Read Rongmei Naga TATPATMEI 19 Bible Online

TATPATMEI 19 - Rongmei Naga bible

TATPATMEI 19

¹Isaraelmei nunc tei Rephidim mpatlouna, Izip kandic mpatloumei tangv kathumhmei bw tuang rey liangmei tingmik nungc Sinai tuang tazikramv khou guang tangc the.

²Hei khou tei Sinai chyng phay khou zypui kai kasiamh thau the.

³Mousi tei Ravguangc ta ariw khang chyngbut thangc tei ku kan the. RINGHPOUC rui chyngbut thangc tei rui kata kawna Isaraelmei, Jakob kikta nunc khou tei kumna sa o twna sa the.

⁴“RINGHPOUC, ai rui Izipmei nunc khou taanclou kanmei khatni mouckauh rui kanac nunc ta kaswkaeng khou louna phunghmei kumcna ai rui nangniw ta adaeng khou phungc guangloumei hei nangniw how the.

⁵Ntaw thu, nangniw rui alat piu pw e thei khatni atuang latdyng hei ngaek pw e thei nangniw hei amei nunc sw puni the. Mbaanv kapwm hei atuang e, tiki nangniw thu akhang kapahloupui mei nunc sw puni,

⁶akhou na kha katgutloumei nunc sw puni, kumna nangniw amuh nunc swna asiamruai sw puni.”

⁷Kumna Mousi tei key dat lana kaniw tuang kapy swmei nunc ta kaw kaduaina RINGHPOUC rui kakhou kadyloumei guay tei kaniw khou raclou the.

⁸Kumna meic guayna tei rui daw nchamc raph rapna “RINGHPOUC rui samei guayna tei aniw taanc ni the” twna daw the. Hei tei Mousi rui RINGHPOUC khou poulou kan the.

⁹RINGHPOUC rui Mousi khou sa the, “Ai rui nang ta kachuc bammei tei meic nunc rui chu lana ntaw khou rui thauna nang ta lwm diu khang, ai muangh zingh zingmei khou rui nang khou guang puni the.” Meic nunc rui dawmei lat tei Mousi rui RINGHPOUC khou dinclou the,

¹⁰kumna RINGHPOUC rui kakhou sa the, “Nang rui meic nunc khou tei tatna kalum khang aseic khatni nthuanh hei pumh nthan tho twna sa tho. Kaniw tuang pheybaan guay sou nthanna

¹¹neihthumh puinungc thu nkhwan bam nina the. Mi nungc kiu meic guayna how nuh khang ai Sinai Chyng khou key puni.

¹²Meic nunc rui tat kaan gut nuh makmei langv mi chingcbut khou tei riat nkuaylou tho, kumna mi chingcbut khou tei kaniw ku nuh mak ge, kadaeng khou nganvna guang nuh mak ge twna sa tho. Thowkumhmei rui mi khou tei kaamclou e thei, kata tei swluai nina e;

¹³kata tei baanh rui kahi makna ntauh rui ndat luai nina e, hamh e thei sauhpai rui kaap luai nina e. Mi hei khouringh ta ni maansei ta ni di the; swluai rap nina di the. Tiki bianggun amuan pwkhou, meic nunc tei chyngbut khou tei ku nina the.”

¹⁴Khoutei Mousi tei chyngbut thangc tei rui key dat lana meic nunc ta tei rav kalum khang tei chamdaanv khang sa the. Kumna kaniw tei kaniw tuang pheybaan sou nthan the,

¹⁵kumna Mousi rui kaniw khou sa the, “Neihthumh puinungc kiu chamdaanvna bam tho, kumna mi dak khou hei ntumei khou tatlou nuh mak ge.”

¹⁶Zaeng neih thumh nungc lauthwan tei tingpalik-ganhkey the, mi chingcbut khou tei muangh zingh zingmei gwam guang the, kumna bianggun khwan ranv sihmei akhat chu the. Zypui khou bammei guayna tei ping kadunh the.

¹⁷Ravguangc ta ariw khang Mousi rui kaniw ta nduangh pat the, kumna kaniw tei chyngphay khou tei ding bam the.

¹⁸Sinai Chyng kapwm tei maikhou rui gwamliam the, kalam thu RINGHPOUC mi khou tei mai khou key the. Maikhou tei maikhou kai khou ku kumc khou ku the, kumna chyng guay tei ping kadunh the.

¹⁹bianggun khwan tei ranv khith khit thau the. Khoutei Mousi rui sa the, kumna Ravguangc rui ganhkey kumcna daw the.

²⁰RINGHPOUC Sinai Chyng twan khou tei key the kumna Mousi ta mi chingc twan thangc tei ku khang kaw the. Mousi tei ku pwkhou

²¹RINGHPOUC rui kakhou sa the, “Meic nunc tei ata guang zauh khang rui twna riatloumei ryan tei kaamc twanna gut mak khang keyna sa tho; kaniw hei tei twanlou e thei, kaniw theic puni.

²²Adaeng khou guang tuanc nimei amuh nunc tei nganv pumh nthan nina e, hamh e thei ai rui kaniw ta dandi tii puni.”

²³Mousi rui RINGHPOUC khou sa the, “Meic nunc tei mi Sinai chyng khou hei thu ku ngam ni tuang hamh the, kalam thu mi hei nthanmei sw khang khatni mi chingcbut tihei riat nkuaylou khang nang rui sa the.”

²⁴RINGHPOUC rui daw the, “Nang key dat lana Aron ta nduangh ku o. Tiki amuh nunc khatni meic nunc tei adaeng khou guang mak khang rui twna riatloumei ryan tei twan ngangh nuh mak ge, twan e thei ai rui kaniw ta dandi tii puni.”

²⁵Mousi tei meic pang khou key dat lana RINGHPOUC rui samei lat tei kaniw khou salou the.