Read Rongmei Naga TATPATMEI 6 Bible Online

TATPATMEI 6 - Rongmei Naga bible

TATPATMEI 6

¹Khoutei Ravguangc rui Mousi khou sa the, “Ai rui Pharao khou taanclou pw nimei tei ntaw thu nang how puni the. Ai rui abaantan rui amei nunc ta titat puni the. Ngguay, kaniw ta kakandih khou rui ti-alay ganh khang ai rui swlou puni.”

²Ravguangc rui Mousi khou sa the, “Ai hei RINGHPOUC e.

³Abraham, Isak, khatni Jakob khou ai hei Ngamparymei Racguangc swna lyanlou kan the; tiki nthanmei azanc RINGHPOUC twmei zanc hei ai kaniw khou ndauhlou kan mak he.

⁴Kaniw gin swna lungc bammei Kanaan kandic tei kaniw khang tii ni twna ai rui kaniw lev latdyng ni swlou kan the.

⁵Izipmei nunc rui bangh tisw bammei Isaraelmei nunc rui puihuay bammei khwan ai chu the; kumna atuang latdyng tei ai ningtow e.

⁶Ai rui kaniw khou kumna sa e twna Isaraelmei nunc khou sa o, ‘Ai hei RINGHPOUC e; nangniw Izip khou bangh sw bammei khou rui nangniw ta ai rui tiduaklou puni e. Kaniw ta ranv sihmei dandi tii khang atuang ngammei baancpwam zay thau puni; kumna ai rui nangniw ta kanlou puni.

⁷Ai rui nangniw ta amei tiswlou puni, khatni ai hei nangniw Racguangc sw puni. Izip khou bangh sw bammei khou rui ai rui nangniw ta riclou pwkhou, ai hei RINGHPOUC nangniw Racguangc e twmei nangniw thay puni.

⁸Ai rui tii ni twna Abraham, Isak, khatni Jakob khou nthukna nrianhlou kanmei kandic khou tei, ai rui nangniw ta phungc guanglou puni; mi hei nangniw tuang swna nangniw khang tiilou puni, Ai hei RINGHPOUC e.’ ”

⁹Mousi rui hei tei Isaraelmei nunc khou raclou the; tiki kaniw hei tei chulou mak e; kalam thu kaniw ta bangh swna rai kasicmei rui, kaniw lung sw-anau ngam the.

¹⁰Khoutei RINGHPOUC rui Mousi khou sa the,

¹¹“Isaraelmei nunc ta mi kandic hei ti-mpatlouna, titat nina e twna Pharao khou sa o.”

¹²Mousi rui RINGHPOUC khou daw the, “Isaraelmei nunc sini alat chulounitu hamhmei ta, akumhna Pharao rui thu chulou bam nina cho? Ai hei thu heidikamv lat sa thay makpui mei de.”

¹³“Nangney rui Isaraelmei nunc ta Izip khou rui nduangh pat khang ai rui latdanv tii the twna Pharao lev Isaraelmei khou sa o,” twna RINGHPOUC rui Mousi lev Aron khou latdanv tii the.

¹⁴Mi hei kaniw kaikhunc tuang kapy nunc e, Jakob nac nareimei Reuben tei kanac mpouh gaanv padeih puanc e. Mi nunc kiu thu: Hanok, Pallu, Hezron, khatni Karmi hei the. Mi hei Reuben tuang kaikhunc khatni kaikhwang zanc phunghmei the.

¹⁵Simeon nac mpouh gaanv charuk e. Mi nunc kiu thu: Jemuel, Jamin, Ohat, Jakin, Zohar, khatni Kanaanmeipui rui puanhmei Shaul hei nunc hei e. Mi hei Simeon tuang kaikhunc khatni kaikhwang zanc phunghmei the.

¹⁶Levi nac mpouh gaanv thumh e. Mi nunc kiu thu: Gershon, Kohat, Merari hei e. Kaniw hei Levi tuang kaikhunc khatni kaikhwang zanc phunghmei the. Levi tingkwm 137 lungclou khwan e.

¹⁷Gershon kanac mpouh gaanv nei nai e. Mi nei kiu thu Libni khatni Shimei e. Mi hei Gershon tuang kaikhunc khatni kaikhwang zanc phunghmei the.

¹⁸Kohat nac mpouh gaanv padeih e. Mi nunc kiu thu: Amram, Izhar, Hebron khatni Uzziel hei e. Kohat tingkwm 133 lungclou e.

¹⁹Merari nac mpouh gaanv nei e. Mi kiu thu Mahli lev Mushi e. Mi hei Levi puinacmei khatni kakikta nunc e.

²⁰Amram rui kapu tanpui Jokebed ta kawna Aron lev Mousi ta puanclou e. Amram tingkwm 137 lungclou e.

²¹Izhar nac mpouh gaanv thumh e. Mi kiu thu Kora, Nepheg, khatni Zikri hei e.

²²Uzziel ni kanac mpouh gaanv thumh e. Mi nunc kiu thu: Mishael, Elzaphan, khatni Sithri hei e.

²³Aron now hei Amminadab rui puanhmei Nahson tanpui Elisheba e. Mi pui tei rui Nadab, Abihu, Eleazar, khatni Ithamar ta puanclou e.

²⁴Kora nac mpouh gaanv thumh e. Mi nunc kiu thu: Assir, Elkana khatni Abiasap hei e. Kaniw hei Kora puinacmei kaikhwangmei nunc e.

²⁵Aron nac mpouh Eleazar rui Putiel nac aluhpui ta kaw e; kumna mi pui tei rui Phinehas ta puanclou e. Kaniw hei Levi kai puinac nunc tuang pupouc nunc e.

²⁶Mousi lev Aron hei RINGHPOUC rui “Isaraelmei ta Izip khou rui nduangh pat ro” twna saloumeipu nei tei e.

²⁷Kaney hei Isaraelmei ta mpatlou o twna Pharao khou samei nei tei e.

²⁸RINGHPOUC rui Mousi khou Izip kandic khou heikumna

²⁹sa the, “Ai hei RINGHPOUC e. Ai rui nang khou samei kaguayna hei Izipmei guangc khou sa o.”

³⁰“Ai hei heidikamv lat sa thay mak ge twmei nang thay e; tabui kumhna guangh rui alat nkinglou bam punina cho?” twna Mousi rui daw the.