Read Rongmei Naga TATPATMEI 39 Bible Online

TATPATMEI 39 - Rongmei Naga bible

TATPATMEI 39

¹Nthanmei bamv khou thouh swmei ganv khou piu nimei amuh nunc tuang nrymmei, haengcnrymmei khatni haenghmei langc rui kasiamhmei chingkhiuhmei pwan tei kaniw rui kasiamh the. Aron tuang amuh pwan tei ni RINGHPOUC rui Mousi khou saloumei theilayna kaniw rui taanc the.

²Nrymmei, haengcnrymmei khatni haenghmei linen langc khou kachaekc riang dakloumei ephod ni kaniw rui kasiamh the.

³Kaniw rui kachaekc paek dy patna hei tei kariang khang tiap patna gaymei linen khatni nrymmei, haengcnrymmei khatni haenghmei langc khou tei dak kariulou the.

⁴Kaniw rui meic bou khou phungc nimei ephod riang kanei tei kasiamh lana hei tei katin kanei khou ntalou the.

⁵RINGHPOUC rui dincloumei kumcna, mi tuang langc tei rui kasiamhmei bungkam tei ephod tei lev kapumc akhat na swna kasiamhlou the.

⁶Kaniw rui karnelia tauc tei kachaekc rui kakhau riawlou the, kumna Jakob kaikhwang 12 zanc tei mi khou tei hy chuyna hylou the.

⁷RINGHPOUC rui Mousi khou saloumei kumcna Isarael kaikhwang 12 phaan swna hei tei ephod riang kanei khou tei thaengclou the.

⁸Kaniw rui ngaengthuapc tei baanhthaymei rui taanhmei kumcna kasiamh the, kaniw rui Ephod tei kachaekc tuang karing nrymmei khatni haengcnrymmei rui huilou the.

⁹Hei tei kw khat saengc, kw khat daic e, kumna kanei khang kadip the.

¹⁰Kaniw rui mi khou tei kamanv kunghmei ntauh kakin padeih duanclou the. Reymei kin khou rubi, topaz, khatni garnet tauc lou the.

¹¹Kaneimei kin khou emerald, saphir, khatni diamon lou the.

¹²Kathumhmei kin khou turkuis, agat, amethist tauc lou the.

¹³Padeihmei kin khou rui beril, karnelia, khatni jasper tauc lou the. Mi guay hei kachaekc khou duanclou the.

¹⁴Mi ntauc kathuic khou tei Jakob nac mpouh gaanv 12 zanc tei hylou the, kumna hei tei Isaraelmei kaikhwang 12 phaan tei e.

¹⁵Mi ngaengvthuapc riang khang tei kachaekc nthanmei rui langhriang kumcna kasiatclou the.

¹⁶Kaniw rui kachaekc paek kanei khatni kachaekc tuang haengv kanei kasiamhna mi kahaengv kanei tei mi ngaengvthuapc tuang kapy kwn kanei khou tei ntalou the.

¹⁷Kaniw mi kachaekc riang twan kanei tei mi kahaengv kanei khou tei ntalou the, kumna

¹⁸mi riang twan kabiak akhat tei kachaekc paek khou tei ntalou the. Heikumna hei tei ephod tuang riang khou tei hu khou thaengclou the.

¹⁹Kaniw rui kachaekc tuang kahaengv kanei kasiamh lana ngaengvthuapc tuang kabangcmei kwn kanei khou tei ntalou the. Hei tei ephod biak bam nimei kalungc biak tei ntalou the.

²⁰Kaniw rui kachaekc tuang haengv baihmei kanei ni kasiamhna hei tei ephod tuang riang kabangcmei, dak chuyloumei bungkam tin ruc khou tei, ntalou the.

²¹RINGHPOUC rui Mousi khou latdanv tiiloumei kumcna ngaengvthuapc tuang kahaengv guay tei ephod khou naimei haengv guay khou tei langh riang nrymmei rui nta kariulou the. Kumna hei tei bungkam ruc khou duapna bam the.

²²Ephod lungc khou numei thiula saenghmei tei ramhhiw langc nrymmei rui kasiamh the.

²³Py kari gut nimei phoukai tei kaekpat mak khang pheyluang akhat hui nkuaylou e.

²⁴Pheytin thaengckeymei nkuaymei khou tei kaniw rui nrymmei, haengcrymmei, haenghmei khatni linen phey gaymei rui dakloumei rui puc-heithai thaengc nkuaylou the.

²⁵Kachaekc rui kasiamhmei mbang ni puc-heithai kak khou tei thaengclou the.

²⁶Mousi khou RINGHPOUC rui latdanv tiiloumei theilayna mbang lev puc-heithai kanei tei rui lou maki makina kasiamhloumei pwan tei piuna thouh sw khang e.

²⁷Kaniw rui Aron khatni kanac mpouh nunc khang thiula linen phey gaymei rui daklou the kumlana

²⁸Py gwm ni, kalungc khou piumei nai kasiamhlou the.

²⁹Mousi khou RINGHPOUC rui latdanv tiiloumei kumcna siangiat phey ni linen phey gaymei nrymmei, haengcrymmei khatni haenghmei phey khou tei mpinh rui luanhlouna kasiamhlou the.

³⁰“Nthanmei hei Ravguangc khang e” twna hiakloumei tuang madanhmei tuang swmei kachaekc tuang paek ni kasiamh the.

³¹RINGHPOUC rui Mousi khou dincloumei kumcna kaniw rui hei tei pygwm hu khou tei langh riang nrymmei rui thaengclou the.

³²RINGHPOUC tuang kalummei pheykai tuang taanv guayna tei luailou the. RINGHPOUC rui Mousi khou latdanv swna saloumei kahak kumcna Isaraelmei rui taanclou the.

³³Kaniw rui pheykai khatni mi khou lou nimei na guay: katiangc; kakhuai; kaluang; khamthinghphey; ntiangh kabam;

³⁴khup khang nsangh haengcloumei lauziuchic tuang gic khatni guaihgic; kadam;

³⁵tauhpaek loumei Latdyng khuk, kaphuang, khatni kagwm;

³⁶RINGHPOUC khang ntyan katmei paeng, mi tuang na guay khatni nchinloumei ntyan;

³⁷kachaekc nthanmei thauhmaihyang, thauhmai, mi tuang na guay khatni mi tuang thauc;

³⁸kachaekc tuang ravchapaeng; teymei thauc; namhgaymei agaw; pheykai kaimun phey;

³⁹karaengv kazauhmei tanzinc tuang ravchapaeng, kaphuang, mi tuang na guay; duikhiu kaikhuang khatni mi tuang bam;

⁴⁰kairaengvphey khatni katiangc, kairaengv kaimun phey khatni kariang; kalummei pheykai tuang muihtiangc; kalummei pheykai khou lou nimei na guay;

⁴¹Nthanmei bamv khou Aron khatni kanac mpouh nunc rui piu nimei kagunc naimei amuh pwan hei guay hei Mousi khou phungc guang the.

⁴²RINGHPOUC rui Mousi khou latdanv tiiloumei kahak tei Isaraelmei rui kasiamhlou the.

⁴³Mousi rui mi guay tei zauc pwkhou RINGHPOUC rui dincloumei lev nchamc the twmei how the. Kumna Mousi rui mi guay khou tei suaihiamlou the.