Read Rongmei Naga TATPATMEI 34 Bible Online

TATPATMEI 34 - Rongmei Naga bible

TATPATMEI 34

¹RINGHPOUC rui Mousi khou sa the, “Reymei tei kumhmei ntauhpaek kanei kaphangv tho, reymei, nang rui swbak kanmei taucpaek khou tei hyloumei lat guay tei hylou dat puni the.

²Nthuanh lauthwan chamdaanv tho, kumna Sinai Chyng twan khou ata ariw khang ku tho.

³Meic gaanv khat na sini nang thei lay ku nuh mak ge; mi chingcbut pwm khou tei meic gaanv khat na sini bam nuh mak ge; lauziu pang khatni kiruai akhat na sini mi chingcphay khou tei mpah bam nuh mak ge.”

⁴Kumna Mousi rui ntauhpaek kanei kaphangv dat lana lauthwan thwanzingh RINGHPOUC rui samei theilayna hei tei Sinai Chyng khou phungc ku the.

⁵RINGHPOUC muangh khou keyna kadaeng khou ding the, kumna kazanc nthanmei, RINGHPOUC twmei tei kauc pat the.

⁶Khoutei RINGHPOUC kahu khou tat kaan patna kumna kauc pat the, “RINGHPOUC, ai hei lunghsuc kadanlou thaymei, lunghpuamc nuangh makmei khatni nzianmei khatni lwm nuhmei rui padikmei Racguangc e.

⁷Meickin ching ching ta nzianna bammeipu e khatni simei, meic liammei khatni paapc guay tei kuaklouna bam e; tiki meic nunc ta kaniw paap tuang dandi tei kaniw tou nac nunc, meickin kathumh padeih nganvna dandi tiimeipu e.”

⁸Mousi rui kadyng khou tei kandih khou sow nkhum keyna kalum the.

⁹Kamei rui sa the, “He RINGHPOUC, nang rui ata lunghkwnlou changh e thei, nang aniw lev tat nchamclou khang ai huay e. Mi mei nunc hei kaniw nu tanc the, tiki aniw tuang simei khatni aniw paap guay kuaklou o, kumna aniw ta nang mei swna laalou o.”

¹⁰Zauclo! RINGHPOUC rui Mousi khou sa the, “Ntaw ai Isaraelmei nunc lev latdyng sw the. Kandih nam ruc khou tabui bui bamv khou pwni zaatc akhat na khou sini taanclou zat kan makmei taanvdaih ai rui kaniw hu khou taanclou puni the. RINGHPOUC, ai rui, akumhmei taanvdaih taanc ngam cho twmei meic kathuicna rui how puni the, kalam thu meic pingmei taanv nangniw khang taanclou puni the.

¹¹Ai rui aseic nang khou tii pw nimei latdanv hei piu o. Nangniw tat gut pwkhou ai rui Amormei, Kanaanmei, Hittimei, Perizimei, Hivimei, khatni Jebusimei hei guay ta alay ganc puni.

¹²Nangniw gut pw nimei kandic khou bammei zaatc akhat na sini nangniw latryan sw nuh mak ge, kalam thu hei tei nangniw khang meic theic nimei phac sw puni.

¹³Kaniw tuang ravchabamv guay diangcra key o, kaniw tuang kalummei tuang ntauh tiangc guay tei swmut ro, kaniw tuang ravpui Ashera tuang maengc guay tei swra key o.

¹⁴“Rav baihmei ta kalum nuh mak ge, kalam thu RINGHPOUC, ai hei rav baihmei ta kalummei ta mamavmeipu e, azanc hei mamavmei RINGHPOUC twmei e.

¹⁵Mi kandic khou mei nunc tei lev latryan sw nuh mak ge, swlou e thei kaniw rui kaniw rav ta kalumna khaeng pwkhou nangniw ta kaw puni kumna kaniw tuang rav khang khaengloumei taektw tei tu khang nangniw ta nthiam puni.

¹⁶Nangniw nac nunc rui mi zaatc baihmei luc nunc ta kaw puni, kaniw rui nangniw nac nunc ta tei kaniw tuang ravmaengc tii kalum puni.

¹⁷“Ntauh tuang ravmaengc kasiamhna kalum riu.

¹⁸“Khay loumakmei ntyan Ngai ngay o. Ai rui nangniw khou latdanv tii kanmei tei kumcna, Abib bw khou khay loumakmei ntyan zaeng chanei tu o, kalam thu mi bw khou tei nangniw Izip kandic mpatlou the.

¹⁹“Nareimei mpouh khatni khouringh khou puanc reymei kachic tei atuang e.

²⁰Tiki kuanniam puanc reymei tei thu lauziunac tii lana nangniw khang thuak dat nina e, nangniw hei tei thuak dat mak ge thei kaguang swbau nina e. Nareimei mpouh guay ta tei thuak dat nina e. “Puatkat kazauh makna meic gaanv khat na sini adaeng khou guang nuh mak ge.

²¹“Nangniw tuang taanv taanh khang zaeng charuk nai the, tiki chaneimei nungc tei thu nthaekc nina e, laukhuaihmei khatni lautaymei ganv khou nganvna nthaekc nina e.

²²“Nangniw rui gehu tay thau rey khou tei Lautay Ngai ngay nina e, kumna lailwm khou tingthai pannu laaguangmei ganv khou tei Chaengkai Ngai ngay nina e.

²³“Nangniw nggaanvmei nunc rui RINGHPOUC, Isarael Racguangc ata tingkwm khou guang kalum kathumh nina e.

²⁴Zaatc nunc ta tei nangniw hu khou rui nthau ganc lou puni, nangniw kandic tei tidaiclou pwkhou, mi khumngai kathumh lungc khou tei thu meic gaanv khat na rui sini nangniw tuang kandic tei laa khang karamc guang ni tuang hamh e.

²⁵“Nangniw rui akhang khouringh khaengpui kaanc khou khay loumei ntyan kat nuh mak ge. Kaanpatmei Ngai zanc tei katit na sini nthuanh khang daeklou nuh mak ge.

²⁶“Nangniw rui laa rey liangmei phunling tei tingkwm kathuic RINGHPOUC kai khou phungc guang nina e. “Lauziunac khatni ziuhnac tei kakui noudui khou suangc lak nina e.”

²⁷RINGHPOUC rui Mousi khou sa the, “Mi lat guay hei hy keylou o, kalam thu mi latbamv guay theilayna ai rui nang khatni Isaraelmei kak khou latdyng sw nimei tuang the.”

²⁸Mousi tei tu mak zangv makna zingbangc 40 kalaanv 40 mi bamv khou tei bamlou the. Kamei rui latdyng lat twmei thu latdanv ruh tei ntauh paek khou tei hylou the.

²⁹Mousi tei latdanv ruh tuang taucpaek kanei tei phungcna Sinai Chyng khou rui key dat pwkhou, kamei RINGHPOUC ta kachuc tina kazaw tei gaanc kah ka the, tiki kamei thu hei tei thay mak ge.

³⁰Aron khatni meic nunc tei rui kata zauc pwkhou kazaw gaanhmei tei how the, kumna kaniw kadaeng guang tuanh khang ping the.

³¹Tiki Mousi rui kaniw ta kaw the, kumna Aron lev kaniw tuang kapy swmei guay kadaeng khou guang the, kumna Mousi rui kaniw ta kachuc the.

³²Mi tangv tei, Isaraelmei kapwmna tei kadaeng khou guang kariu the, RINGHPOUC rui kakhou Sinai Chyng khou tiiloumei latdyn guay tei Mousi rui kaniw khou tiilou the.

³³Mousi tei kaniw khou sa tangv pwkhou, kazaw gum the.

³⁴Mousi rui RINGHPOUC ta kachuc khang kalummei pheykai khou gut pwkhou kazaw gwmphey tei laa ganc raph rap the. Kamei pat dat pwkhou, sa o twna samei latdanv guay tei kamei rui Isaraelmei nunc khou salou the,

³⁵kazaw gaanc bammei ta kaniw how the. Kumna kamei RINGHPOUC ta kachuc khang tat dat mak saanv kamei kazaw gum dat the.