Read Rongmei Naga TATPATMEI 38 Bible Online

TATPATMEI 38 - Rongmei Naga bible

TATPATMEI 38

¹Rawna khaengmei ravchapaeng khang kamei rui akasia thing rui kasiamh the. Hei tei kasaeng kadai chowbuk panguh panguh e, kakau rui chowbuk kathumh e.

²Kakwn padeih khou tei kachei padeih lou the kumna hei tei kapumc tei lev akhat na swna kasiamh the. Kamei rui mi kapumc kapwmna tei tanzinc rui duam the.

³Ravchapaeng khou sinsw nimei na guay: zeisiankuak, mbut suakkuak, nkuak, rwang, khatni maikuak hei guay hei kasiamh the. Mi na guay hei tanzinc rui kasiamh the.

⁴Kamei rui tanzinc tuang raengv kasiamhna hei tei kapaeng tin khou tei rui lou keyna ravchapaeng bamv lou key tangc the.

⁵Puanc kalw khang kanu padeih kasiamh lana hei tei katin padeih khou lou the.

⁶Puanhmei phuang padeih akasia thing rui kasiamhna hei tei tanzinc rui duamlou the.

⁷Hei tei ravchapaeng naek kanei khou tei kanu khou tei karilou the. Mi ravchapaeng tei thingpaek rui kasiamhna kalungc phou e.

⁸RINGHPOUC tuang kalummei pheykai kaimun khou siamruai swmei ntumei nunc tuang maengzau guay khou rui tanzinc tuang duikhiu kaikhuang khatni kabamv kamei rui kasiamh the.

⁹RINGHPOUC tuang kalummei pheykai kairaengv tei kamei rui gaymei linen phey rui kasiamh the. Karaengv tei dihba biak thangc chowbuk 100 saengc e.

¹⁰Katiangc tei tanzinc tuang 20, kabam 20 e. Khoutei daandi tuang khuai khatni daandi tuang luang kasiamhlou the.

¹¹Hei tei lev nchamc raph rapna dihpy biak thangc ni kasiamhlou the.

¹²Neihkeylou biak thangc karaengv tei chowbuk 50 saenghmei, katiangc ruh khatni kabam ruh, kumna khou tei daandi tuang khuai khatni kaluang kasiamhlou the.

¹³Kaimun biak neihpat biak raengv tei ni chowbuk 50 kasiamhlou the.

¹⁴Chaengmun kak akhat khou tei chowbuk 15 saenghmei phey bam kathumh lev katiangc kasiamhlou the.

¹⁵Hei tei kumcna kairaengv kaimun khou tei ni chowbuk 15 saenghmei phey kathumh lev katiangc kathumh kasiamh the.

¹⁶Karaengv phey kaguayna tei linen phey gaymei rui kasiamhmei tuang e.

¹⁷Katiangc bam guay tei tanzinc rui khatni kakhuai, kaluang khatni katiangc duammei guay tei daandi rui kasiamh the. Katiangc luang guay tei daandi tuang luang rui phian alamvlou the.

¹⁸Kaimun khou lamcloumei phey tei nrymmei, haengcnrymmei, khatni haenghmei linen gaymei langc rui daklouna mi khou tei ramhmaengc luanhlou the. Hei tei khamthinghphey tei kumcna chowbuk 20 daic panguh kauh e.

¹⁹Hei tei kabam khou dungcloumei katiangc padeih rui phunghmei tuang e. Kakhuai, kapyrun, khatni kaluang tei daandi rui kasiamh the.

²⁰Kalummei Pheykai khatni kairaengv riang bangc nimei muihtiangc guay tei tanzinc rui kasiamh the.

²¹Latdanv ruh hyloumei tauhpaek kanei kalungc khou loumei RINGHPOUC tuang pheykai khou ntanh gut kanmei sing kiu mi hei the. Mi tuang chakh tei Mousi tuang latdanv theilayna amuh Aron nac mpouh Ithmar rui zayloumei bangc khou Levimei nunc rui kasiamhloumei tuang e.

²²RINGHPOUC rui taanc o twna samei guay tei Juda kaikhwangmei Hur tou, Uri nac mpouh Bezalel rui kasiamh the.

²³Kata nkhavmeipu, Dan kaikhwangmei Ahisamak nac mpouh Oholiab tei thing tauh khou hianthaymei, ramh lwn kasiamhmei khatni nrymmei, haengcnrymmei khatni haenghmei linen phey dakmeipu e.

²⁴Nthanmei pheykai khang tei kat guangna piu kanmei kachaekc guay tei talent 29 khatni shekel 730 the.

²⁵Meic sing chakmei khou rui khuam guangmei daandi hei talent 100 khatni shekel 1775 e.

²⁶Mi sing hei meic sing chakmei khou, meic kathuicna rui tii nimei thaengv tii guangmei khou rui ndathmei rith the. Mi khou tei zanh chanhmei tingkwm 20 khou rui karuc ku kanmei guay sing nggaanvmei 603,550 the.

²⁷Ravchabamv khatni khamthingphey tuang kabam kasiamh khou tei talent 100 tuang daandi 100 gutna kasiamh e. Kabam 100 khou tei talent 100 muay the.

²⁸Kaniw rui kaluang, kakhuai khatni katiangc duam khang shekel 1775 rui kasiamh the.

²⁹RINGHPOUC khang kat guangmei tanzinc tei talent 70 e khatni shekel 2400 e.

³⁰Hei tei rui RINGHPOUC tuang kalummei pheykai kaimun bam, tanzinc tuang ravchapaeng khatni mi tuang raengv,

³¹kairaengv tiangc bam khatni kairaengvmun tiangc bam, kalummei pheykai khatni kairaengv tuang muihtiangc hei guay hei kamei rui kasiamh the.