Read Rongmei Naga TATPATMEI 3 Bible Online

TATPATMEI 3 - Rongmei Naga bible

TATPATMEI 3

¹Zaeng neih khat Mousi kapouc, Midianmei amuc Jethro tuang lauziu khatni ziuh pang gaengc tat bam khou, kamei khouringh pang ta tei sypungramv biak thangc Sinai, Ravguangc tuang chyng khou guang the.

²Khoutei RINGHPOUC tuang baanchara rui thingphwam khou rui maibwang swna kakhou lyanlou the. Thingphwam khou tei mai chuangc bam sini, thingphwam tei thu raw makna bammei ta Mousi how the.

³“Mi hei kadath dat re; tabui sw tina thingphwam tei raw makna bam tu cho? Guang ana maihna zauc ni he,” twna kamei kakhanh the.

⁴Mousi tat ana guangmei tei RINGHPOUC how lana, thingphwam chung khou tei rui “Mousi, Mousi” twna kauc pat the. “How, ai hei khou hei bam e,” twna kamei rui daw the.

⁵Ravguangc rui sa the, “Tat guang tuanh ri tho. Nang phaythuapc tei luak pat kan o; nang ding bammei bamv tei nthanmei bamv e.

⁶Ai hei nang pu nangpouc Abraham, Isak, khatni Jakob Racguangc e.” Khoutei Mousi Ravguangc ta pingna kazaw kagouc the.

⁷Khoutei RINGHPOUC rui sa the, “Amei nunc ta Izip khou adih sina sw bam tu cho twmei ai how the; bangh kaipouc nunc khou rui kaniw ta kanpatlou khang, kaniw kapna huay bammei ta ai chu the. Kaniw ramrianra guay tei ai thay the; kaniw ta Izipmei nunc baanc khou rui thuak patlouna, Izip kandic khou rui nduangh patna, kandih ramv

⁸gaymei, nkhuaihdui lev guaihnoudui luanghmei ramc Kanaanmei, Hittimei, Amormei, Perizimei, Hivimei, khatni Jebusimei nunc ntaw lungc bammei ramv khou tei nduanghlou khang ai key e.

⁹Amei nunc rui kapna huaymei tei ai chulou the; khatni Izipmei nunc rui akumhna kaniw ta rai bam cho twmei ai how the.

¹⁰Hei zaeng rui guang tho, Nang rui amei nunc ta Izip kandic khou rui nduangh pat khang ai rui nang ta Izipmei guangc daeng thangc ndiu puni the.”

¹¹Tiki Mousi rui Ravguangc khou daw the, “Ai thu ramhkhat na sini hamh e. Akumhna ai guangh khou tatna Isaraelmei nunc ta Izip khou rui nduangh pat ngam nina cho?”

¹²Ravguangc rui daw the, “Ai rui nang ta nkhavlou puni; kumna nang rui meic nunc ta tei, Izip khou rui nduangh pat pwkhou, nang mi chingc khou hei ata kalum puni. Ai rui nang ta langlou the twmei hei tei rui lyan puni.”

¹³Tiki Mousi rui Ravguangc khou sa dat the, “Ai rui Isaraelmei nunc khou tatna, ‘nangniw pupouc Racguangc rui ata nangniw khou thouc guangmei tuang e,’ twna kaniw khou sa pwkhou, ‘Kazanc tabui cho?’ twna kaniw thanv puni. Khou kiu ai tabui daw nina cho?”

¹⁴Ravguangc rui sa the, “Ai hei Ai the. Isaraelmei nunc khou tei kumna sa tho, ‘Ai twmeipu rui ata nangniw khou thouc guang tuang e.’

¹⁵Kaniw pupouc Racguangc Abraham, Isak, khatni Jakob Racguangc RINGHPOUC ai rui nang ta kaniw khou thouc guang tuang e, twna Isaraelmei nunc khou sa o. Mi hei tingsaengzaeng azanc di the; guang nimei meickin guay rui ata kaw nimei zanc kiu mi hei the.

¹⁶Nang tatna Isaraelmei tuang kapy nunc ta kaw kaduaina, kaniw pupouc Racguangc, Abraham, Isak, khatni Jakob Racguangc RINGHPOUC ai rui nang khou lyanlou e twna sa o. Ai kaniw khou guang the; kumna Izipmei nunc rui kaniw khou swlou bammei tei how the, twna kaniw khou sa ti tho.

¹⁷Ai rui kaniw ta Izip kandic, kaniw ta rai bammei bamv khou tei rui nduangh patna nkhuaihdui khatni guaihnoudui luanghmei ramc—Kanaanmei, Hittimei, Amormei, Perizimei, Hivimei khatni Jebusimei ramv khou nduanghlou khang ai alung ding tang the.

¹⁸“Nang rui kaniw khou samei tei amei nunc nking puni. Kumna nang Isaraelmei tuang kapy nunc lev Izip guangc khou tatna kakhou heikumna sa o, ‘RINGHPOUC, Ibrimei Racguangc aniw khou ndauhlou the. Aniw tazikramv thangc zaeng neih thumh chaengkaamv thangc tatna, RINGHPOUC aniw, Racguangc khang khaeng tat khang nuhlou o.’

¹⁹Izipmei guangc ta tei namna tisw timak ge thei, kamei nangniw ta titat ni tu hamh e twmei ai thay e.

²⁰Tiki ai rui angamv sinsw puni, kumna charynmei taanv taanclouna, ai rui Izip ta dandi tii puni. Mi tangv kamei rui nangniw ta titat puni.

²¹“Amei nunc tat pat pwkhou baanhraeng tat pat mak khang, Izipmei nunc rui nangniw ta chakhwang sw khang ai rui tiswlou puni.

²²Isaraelmei meicpu kathuicna, Izipmei kainingmei, khatni kakai khou lungc bammei Izipmeipui nunc khou rui pheybaan, khatni daandi kachaekc tuang ntuh ntah ney nina e. Isaraelmei nunc rui hei tei kaniw nac mpouh aluh nunc khou piulouna, Izipmei nunc tuang lanv tei phungc tat puni.”