Read Rongmei Naga TATPATMEI 31 Bible Online

TATPATMEI 31 - Rongmei Naga bible

TATPATMEI 31

¹RINGHPOUC rui Mousi khou sa the,

²“Uri nac mpouh Hur tou, Bezalel ta Juda kaikhwang khou rui ai rui kadahna

³kakhou atuang bumaengc tipadiklou kan the. Kabah thaymei, thyamra thaymei khatni baanh thaymei ai rui kakhou tiilou kan the —

⁴kachaekc, daandi khatni tanzinc khou kathiak kathiak taanc thay khang,

⁵ntauh kaphangvna kasiamh khang, thing khou hianna kasiamh khang, khatni baanh thaymei taanv guayna khou taanh khang kakhou tiilou kan the.

⁶Zauclo kamei lev taanc nchamc khang, Dan kaikhwang khou rui Ahisamak nac mpouh Oholiab ta ni ai rui kadahlou kan the. Baihmei baanh thaymei guay khou tei ni taanc ngammei ngamv daihmei tiilou kan the; taanclou diu khang ai rui latdanv tiiloumei taanv guay tei twmei thu:

⁷atuang kalummei pheykai, Latdyng Khuk khatni Latdyng Khuk gwm, pheykai khou lou nimei guay,

⁸tupaeng khatni mi khou tei lou nimei guay, nthanmei kachaekc tuang thauhmaihyang khatni mi khou tei lou nimeina guay, agaw ntei nimei ravchapaeng,

⁹rawna khaeng nimei ravchapaeng khatni mi khou tei gut nimeina guay, duikhiu kaikhuang khatni mi tuang bamv,

¹⁰amuh taanv sin khou piu khang Aron lev kanac mpouh nunc khang chingkhiuhmei amuh pheybaan,

¹¹tey nimei thauc, khatni Nthanmei bamv khang namhgaymei agaw. Mi guay hei taanc pwkhou ai rui nang khou saloumei kahak tei taanc nina e.”

¹²Mi tangv tei RINGHPOUC rui Mousi khou sa the,

¹³“Sabbath, atuang zaengthaek tingmik tei ngaek nina e, kalam thu ai hei nangniw ta nthanmei tiswloumei RINGHPOUC kiu e twmei nangniw thay bam diu khang rui mi hei rui nangniw lev akak khou guang nimei kin guay khou madanhmei tuang sw puni the twna Isaraelmei nunc khou sa o.

¹⁴Zaengthaek tingmik tei nangniw ngaek nina e, kalam thu mi hei nangniw khang nthanmei tingmik ge. Thowkumhmei rui mi tingmik hei ngaek makna taanvtaanc bam e thei, kata tei swluai nina e.

¹⁵Nangniw tuang taanv taanh khang zaeng charuk nai the, tiki chaneimei tingmik hei thu akhou katgutloumei nthukmei zaengthaek tingmik ge. Mi tingmik nungc tei taanvtaanhpui mei ta thu swluai nina e.

¹⁶Hei zaeng rui Isaraelmei nunc rui mi tingmik hei tingsaengzaeng latdyng tuang madanhmei swna ngaek nina e.

¹⁷Mi hei Isaraelmei lev akak khou tingsaeng nai bam nimei tuang the. Kalam thu RINGHPOUC, ai rui zaeng charuk lungc khou tingpuk lev kandih hei damc the, kumna chaneimei nungc ai taanvtaanh maknga nthaekc the.”

¹⁸RINGHPOUC rui Sinai Chyng khou Mousi khou kachuc tangna Ravguangc kabaanc kahak rui hyloumei latdanv taucpaek kanei tei kakhou tiilou the.