Read Rongmei Naga TATPATMEI 36 Bible Online

TATPATMEI 36 - Rongmei Naga bible

TATPATMEI 36

¹“Bezalel, Oholiab khatni RINGHPOUC rui baanhthaymei khatni ningting kalummei pheykai kasiamh thau khang tiilou kanmei nunc tei rui RINGHPOUC rui dincloumei kahak tei kumcna taanh khang the.”

²Mousi rui Bezalel, Oholiab khatni RINGHPOUC rui kaniw khou taanc ngam khang tiiloumei khatni nkhavlou niimei nunc ta tei kaw kaduaina taanv tei kahouh khang Mousi rui sa the.

³Kalummei pheykai tei kasiamh khang Isaraelmei guay rui phungc guangmei puatkat tei kaniw rui Mousi khou rui laa the. Kum e tiki meic nunc tei lauthwan kathuic kaniw tuang puatkat Mousi khou phungc guang tanh tanna bam di he.

⁴Khoutei taanvtaanhmei baanhthaymei nunc tei rui

⁵Mousi khou sa the, “RINGHPOUC rui saloumei theilayna taanh khang kage naimei khang suangc mbuna meic nunc rui puatkat phungc guang the.”

⁶Kumna Mousi rui kalummei pheykai kasiamh khang puatkat tii guang taan tho twna zypui kailuangc kapwm khou latdanv patna tithay the; kum tina kaniw phungc guang nthaekc the.

⁷Kalam thu kaniw rui phungc guanglou bammei tei rui taanc luai khang kage naimei suangc geic mbuna liamhlaih the.

⁸Taanvtaanhmei pang khou tei thyam thay liangmei rui RINGHPOUC tuang pheykai tei taanc the. Kaniw rui hei tei nrymmei, haengcnrymmei khatni haenghmei gaymei linen tuang langc rui dakna khou tei kerubim maengc luanhloumei phey ruh rui kasiamh the.

⁹Phey akhat tei chowbuk 28 saengc padeih daic e. Kaguayna kasaeng kadai nchamc e.

¹⁰Kaniw rui phey panguh panguh hui kariumei paek kanei kasiamh the.

¹¹Kumna katin liangmei pheytin khou tei langh nrymmei rui kanu kasiamhlou the. Hei tei kumcna baihmei akhat khou tei ni taanclou the.

¹²Reymei paek khou tei kanu 50 khatni kaneimei khatni nkhamhmei phey khou tei kanu 50 lou muay the. Mi nei tei kanaek khat khat thaengc adaclou the.

¹³Mi paek kanei tei akhat na swna nsuk kariulou khang kachaekc tuang khuai 50 ni paanclou the.

¹⁴Pheykai tei khup khang ziuhhiw phey 11 kasiamh the.

¹⁵Akhat khat tei chowbuk 30 saengc, padeih daic e. Kaguayna kasaeng kadai nchamc e.

¹⁶Kaniw rui panguh rui kapaek akhat khang khatni baihmei charuk tei rui kapaek akhat khang hui kariulou the.

¹⁷Kumna kaniw rui katin akhat khou tei kanu 50, khat biak tuang katin khou tei ni 50 lou the.

¹⁸Mi kanei tei gou kariu nuh khang tanzinc khuay 50 ni lou the.

¹⁹Kapaengc khou khup khang nsangh haengcloumei lauziu gic phey akhat khatni gaymei guaihgic rui kasiamhmei phey akhat ni kasiamh the.

²⁰Kaniw rui pheykai tiangc khang akasia thing rui kasiamh the.

²¹Katiangc akhat tei chowbuk ruh kauh, kadai rui akhat kapaek ge.

²²Katiangc guay tei manc kariulou nuh khang kabaanc kanei kanei nai e. Katiangc guay tei mi baanc hei nai the.

²³Kalummei pheykai tuang dihba biak thangc khang katiangc 20

²⁴khatni daandi tuang bam 40 kasiamh the. Katiangc baanc kaney tei manc nuh khang katiangc akhat khou kabam kanei kanei lou e.

²⁵Kaniw rui dihpy biak khang katiangc 20 kasiamh the.

²⁶Daandi tuang bam 40 kumlana katiangc akhat khat bangc khou tei kabam kanei kanei kasiamhlou the.

²⁷Pheykai kaithei, neihkey biak khang tei katiangc charuk

²⁸khatni kakwn khang katiangc kanei twna kasiamh the.

²⁹Katiangc kanei tei kabangc khou thu kalangv baic baicna swlou e tiki katwan thangc thu bang kariulou dat re, kumna kakwn kaneimei khang kasiamhlou e.

³⁰Kumna katiangc tachat khatni daandi tuang kabam 16 kumlana katiangc akhat akhat khou tei kabam kanei kanei kasiamhlou e.

³¹Kaniw rui akasia thing rui kaluang 15 kasiamh the.

³²Hei tei kanaek kathumh khou tei kaluang panguh panguh lou khang e.

³³Ntiangh pang kachung khou lou nimei luang tei kaithei kaihu saengc patre.

³⁴Kaniw rui katiangc guay tei kachaekc rui lup the khatni mphaihmei luang guay lou nuh khang kachaekc tuang haengv duanclou e. Mphaihmei luang tei ni kachaekc rui lup the.

³⁵Kaniw rui nrymmei, haengcnrymmei, khatni haenghmei langc rui khamthinghphey kasiamhna mi khou tei kerubim maengc luanhlou the.

³⁶Khamthinghphey tiangc khang tei akasia thing tiangc padeih kasiamhna kachaekc rui luplouna kachaekc tuang khuay lou the. Katiangc kabam khang tei daandi tuang kabam padeih ni kasiamh the.

³⁷pheykai kaimav biak tei lou khang nrymmei, haengcnrymmei khatni haenghmei langc rui kaimun phey kasiamhna khou tei kerubim maengc luanhlou the.

³⁸Mi kaimunphey tiangc khang tei katiangc panguh kasiamhna khou tei kakhuay duanclou the, hei tei kachaekc rui lup the khatni kabam khang tanzinc bam panguh kasiamh the.