Read Rongmei Naga TATPATMEI 25 Bible Online

TATPATMEI 25 - Rongmei Naga bible

TATPATMEI 25

¹RINGHPOUC rui Mousi khou sa the,

²“Isaraelmei nunc tei akhang tiipat khang sa tho. Thow thow rui pwni tii tiimei puatkat tei laalou tho.

³Mi tuang puatkat guay kiu thu: daandi, kachaekc, tanzinc;

⁴linen phey gaymei, ramh hiw phey nrymmei, haengcnrymmei khatni haenghmei; ziuh hiw phey;

⁵nsangh haengcloumei lauziuchic tuang gic phey; ramhgic gaymei; akasia thing;

⁶mai thauc; maruai khatni karym namh gaymei agaw

⁷tingkuh tuang pwan khou lou nimei kunghmei ntauh zaat guay hei kat nuh e.

⁸Ai rui meic pang khou tei bammei bamv khang meic nunc tei rui akhang nthanmei pheykai akhat kasiamhlou nina e.

⁹Mi kai khatni mi khou tei lou nimei puat guay tei ai rui lyanloumei theilayna kasiamh nina e.

¹⁰“Chowbuk kanei kapaek saenghmei, chowbuk akhat kapaek daihmei khatni chowbuk akhat kapaek kauhmei akasia thing tuang thingkhuk akhat kasiamh o.

¹¹Kalungc kapaengc kapwm tei kachaekc rui duap liam nina e, khatni kakung guay tei kachaekc rui zuylou nina e.

¹²Puanhmei nu khang kachaekc tuang kahaengv padeih kasiamhna hei tei kahyang padeih khou tei duanclou nina e — kanaek akhat khou kanu kanei kanei lou nina e.

¹³Puanhmei luang khang akasia tuang thingluang kasiamhna hei tei kachaekc rui lup nina e,

¹⁴kumna hei tei kanaek kanei khou tei khat khat huilou nina e.

¹⁵Mi phuang kanei tuang kanu khou tei huilou kan e thei laa pat dat makna lou nzut bam nina e.

¹⁶Atuang latdanv guay hyloumei ai rui tii pw nimei ntauhpaek kanei kiu mi khou tei lou nina e.

¹⁷“Chowbuk kanei saenghmei khatni chowbuk akhat kapaek daihmei kagwm kachaekc nthanmei rui kasiamh nina e.

¹⁸Kachaekc tuang kerubim kanei kasiamhna

¹⁹kagwm tuang kapy kaba khou tei lou nina e. Hei tei kagwm tei lev kapumc akhat na rui sw nina e.

²⁰Kerubim kanei tei kaney zaw puanc achow nina e khatni kaney swkaeng tei baengc alamv nina e.

²¹Ntauhpaek kanei tei mi lungc khou tei louna kagwm tei rui gumbinlou nina e.

²²Mi bamv khou tei ai rui nangniw ta ariw puni the kumna kerubim kanei kak khou tei rui Isaraelmei khang ai rui atuang latdanv tiipat puni.

²³“Chowbuk kanei saenghmei, chowbuk akhat daihmei khatni chowbuk akhat kapaek kauhmei akasia thing rui kasiamhmei paeng akhat taanc o.

²⁴Hei tei kachaekc rui duap liamna katin tei kachaekc rui zui o.

²⁵Baanhpav akhat paekcmei katin kasiamh nkuay lana mi tin tei kachaekc dui rui teylou o.

²⁶Hei tei puanc kalw khang kachaekc tuang nu haengv padeih kasiamh nina e, kumna hei tei kahyang naimei kwn padeih khou tei akhat akhat lou tho.

²⁷Puanc kalw khang kanu haengv lou nimei tei katin daeng khou tei kulou nina e.

²⁸Akasia tuang thingphuang kasiamhna hei tei kachaekc rui luplou nina e.

²⁹Drakhadui kat khou sinsw khang kuak, buangh, muanh khatni kaikhuang kasiamh nina e. Mi guay tei kachaekc nthanmei rui kasiamh nina e.

³⁰Mi paeng tei latdyng khuk mav khou tei lou tanh tan bam nina e kumna mi paeng ruc khou tei akhang rui katloumei nthanmei ntyan mbaenglou tanh tan nina e.

³¹“Kachaekc Nthanmei rui thauhmai hyang akhat kasiamh o. Kabamv khatni kahyang tei tandiak rui dyna kasiamh nina e; kapwang tei kapuangnuy paek khatni kamwm tei kapumc akhat na rui sw nina e.

³²Khoutei kachiang charuk baanzat baandau kathumh kathumh nai nina e.

³³Kachyang kathuic khou tei almon pwang kumhmei kapwang akhat akhat lou nina e.

³⁴Katiangc khou tei almon pwang kumhmei padeih kasiamh nina e, akhatni kahyang kasing pum tei kamwm kasiamhlou nina e.

³⁵Kachy patmei bamv bang kathuic khou tei kamwm akhat akhat lou nina e.

³⁶Kamwm, kachy guay khatni kahyang tei dyloumei kachaekc nthanmei pumh akhat na rui sw nina e.

³⁷Katiangc chanei khou tei thauhmai chanei lou o kumna hei tei kahu biak thangc tei gaanc gut bam khang daanclou o.

³⁸Mi tuang tiangkap khatni puanhmei kuak tei kachaekc nthanmei rui kasiamh nina e.

³⁹Thauhmai hyang khatni mi tuangna guay tei kachaekc nthanmei pound 75 rui kasiamh nina e.

⁴⁰Ai rui nang khou chyngbut ruc khou lyanlou kanmei tei kumcna mi guay tei kasiamh khang sw nina e.