Read Rongmei Naga TATPATMEI 37 Bible Online

TATPATMEI 37 - Rongmei Naga bible

TATPATMEI 37

¹Bezalel rui latdyng khuk chowbuk kanei kapaek saenghmei, chowbuk akhat kapaek kadiat daihmei khatni chowbuk akhat kapaek kauhmei akasia thing rui kasiamh the.

²Kamei rui hei tei kalungc kapaengc kachaekc rui duam the kumna katin tei kachaekc rui zui the.

³Hei tei puanc kalw khang kamei rui kachaekc tuang nu padeih kasiamhna hei tei katan padeih khou tei kanaek akhat thangc kanei kanei lou the.

⁴Hei tei puanhmei phuang khang akasia thing rui phuang kasiamhna hei tei kachaekc rui lup the.

⁵Hei tei kachaekc nu khou kari gutna kanaek kanei khou tei lou the.

⁶Chowbuk akhat kapaek daic khatni kanei kapaek saenghmei kachaekc rui kasiamhmei kagwm ni kamei rui kasiamh the.

⁷Tandiak rui dypatmei kachaekc rui Kerubim kanei hei tei kagwm kanei tuang tin khou kasiamh the.

⁸Kerubim kaneimei tei akhat khat tuang twan khou tei kasiamh the hei tei rui kagwm lev kapumc akhat na swlou the.

⁹Kerubim kanei tei kaney zaw puanc achowlou the khatni kanei swkaeng rui mi gwm tei gum liam the.

¹⁰Chowbuk kanei saengc, akhat daic, akhat kapaek kauhmei akasia thing tuang ntyanpaeng akhat kamei rui kasiamh the.

¹¹Kamei rui hei tei kachaekc nthanmei rui duaplouna katin tei kachaekc rui zui nkuay guiclou the.

¹²Kamei rui baanhpav akhat paekcmei kakhau kasiamhna mi khau tin khou tei kachaekc rui zui ngguilou the.

¹³Puanc kalw khang kachaekc tuang nu padeih kasiamhna kahyang padeih khou tei hei tei duamlou the.

¹⁴Mi nu tei puanc kalw nuh khang kapaeng tuang katin khou lou the.

¹⁵Kaphuang tei ni akasia thing rui kasiamh lana kachaekc rui lup the.

¹⁶Mi ntyanpaeng khou tei lou nimei drakhadui kat khang nkuak, buangh, muanh, zeisiankuak hei guay hei nthanmei kachaekc rui kasiamh the.

¹⁷Kamei rui kachaekc nthanmei rui thauhmai hyang kasiamh the. Kabamv khatni katang tei dyloumei kachaekc rui kasiamh the. Kapwang, kamwm kanei kapwangnuy paek tei kapumc akhat na swna kasiamh the.

¹⁸Baanzat baandau kachy kathumh kathumh louna kachy charuk kasiamh the.

¹⁹Kachy charuk tei akhat khou almon pwang maengc kathumh kathumh kamwm kanei kapwangnuy paek lou the.

²⁰Kahyang khou tei ni almon pwang kamwm lev kapwang maengc kathumh kasiamhlou the.

²¹Kachy kanei kanei patmei bamv kathuic bangc khou tei kamwm akhat akhat lou the.

²²Kamwm, kachy khatni thauhmaihyang tei dyloumei kachaekc rui kapumc akhat na swna kasiamh the.

²³Mi thaucmai hyang khou tei lou khang thauhmai chanei, khatni tiangkap lev puanhkuak ni kachaekc nthanmei rui kasiamh the.

²⁴Thauhmai hyang khatni mi tuang na guay tei kamei rui kachaekc nthanmei kilogram 35 rui kasiamh the.

²⁵Agaw nteimei ravchapaeng khang kamei rui akasia thing rui kasiamh the. Hei tei kasaeng kadai chowbuk akhat akhat khatni kakau chowbuk kanei kasiamh the. Kakwn padeih khou loumei chei padeih tei kapumc tei lev akhat na rui sw the.

²⁶Kapaeng kanaek padeih khatni kachei guay tei kachaekc rui lup the kumna katin tei kachaekc rui zuilou the.

²⁷Puanc kalw khang kachaekc tuang nu kanei kasiamhna hei tei katin bangc khou kanaek kanei khou tei duamlou the. Hei tei puanc kalw ni khou phuang kariloumei bam khang e.

²⁸Kaphuang kanei tei akasia thing rui kasiamhna hei tei kachaekc rui luplou the.

²⁹Nthanmei teymei thauc khatni nthanmei namhgaymei agaw tei karym namhgaymei puat lev kariuna kamei rui kasiamh the.