Read Rongmei Naga TATPATMEI 5 Bible Online

TATPATMEI 5 - Rongmei Naga bible

TATPATMEI 5

¹Mousi lev Aron rui Pharao hu khou guangna sa the, “RINGHPOUC Isarael Racguangc rui kata champouhna tazikramv khou ngay khang amei nunc ta titat ro” twna sa e.

²Pharao rui daw the, “RINGHPOUC kiu thow cho? Tabui swna ai kalat piuna Isaraelmei nunc ta titat bam nina cho? RINGHPOUC ta kiuc ai thay mak ge; Isaraelmei ta ai titat lak ge.”

³Mousi lev Aron rui daw the, “Ibrimei Racguangc aney khou ndauhlou the. RINGHPOUC aniw Racguangc khang khaengmei puat kat tat khang tazikramv thangc aniw ta zaeng neih thumh chaengkaamv swna titatlou o. Kum timak ge thei kamei rui aniw ta ravpyan rui hamh e thei, suc-rih rui swluai ngam puni the.”

⁴Izipmei guangc tei rui Mousi lev Aron khou sa the, “Tabui swna meic nunc ta taanvtaanh makna nduangh amaan tat bam nina cho? Mi bangc nunc ta tei kaniw taanv titaanc dat tho!

⁵Zauclo! nangniw hei Izipmei suangc meic geic the. Nang kaniw ta taanv titaanc nthaekc nii bu di hay!” twna Pharao rui sa the.

⁶Mi nungc kahak tei guangh rui bangh sinmei nunc khatni Isaraelmei taanv khou zayloumei nunc khou tei kumna latdanv tii the,

⁷“Niangtauc kasiamh khang mi nunc khang hei napgou tii dat ri tho. Kaniw ta kakhang kakhang tiphu tho.

⁸Tiki kahu nungc taanc pat bammei niangtauc sing zu tei taanc pat nina e, niangtauc akhat na sini tah nuh mak ge. Kaniw aliauh lana kaniw Racguangc khang khaeng tat ni twna ney bam tu di the.

⁹Saraamhmei lat ta nkingna kaganv swmaan mak khang kaniw ta taanv titaanc ranv tho khatni tityn bam o.”

¹⁰Bangh sinmei nunc, khatni Isaraelmei taanv khou zayloumei nunc tat patna Isaraelmei nunc khou sa the, “Guangh rui napgou tii dat lak khe twna sa e.

¹¹Nai naimei bamv thangc nangniw kakhang kakhang phu tat nina the; kumna niangtauc sing kahu nungc tei lev nchamcna kasiamh pat nina e twna kamei rui sa e.”

¹²Kumna meic nunc tei mi kandic kabamv kathuic khou napgou phu tat the.

¹³Napgou tii bammei douc kasiamh pat bammei niangtauc sing zu tei tingmik pum kasiamh pat bam khang bangh sinmei nunc tei rui thouc gut the.

¹⁴Isaraelmei taanv khou zayloumei nunc ta tei Izipmei bangh sinmei nunc rui bai the. “Kahu nungc taanc pat bammei niangtauc sing zu tei ntaw tabui swna taanc pat dat mak tu cho?” twna kaniw rui thouc gut the.

¹⁵Khoutei Isaraelmei nunc taanv khou zayloumei nunc tei rui Pharao khou tatna sa the, “Tabui swna nangbangc nunc ta heikumna sw bam tu cho?

¹⁶Aniw khang napgou tii mak khe; tiki niangtauc kasiamh pat khang thu sa the! Ntaw aniw ta bai bam e; tiki mi hei nang mei nunc khuay de cho.”

¹⁷Guangh tei rui daw the, “Nangniw aliauhna taanvtaanc nii lam makna, nangniw Racguangc khang khaeng tat khang ney bam tuang e.

¹⁸Taanvtaanc tat dat tho. Nangniw khang napgou katitna sini tii lak ge; tiki niangtauc sing thu tah makna kasiamh pat bam nina e.”

¹⁹Kahu nungc taanc pat bammei sing zu tei, tingmik kathuic taanc pat tanh tan bam nina e twna samei hei rui kaniw khang ryanramei the twmei kaniw thay pat the.

²⁰Kaniw rui tat pat dat pwkhou, Mousi khatni Aron kaniw ta nkhwan bammei ta ariw the.

²¹Kaniw rui Mousi khatni Aron khou sa the, “Nangney ruc khou RINGHPOUC rui latzan sw kan diu. Nangney rui Pharao lev katuang meicdaihmei nunc rui aniu ta howmu khang swlou the kalam thu aniw ta swluai diu khang nangney rui swlou the.”

²²Mousi Ravguangc khou guang datna sa the, “He RINGHPOUC, tabui swna mi mei nunc ruc khou hei ryanramei tipatlou bam tu cho? Nang ata thoucloumei kiu mi khang hei dina cho?

²³Ai rui guangh khou tatna nang phaan salou nungc tei rui thauna, kamei rui kaniw ta rai thau the. Heikum bam khou kaniw ta nkhavlou khang nang rui ramhkhat na sini swlou mak khe!”