hu khou ntauh ruc khou ai ding bam puni. Mi tauc ta tei kagit tho kum pwkhou meic nunc tei zangv khang dui pat puni the.” Isaraelmei kapy nunc hu khou tei Mousi rui hei tei sw the.

⁷Mi bamv zanc tei Massa khatni Meriba twna phuaklou the kalam thu “RINGHPOUC hei aniu pang khou bam di ny hamh e thei bam mak khena cho?” twmei tuang e.

⁸Amalekmei rui guangna Isaraelmei ta Rephidim khou adow the.

⁹Mousi rui Joshua khou sa the, “Nthuanh kiu Amalekmei ta adow khang meic kadah tho. Ravguangc rui ata sin o twna samei builwang tei zay thauna ai chyngbut ruc khou hei dingna bam puni.”

¹⁰Mousi tuang latdanv theilayna Joshua rui tancna Amalekmei ta adow khang pat the. Khoutei Mousi, Aron khatni Hur chingcbut thangc tei ku the.

¹¹Mousi rui kabaanc zay thau bam saanv Isaraelmei rui ngam the, kabaanc tei lou key ti thei Amalekmei rui ngam gut dat the.

¹²Mousi baanc tei anang guang pwkhou Aron lev Hur rui Mousi bamv khang ntauh puanc guanglouna kaney rui kadaeng khou dingna neih key mak saanv kabaanc tei hou nkhavlou the.

¹³Hei tei kumna Joshua rui Amalekmei ta rih ngam the.

¹⁴Khoutei RINGHPOUC rui Mousi khou sa the, “Mi ric ramngam hei ningtow bam khang hykeylou o. Ai rui Amalekmei ta swmaan mutsutlou puni twna Joshua khou sa tio.”

¹⁵Mousi rui khou tei ravchabamv kasiamh thauna mi zanc tei “RINGHPOUC hei atuang chuangcphey e” twna phuaklou the.

¹⁶Kamei rui sa the, “RINGHPOUC tuang chuangcphey tei zay kauh thau o! RINGHPOUC rui Amalekmei ta meickin meickin adow bam puni!”