Read Rongmei Naga TATPATMEI 29 Bible Online

TATPATMEI 29 - Rongmei Naga bible

TATPATMEI 29

¹“Aron khatni kanac mpouh nunc rui amuh swna atuang taanv taanh khang kaniw ta katlou khang sw nimei taanv kiu mi hei the. Hiaksuimei guaituamchic akhat khatni lauziuchic kanei laaguang nina e.

²Khay kazauh makna gay liangmei gehu buay rui Olive thauc kanina ntyan kasiamh nina e, gaanvsaekc rui thauh kani makna thauh teyna kasiamh nina e.

³Mi guay tei nggiuh khou louna nangniw rui guaituamchic khatni lauziuchic khaeng pwkhou kat kazauh nina e.

⁴“Aron lev kanac mpouh nunc ta tei atuang kalummei pheykai kaimun khou nduangh guangna kaniw pumc nthanna duilow khang sa tho.

⁵Mi tangv tei Aron ta tei amuh tuang pwan — thiula, ephod, ephod lungc khou numei thiula, ngaengvthuapc, khatni bungkam tei piu nthuih o.

⁶Kapy khou pygwm tei gumlou tho kumna “Nthanmei hei RINGHPOUC khang sw diu” twna hyloumei paek khou tei thaengclou tho.

⁷Kum lana tey nimei thauc tei laana, kapy khou bunlouna, kakhou teylou tho.

⁸“Kanac mpouh nunc ta ni kaw guangna kaniw khou thiula nulou tho;

⁹kaniw sian khou siangiat giatlou tho, khatni kaniw py khou pygwm guplou tho. Heikumna nangniw rui Aron khatni kanac mpouh nunc ta katgutlou nina e. Kaniw khatni kaniw tuang kikta rui tingsaengzaeng atuang amuh swna asiamruai sw nina e.

¹⁰“Guaituamchic tei atuang kalummei pheykai kaimav khou tei zay guangna Aron khatni kanac mpouh nunc ta mi guaituamchic py khou tei kaniw baanc mbaenglou khang sa tho.

¹¹Mi guaituamchic tei kalummei pheykai chaengmun khou tei ahu khou dowluai nina e.

¹²Ravcha zei asaekc tei laana nang baanczung rui ravchapaeng chei khou tei teylou o. Nsaekcloumei guay tei ravchapaeng bamv khou tei bunlou nina e.

¹³Mi tangv tei kalungcna guay tei, kathyn gay liangmei langv tei khatni kaki kanei tei kathav kazauhna laa lana hei tei akhang puatkat swna ravchapaeng khou rawna khaeng o.

¹⁴Kazanc, kagic, khatni kabav guay tei thu zypui paengc thangc laa patna raw nina e. Mi hei amuh nunc tuang paap guay laa ganh khang khaengmei ravkhaeng e.

¹⁵“Lauziuchic akhat tei laana Aron khatni kanac mpouh nunc ta tei mi py khou tei kaniw baanc mbaenglou khang sa tho.

¹⁶Hei tei dowluaina kazei tei ravchapaeng naek padeih khou tei kazinhlou tho.

¹⁷Hei tei dim puat tho, kalungcna guay khatni katan tei khiu tho hei tei kapy khatni kazanc pang khou tei lou tho.

¹⁸Mi zanc kapwm tei taektw puatkat swna ravchapaeng khou raw tho. Mi rym tei rui ata tipianlou puni.

¹⁹“Baihmei lauziuchic laana Aron khatni kanac nunc rui mi khouringc py khou tei kaniw baanc mbaenglou khang sa o.

²⁰Hei tei swluaina kazei tei Aron khatni kanac mpouh nunc tuang baanzat biak nupan, baanh zungkui khatni phay zungkui khou teylou o. Nsaekcloumei zei guay tei ravchapaeng naek padeih khou tei kazinhlou tho.

²¹Ravchapaeng khou naimei zei asaekc khatni teymei thauc tei laana Aron khatni kanac mpouh nunc khou tei kaniw pumc khou khatni kaniw tuang pheybaan khou kazinhlou o. Kum e tw e thei kaniw khatni kaniw tuang pheybaan guay tei akhou katgutlou puni the.

²²“Lauziuchic thav, kamai bangbi, kalungcna guay, gay liangmei thyn langv, kaki kanei tei kathav kazauhna khatni baanzat naeng tei laa pat tho.

²³Akhang katloumei tuang ntyan nggiuh khou tei rui ntyan zaat kathuic khou rui: Olive thauc loumei ntyan dwm akhat, khay lou makmei ntyan dwm akhat khatni kanghmei ntyan akhat twna laa tho.

²⁴Mi guay tei Aron khatni kanac mpouh nunc baanc khou tiilouna hei tei nkunmei puatkat swna akhang kat ro twna kaniw khou sa tio.

²⁵Hei tei kaniw khou rui laa dat lana hei tei rawna khaengmei ravcha ruc khou tei louna kat tho. Mi khaengmei rym tei rui ata tipianlou e.

²⁶“Mi lauziuchic tuang kaphurou tei laana akhou nkunmei puatkat swna kat ro. Mi saram hei nangniw dam e.

²⁷“Amuh suang khou katmei lauziuchic tuang kaphurou khatni thei naeng tei akhang nkunmei puatkat swna kat nina e kumna hei tei Aron kai punav nunc khang lou nina e.

²⁸Nangniw rui alamvpuatkat katmei ganv khou mi khouringc tuang kaphurou khatni thei naeng tei Aron kai punav nunc tuang e twmei hei atuang kalaic dat lakmei lat the. Mi hei amuh nunc tuang RINGHPOUC akhang tii nimei puatkat re.

²⁹“Aron kamei theic e thei katuang amuh pwan tei kanac mpouh nunc khang tiilou duc nina e, kumna kaniw ta suanglou pwkhou kaniw hei tei piu nina e.

³⁰Aron phaan lynmei kanac mpouh Nthanmei bamv khou guangna asiamruai sw nimeipu tei mi pwan tei zaeng chanei piu nina e.

³¹“Aron khatni kanac mpouh nunc ta suangmei tuang lauziuzanc tei Nthanmei bamv khou suangc nina e.

³²Hei tei nggiuh khou loumei ntyan tei lev twna kalummei pheykai kaimun khou tei tu nina e.

³³Kaniw ta suangmei ganv khou paapc kuak khang khaengmei tuang tei kaniw tu nina e. Hei tei meic baihmei akhat na rui sini tu nuh mak ge.

³⁴Zanh khatni ntyan tei tu ngam makna lauthwan nganvna nsaekclou e thei, hei tei mai ntei nina e; hei tei tu dat nuh mak khe, kalam thu hei tei nthanmei e.

³⁵“Aron khatni kanac mpouh nunc ta suangmei tuang taanv hei ai rui nang khou latdanv swna sa kanmei kumcna zaeng chanei taanc nina e.

³⁶Paapc kuaklou khang zaeng chanei tei tingmik pum guaituamchic akhat akhat kat nina e. Mi hei rui ravchapaeng ta sw nthan puni. Mi tangv tei hei tei sw nthan khang mi khou tei Olive thauc teylou nina e.

³⁷Hei tei zaeng chanei tei tingmik pum taanc nina e. Kum kan e thei ravchapaeng tei nthan the, kumna mi nthanmei puat tei kahi himei tei thu nthan puni.

³⁸“Guang nimei ganv kaguay khou ni tingkwm akhatmei lauziunac kanei tingmik pum kat tanh tan bam nina e.

³⁹Hei tei lauthwan akhat tingzyn akhat kat nina e.

⁴⁰Lauthwan khaengmei lauziunac tei gaymei gehu buay handwang akhat khou nthanmei Olive thauc kadath akhat kariulouna kat nina e. Drakhadui kadath akhat bun keyna kat nina e.

⁴¹Tingzyn tei ni hei tei lev nchamc raph rapna kat nina e. Hei tei RINGHPOUC akhou taektw, khaengmei e kumna mi rym rui ata tipianlou e.

⁴²Thei thangc ni mi rawna khaengmei puatkat hei atuang pheykai kaimun khou tei khaeng tanh tan bam nina e. Hei tei ai rui nang khou khatni amei nunc khou meickin meickin kachuc nimei bamv the.

⁴³Mi bamv khou tei ai rui Isaraelmei ta ariw puni the, khatni ai bammei tuang karangmei riw tei rui mi bamv tei nthan puni.

⁴⁴Ai rui mi kalummei pheykai khatni ravchapaeng tei sw nthanlou puni, khatni Aron khatni kanac mpouh nunc ta amuh swna asiamruai sw bam khang ai rui reicpatlou puni.

⁴⁵Ai Isaraelmei pang khou bam puni, kumna ai rui kaniw tuang Racguangc sw puni.

⁴⁶Ai rui kaniw pang khou lungc bam diu khang kaniw ta Izip khou rui phungc patloumei RINGHPOUC kaniw Racguangc tei ai hei e twmei kaniw thay puni. Ai hei RINGHPOUC kaniw Racguangc e.