Read Rongmei Naga TATPATMEI 27 Bible Online

TATPATMEI 27 - Rongmei Naga bible

TATPATMEI 27

¹“Akasia thing tuang ravchapaeng kasiamh nina e. Hei tei chowbuk kathumh kauh, chowbuk panguh saengc, panguh daic nina e.

²Kakwn padeih khou tei kachei padeih lou nina e. Mi chei guay tei ravchapaeng tei lev kapumc akhat na sw nina e khatni mi guay tei tanzinc rui duam nina e.

³Mbut lou khang laipaek kasiamh nina e, mbut suak kuak, zeisiankuak, zanh nruang, khatni maikuak ni kasiamh nina e. Mi guay hei tanzinc rui kasiamh nina e.

⁴Tanzinc tuang raengv kasiamh nina e kumna ravchapaeng kwn padeih khou tei puanh khang tanzinc tuang kanu padeih ni kasiamh nina e.

⁵Mi raengv tei ravchapaeng tin khou tei rui louna ravchapaeng kapaek tei lou key tangc nina e.

⁶Hei tei puanhmei phuang khang akasia thing rui kasiamhna hei tei tanzinc rui duamlou nina e.

⁷Hei tei puanc tat ni khou ravchapaeng tuang nu khou tei mi phuang tei huilouna puanc nina e.

⁸Ai rui nang khou chyngbut khou tei lyanlou kanmei tei kumcna ravchapaeng tei kalungc phou nina e.

⁹“Atuang kalummei pheykai tei gaymei linen phey rui karaengv raeng nina e. Dihba biak thangcmei raengv tei chowbuk 100 saengc nina e.

¹⁰Hei tei tanzinc bamv khou dungcloumei tanzinc tiangc 20 rui phungc nina e. Mi tiangc nu khatni kaluang tei thu daandi rui sw nina e.

¹¹Dihpy biak tei ni hei tei lev nchamc raph rapna kasiamhlou nina e.

¹²Neihkey biak tei karaengv phey tei chowbuk 50 saengc nina e, kumna katiangc 10 rui phungc nina e.

¹³Neihpat biak, chaengmun naimei biak tei ni chowbuk 50 saengc muay nina e.

¹⁴Kaimun khat biak thangc tei khamthingphey chowbuk 15 saenghmei, hei tei kabamv khou loumei katiangc kathumh, kabamv kathumh nai nina e.

¹⁵Hei tei kumcna khat biak thangc ni khamthingphey chowbuk 15 saenghmei kabamv khou loumei katiangc kathumh rui phungc nina e.

¹⁶Kaimun khou tei nrymmei, haengcnrymmei khatni haenghmei chowbuk 20mei mpinh rui ramhmaengc luanhloumei linen phey lou nina e. Hei tei kabamv khou dungcloumei ntiangh padeih rui phungc nina e.

¹⁷Katiangc nai ngguimei guay tei daandi luang rui hui alamvlou nina e, kumna kanu tei daandi rui khatni kabamv tei tanzinc rui sw nina e.

¹⁸Karaengv tei chowbuk 100 saengc 50 daic khatni chowbuk panguh kauh nina e. Kaphey guay tei linen phey gaymei rui kasiamh nina e khatni katiangc bamv guay tei tanzinc rui kasiamh nina e.

¹⁹Pheykai khou sinsw nimeina guay khatni kalummei pheykai lev kairaengv tiangc riang banghmei muihtiangc guay tei tanzinc rui sw nina e.

²⁰“Thauhmai tei tingzyn pum daanc tanh tan bam nuh khang gaymei Olive thauc phungc guang bam nina e twna Isaraelmei guay khou sa o.

²¹Atuang pheykai khou Latdyng Khuk hu khou naimei khamthinghphey hu khou tei Aron khatni kanac mpouh nunc rui thauhmai tei lou nina e. Mi khou tei ahu khou mi thauhmai tei tingzyn khou rui lauthwan nganv chuangcna bam nina e. Isaraelmei rui mi latdanv hei meickin meickin taanc bam nina e.