Read Rongmei Naga TATPATMEI 24 Bible Online

TATPATMEI 24 - Rongmei Naga bible

TATPATMEI 24

¹RINGHPOUC rui Mousi khou sa the, “Aron, Nadab, Abihu, Isarael tuang kapy gaanv 70, khatni nang lev twna chyngbut khou adaeng khou ku tho; kumna nangniw rambiuc dou duh thangc bam khou rui nkhum keyna kalum tho.

²Nang rana adaeng guang tuanc nina e, baihmei guay thu guang tuanc nuh mak ge. Meic nunc tei thu chyngbut khou tei sini ku nuh mak ge.”

³Mousi rui tatna RINGHPOUC tuang latdyn guay khatni latdanv guay tei meic nunc khou tei raclou the, kumna meic nunc tei rui daw nchamcna daw the, “RINGHPOUC rui samei kaguayna tei aniw taanc ni the.”

⁴RINGHPOUC tuang latdanv guay tei Mousi rui hy keylou the. Nthuanh lauthwan thwanzingh kamei rui mi chingcphay khou tei ravchabamv kasiamh thau the, kumna Isaraelmei kaikhwang 12 sing ntauh khat khat laana ntauh 12 khuan thau the.

⁵Khoutei kamei rui chabwan nunc ta thouclouna kaniw tei rui Ravguangc khou rawna khaeng the, kumna alamvpuatkat swna guaih asaekc kaniw rui khaeng the.

⁶Mousi rui khouringh nunc zei tei kapaek akhat laana zeisiankuak khou lou the; kumna baihmei kapaek akhat tei ravchabamv hu khou tei bowlou the.

⁷Hei tangv tei kamei rui Ravguangc tuang latdanv hyloumei latdyng latrik buk tei laana pac ranvna meic nunc khou tei pac the. Kaniw rui sa the, “Aniw RINGHPOUC lat piu ni, kamei rui latdanv tiimei guay tei aniw taanc ni.”

⁸Hei tangv zeisiankuak khou naimei zei tei Mousi rui laa lana meic nunc khou tei nroulouna kamei rui sa the, “Mi zei hei RINGHPOUC kamei rui mi latdanv guay hei piu bam khang swloumei latdyng tei sil nymloumei tuang zei the.”

⁹Mousi, Aron, Nadab, Abihu, khatni Isarael tuang kapy gaanv 70 tei chyngbut khou tei ku the.

¹⁰Kumna kaniw Isarael Racguangc ta how the. Kaphay bangc khou saphir tauc kumhmei rui tappiangh piangloumei tingpuk kumcna nrym raih raimei how the.

¹¹Ravguangc rui mi kapy nunc ti hei tikabiulou mak ge; kaniw Ravguangc ta how the, kumna mi tangv tei kaniw tu nchamc zangv nchamc the.

¹²RINGHPOUC rui Mousi khou sa the, “Nang chyngbut khou tei kuna adaeng khou guangna khou tei bam o. Kaniw ta nchamlou khang rui ai rui latdanv guay hyloumei tauhpaek kanei tei nang khou tii puni the.”

¹³Mousi tei kata nkhav bammeipu Joshua lev twna tat thau the, kumna Mousi tei Ravguangc tuang chyngbut khou tei ku the.

¹⁴Mousi rui kapy nunc khou sa the, “Aney key dat mak saanv nangniw mi zypui khou aney ta nkhwan bam khwan o. Aron lev Hur kaney hei nangniw daeng khou bam puni, kumna thowkumhmei latlu patmei tuang nai e thei kaney daeng khou guang o.”

¹⁵Mousi tei Sinai Chyng khou tei ku kan the, kumna muangh rui mi chingc tei gumbin kan the.

¹⁶RINGHPOUC tuang hym gaanhmei tei Sinai Chyng khou tei keylou bam the. Zaeng charuk mi chingc tei muangh rui gumbin the, kumna zaeng chaneipui nungc RINGHPOUC rui muangh khou tei rui Mousi ta kaw the.

¹⁷RINGHPOUC tuang hym gaanhmei tei chyng twan khou tei mai chuangc bam tu kumcna Isaraelmei rui how the.

¹⁸Mousi tei muangh lungc khou tei tat gut the. Khoutei kamei zingbangc 40 kalaanv 40 bamlou the.