Read Rongmei Naga TATPATMEI 30 Bible Online

TATPATMEI 30 - Rongmei Naga bible

TATPATMEI 30

¹“Agaw ntei khang akasia thing tuang ravchapaeng akhat kasiamh nina e.

²Hei tei chowbuk akhat saengc, akhat daic khatni chowbuk kanei kauh nina e. Kachei padeih tei kapumc tei lev akhat na sw nina e.

³Kapaengc, kanaek padeih khatni kachei guay tei kachaekc nthanmei rui duam nina e khatni katin tei kachaekc rui zui nkuay nina e.

⁴Hei tei puanc kalw khang kachaekc tuang kanu kahaengv kanei kasiamhna katin bangc khou tei kanaek kanei khou duanclou nina e, mi khou tei kaphuang huilou khang e.

⁵Kaphuang tei ni akasia thing rui kasiamhna kachaekc rui duam nina e.

⁶Mi ravchapaeng hei Latdyng Khuk paeng khou thaengclou bammei khamthinghphey hu khou tei lou nina e. Hei tei ai rui nangniw ta ariw nimei bamv the.

⁷Aron rui thauhmai tei zauh khang lauthwan kathuic guang pwkhou mi khou tei agaw ntei nina e.

⁸Kamei rui tingzyn thauhmai ntou khang guang dat khou tei ni kamei rui hei tei kumcna sw muay nina e. Meickin meickin nganvna mi hei taek zat makna sw bam nina e.

⁹Mi khou tei agaw, khouringh, taektw hamh e thei drakhadui nthan makmei kat nuh mak ge.

¹⁰Paapc khang khaengmei khouringc tuang zei mi ravchapaeng chei khou tei teylouna Aron rui tingkwm pum mi ravchapaeng tei sw nthanmei tuang taanv taanc nina e. Thei thangc nganvna mi hei tingkwm pum taanc nina e. Mi ravchapaeng hei RINGHPOUC akhou nthan liangmei e.”

¹¹RINGHPOUC rui Mousi khou sa the,

¹²“Nang rui Isaraelmei meic sing tei hy pwkhou meic kathuicna katuang katuang pumhran tii nina e, hei tei meic sing hy bammei ganv khou tei ravpyan guanglou mak khang e.

¹³Kazanc chaklou tangmei kathuicna Ravkai tuang chakh khou shekel kapaek tii nina e. Hei tei meic kathuicna akhang kaipat swna tii nina e.

¹⁴Tingkwm 20 mbu gaanvdaihna meic sing chakmei khou tei kazauh kanmei guay mi syan hei tii nina e.

¹⁵Mi pumhran hei thu lungcgaymei rui tii geic, lungcsimei rui tii rau tu nuh mak ge.

¹⁶Mi syan hei Isaraelmei khou rui kakhana atuang kalummei pheykai taanv khang piu nina e. Mi thaengv hei kaniw tuang panty thuak khang tiimei tuang e kumna ai rui kaniw ta amuc mak khang e.”

¹⁷RINGHPOUC rui Mousi khou sa the,

¹⁸“Tanzinc rui kabamv swmei tuang tanzinc tuang duikhiu kaikhuang kasiamh o. Hei tei ravchapaeng kanei kalummei pheykai kak khou tei louna mi khou tei dui lou tho.

¹⁹Aron khatni kanac mpouh nunc tei kaniw phaybaanc mi dui tei rui khiu nina e.

²⁰Kaniw ta tei swluai mak khang kaniw rui kalummei pheykai khou tei guangna ravchapaeng khou tei guangna taektw puatkat kat makmei hu khou kaniw phaybaanc khiu nina e.

²¹Kaniw theih mak khang kaniw phaybaanc khiu nina e. Mi hei kaniw khatni kaniw kikta guay rui thei thangc nganvna ngaek bam nimei riak ge.”

²²RINGHPOUC rui Mousi khou sa the,

²³“Mirh dui kilogram charuk, karym namhgaymei sinnomon kilogram kathumh, karym namhgaymei ken kilogram kathumh

²⁴kassia kilogram charuk laana khou tei Olive thauc liter padeih louna,

²⁵namhgaymei thauc lou kariuna nthanmei teymei thauc khang kasiamh nina e.

²⁶Hei tei rui nangniw rui kalummei pheykai khatni latdyng khuk

²⁷kapaeng khatni mi khou naimei kana guay, thauhmaihyang khatni katuang kana guay akhatni nteimei tuang ravchapaeng

²⁸rawna khaengmei ravchapaeng khatni mi tuang kana guay khatni zeisiankuak khatni mi tuang kahyang hei guay ti hei thauh teylou khang e.

²⁹Nang rui kaniw ta nthan liangmei sw khang kat gutlou nina e, tabui pwni kaniw ta kahilou e thei hei tei nthanmei sw puni.

³⁰Mi tangv tei Aron khatni kanac mpouh nunc ta thauh teylouna asiamruai swmei khang amuh suanglou tho.

³¹Isaraelmei khou kumna sa o, ‘Mi nthanmei teymei thauc hei thei thangc nganvna atuang taanv khou sinsw bam nina e.

³²Mi hei riu riuna maansei khou teylou nuh mak ge. Mi thauc kumhmei kasiamh khang mi thak hei kumcna kasiamh nuh mak ge. Mi hei nthanmei e, kumna mi hei nthanmei swna nangniw laa nina e.

³³Mi kumhmei thauc kasiamhpui mei hamh e thei amuh hamhmei khou mi thauc hei sinswpui mei ta amei pang khou rui ganc pat puni.’ ”

³⁴RINGHPOUC rui Mousi khou sa the, “Stak, onika, galbanum khatni nthanmei agaw kasing nchamcna lou lana

³⁵mitei rui karym namhgaymei kasiamh o. Hei tei nthanna lou bam khang ntey lou o.

³⁶Mi asaekc tei kabuay sw patna atuang kalummei pheykai khou laaguangna hei tei Latdyng Khuk hu khou tei nroulou o. Mi ti hei nthanna sw nina e.

³⁷Nangniw piu khang agaw mi thak hei kumcna kasiamh nuh mak ge. Mi hei akhou katgutlou kanmei nthanmei puat re twna laa nina e.

³⁸Thowkumhmei rui kamei piu khang mi kumcna kasiamhpui mei ta amei pang khou rui swluai ganc puni.”