Read Rongmei Naga TATPATMEI 26 Bible Online

TATPATMEI 26 - Rongmei Naga bible

TATPATMEI 26

¹“Ai bam nimei kalummei pheykai kainung tei nrymmei, haengcnrymmei khatni haenghmei gaymei linen langc rui dakloumei phey ruh rui katingh nina e. Mi guay khou tei kerubim maengc luanh chuyna luanhlou nina e.

²Phey kaguayna tei kasaeng kadai nchamcna chowbuk 28 saengc, padeih daic nina e.

³Phey panguh panguh hui kariuna kanaek kanei khou tei lou nina e.

⁴Katinmei phey tin khou tei langh nrymmei rui kanu lou nina e.

⁵Reymei pheykin tuang reymei phey tin khou tei kanu 50 lou nina e khatni kaneimei phey kin tuang nkhamhmei phey tin khou tei reymei tei lev zaengchamcna kanu 50 lou muay nina e. Kumna pheykin kanei tei khat khat ta puanc achow nina e.

⁶Mi pheykin kanei tei kachaekc tuang kanu 50 nai nina e kumna pheykin kanei tei gou kariulou nina e, hei tei rui pheykai akhat na sw khang e.

⁷“Mi pheykai tei gumbin khang ziuh hiw phey 11 kasiamh nina e.

⁸Mi guay tei kasaeng kadai nchamcna chowbuk 30 saengc, padeih daic nina e.

⁹Panguh rui kakin akhat khatni charuk rui kakin akhat twna hui kariu nina e. Charukmei phey tei kalummei pheykai kaimav khou tei nchung khou rui kadiplou nina e.

¹⁰Kakin akhat tuang nkhamhmei phey tin khou tei kanu 50 paanclou nina e khatni baihmei kin akhat khou tei ni katin akhat khou kanu 50 lou nina e.

¹¹Mi pheykin kanei tei gou kariulou nuh khang tanzinc tuang khuay 50 ni paanclou nina e. Hei tei rui kai akhat na sw khang e.

¹²Phey laek akhat tuang kapaek mbumei tei pheykai kathei thangc tei thaengc keylou nina e.

¹³Kadai khou rui kanaek kanei khou chowbuk akhat akhat mbu patmei tei kainaek kanei khou tei thaengc keylou nina e.

¹⁴“Mi kai gwm khang tei nsangh haengcloumei lauziuchic gic khatni guaih gic gaymei rui kasiamhmei tuang kaigwm kanei kasiamh nina e.

¹⁵“Kai tiangc khang akasia thing rui kasiamh nina e.

¹⁶Katiangc akhat tei chowbuk 10 kauhmei khatni chowbuk akhat kapaek daihmei nina e.

¹⁷Katiangc guay tei nsuk alamv nuh khang katiangc khou tei rui kabaanc kanei saengc pat nina e. Katiangc kaguayna tei mi kumhmei mbu patmei baanc hei nai nina e.

¹⁸Dihba biak thangc khang katiangc 20 kasiamh nina e.

¹⁹Katiangc tei dungclou khang daandi tuang bamv 40 ni kasiamh nina e. Katiangc akhat khou tei daandi tuang kabamv kanei kanei lou nina e khatni kabaanc khou akhat akhat lou nina e.

²⁰Pheykai tuang dihpy biak thangc khang tei katiangc 20 kasiamh nina e.

²¹Katiangc khang daandi tuang kabam 40 kasiamhna katiangc akhat bangc khou kanei kanei lou nina e.

²²Neihkey biak kaithei khang tei katiangc charuk khatni,

²³kakwn khang katiangc kanei kasiamh nina e.

²⁴Mi kakwn tiangc kanei hei kaphayba khou kanei dwan puni katwan nganv loudacna lou nina e. Kakwn kasiamh nimei tiangc kanei tei mi hei kumcna kasiamh nina e.

²⁵Kumna mi khang tei katiangc tachat khatni kabamv 16 nai nina e.

²⁶“Akasia thing tuang kaluang 15 kasiamh nina e. Panguh rui pheykai naek akhat luang khang

²⁷panguh akhat rui kanaek akhat thangc khatni baihmei panguh tei rui neihkey biak kathei thangc khang e.

²⁸Nchungmei luang, katiangc pang tuang nchung khou patmei tei kalummei pheykai kaithei kaihu tei kathi alamv pat nina e.

²⁹Katiangc guay tei kachaekc rui duam nina e, kumna kalangv tei karilou khang katiangc guay tei kachaekc tuang ntiangh-nu lou nina e. Mi luang guay tei ni kachaekc rui duam nina e.

³⁰Kalummei pheykai tei ai rui nang khou chyngbut khou lyanlou kanmei tei kumcna kasiamh nina e.

³¹“Nrymmei, haengcnrymmei khatni haenghmei gaymei linen langc rui dakloumei phey khamthinghphey khang kasiamh nina e. Khoutei kerubim maengc luanh chuyna luanhlou nina e.

³²Kachaekc rui duamloumei, khuay paancloumei, daandi tuang bamv padeih khou dingloumei akasia thing tiangc padeih khou tei hei tei thaengclou nina e.

³³Mi khamthinghphey tei kairuak khou ntanh haengv thaengc suakloumei khou tei ntalou nina e, kumna ntauhpaek kanei loumei latdyng khuk tei khamthinghphey lungc thangc tei lou nina e. Hei tei rui Nthanmei khatni Nthan Liangmei Bamv kanei ta tei daengc langc puni.

³⁴Zauzian bamvpaeng tei latdyng khuk ruc khou louna hei tei nthan liangmei bamv khou tei lou nina e.

³⁵Nthan Liangmei Bamv paengc khou tei, ntyan paeng tei dihpy biak thangc khatni thauhmai tiangc tei dihba biak thangc lou nina e.

³⁶“Pheykai kaimun phey khang nrymmei, haengcnrymmei khatni haenghmei linen langc gaymei rui dakmei phey kasiamh nina e.

³⁷Mi tiangc khang tei akasia tiangc panguh kasiamh nina e. Hei tei kachaekc rui duam nina e khatni kachaekc tuang khuay duanclou nina e. Mi tiangc guay bamv khang tei tanzinc tuang bamv panguh kasiamh nina e.