Read Rongmei Naga TATPATMEI 40 Bible Online

TATPATMEI 40 - Rongmei Naga bible

TATPATMEI 40

¹RINGHPOUC rui Mousi khou sa the,

²“Reymei bw tuang reymei tingmik nungc RINGHPOUC tuang kalummei pheykai duanc thau tho.

³Latdanv ruh loumei latdyng khuk tei mi lungc khou tei lou o. Kumna mi hu khou tei khamthinghphey thaengc liamlou o.

⁴Tupaeng tei laaguangna mi khou tei lou nimei guay tei lou tho. Thauhmaihyang tei laaguangna mi khou tei thauhmai tei lou tho.

⁵Agaw nteimei tuang kachaekc ravchapaeng tei Latdyng khuk hu khou tei lou tho. Kumna kalummei pheykai chaengmun khou tei kaimun phey tei laamvlou tho.

⁶Khaengmei tuang raw nimei ravchapaeng tei kalummei pheykai kaimav khou tei kasiamhlou tho.

⁷Duikhiu kaikhuang tei kalummei pheykai lev ravchapaeng kak khou tei lou tho kumna mi khou tei dui lou padik tho.

⁸Kairaengv tei kasiamhlou tho kumna gut nimei chaengmun khou tei kaimun phey thaengclou tho.

⁹“Mi tangv tei pheykai tei lev mi khou gut nimei na guay tei nthanmei thauc rui teylouna katgut tho, kumna hei tei nthanmei sw puni the.

¹⁰Mi tangv tei ravchapaeng khatni mi khou gut nimei na guay tei thauh tey lana katgut tho, kumna hei tei nthan thiakh thiak puni the.

¹¹Hei tei kumcna duikhiu kaikhuang khatni kabam tei katgut tho.

¹²“Aron lev kanac mpouh nunc ta tei kalummei pheykai kaimun khou tei nduangh guang tho, kumna kariak tuang dui rui kaniw ta lou nthan tho.

¹³Aron tei amuh swna ataanv taanc nuh khang rui kakhou tei amuh tuang pwan piulouna, thauh teylouna kata katgut tho.

¹⁴Kanac mpouh nunc ta nduangh guangna kaniw khou thiula piulou tho.

¹⁵Kaniw ni amuh nunc swna ataanv taanc nuh khang rui, kapu ta thauh teyloumei tei kumcna kaniw ta ni teylou tho. Mi thauc teyloumei ruina kaniw ta guang nimei meickin guay khou amuh tiswlou khang e.”

¹⁶RINGHPOUC rui latdanv tiimei tei kumc rapna Mousi rui ramh kaguayna taanc the.

¹⁷Kaniw Izip mpatloumei tangv kaneimei kwm reymei bw tuang reymei tingmik nungc RINGHPOUC tuang pheykai duanc thau the.

¹⁸Mousi rui ntiangh bam guay tei kabamv kabamv khou lou the, katiangc lingc thau the, kaluang mphaihmei guay tei lou the.

¹⁹Kamei rui RINGHPOUC rui saloumei kumc rapna khuplou the khatni kainam khou gum binlou nimei phey tei gumlou the.

²⁰Mi tangv tei ntauhpaek kanei tei laana hei tei Latdyng khuk lungc khou lou the. Kamei rui mi khuk tuang kanu guay khou tei kaphuang nei tei karilou the, kumna hei tei gumlou the.

²¹Mi tangv mi khuk tei pheykai lungc khou tei laa gutlouna khamthinghphey tei thaengclou the. RINGHPOUC tuang latdanv kumcna kamei rui Latdyng khuk ta tei daengc langclou the.

²²Kamei rui ntyan paeng tei pheykai lungc khou tei dihpy biak thangc khamthinghphey paengc khou tei lou the,

²³kumna RINGHPOUC rui latdanv tiimei kumcna RINGHPOUC khang kat nimei ntyan tei mi ruc khou tei mbaenglou the.

²⁴RINGHPOUC tuang latdanv theilayna kamei rui thauhmaihyang tei kalummei pheykai lungc khou, dihba biak thangc ntyanpaeng lev dungc achowna lou the,

²⁵RINGHPOUC rui saloumei kumcna RINGHPOUC hu khou kamei rui thauhmai guay tei daanc the.

²⁶Kamei rui kachaekc ravchapaeng tei kalummei pheykai lungc khou khamthinghphey hu khou tei lou the,

²⁷kumna namhgaymei agaw tei ntei the.

²⁸Pheykai kaimun khou tei kaimun phey thaengclou the,

²⁹kumna mi kaimunphey hu khou tei rawna khaeng nimei ravchapaeng tei kasiamhlou the. Kamei rui mi khou tei rawna khaengmei khatni nap-bi khaengmei taanv tei RINGHPOUC rui samei kumcna taanc the.

³⁰Kamei rui duikhiu kaikhuang tei ravchapaeng lev pheykai kak khou tei lou the kumna hei tei dui lou padiklou the.

³¹Mi dui tei rui Mousi, Aron khatni kanac mpouh nunc kaniw phay baanc khiu the.

³²Mousi khou RINGHPOUC rui dincloumei theilayna kaniw rui pheykai khatni ravchapaeng daeng khou guang nimei, kathuic phaybaanh khiu the.

³³Mousi rui kalummei pheykai khatni ravchapaeng raengv tei katingh thau the kumna mi raengv kaimun khou tei kaimunphey laamvlou the. Kumna kamei rui taanv guayna tei taanc luai the.

³⁴Kalummei pheykai tei muangh rui gumbin the kumna RINGHPOUC bammei tuang hym gaanhmei riw tei rui mi khou tei padik the.

³⁵Hei zaeng rui Mousi pheykai lungc khou gut ngam mak khe.

³⁶Muangh tei mi kalummei pheykai khou tei rui ku dat kan pwkhou na rui Isaraelmei nunc tei kaniw zypui tei kabamv baih thangc kalaic the.

³⁷Muangh tei mi khou tei bam saanv, kaniw zypui kalaic mak ge.

³⁸Kumna kalaanvchaeng RINGHPOUC swmei muangc tei pheykai ruc khou khatni zingbangc chaeng muangh lungc khou tei mai chuangcna Isaraelmei nunc tuang chaenglwan guay khou how khwan e.